Founga ʻo Hono Tokoniʻi ʻe ha Foha ʻa ʻEne Tamaí
KO James, mei ʻIngilani, ʻi hono taʻu 30 tupu siʻí, ʻokú ne maʻu ha ngaahi taʻemalava fakaeʻatamai mafatukituki mo ha kiʻi puke he mahaki puputuʻú. Neongo ia, ʻi he ngaahi taʻu lahi kuó ne maʻu ai ʻa e ngaahi fakataha ʻa e Kau Fakamoʻoni ʻa Sihová fakataha mo ʻene faʻeé pea mo hono tuofefiné. Kae kehe, ko ʻene tamaí ne ʻikai ʻaupito te ne loko mahuʻingaʻia ʻi heʻenau tuí. ʻI he efiafi ʻe taha hili ha fakataha naʻe fakahoko ai ha fakahāhā ki he founga ke fakaafeʻi ai ha maheni ki he Fakamanatu ʻo e pekia ʻa Kalaisí, naʻe ʻalu fakavave ai ʻa James ki hono lokí. ʻI he hohaʻa ki aí, naʻe muimui ʻiate ia ʻa ʻene faʻeé ʻo maʻu atu ia ʻokú ne fakasio vavale holo ʻi he ngaahi ʻīsiu motuʻa ʻo e ngaahi makasini Taua Leʻo mo e ʻĀ Hake! Naʻá ne fili ha taha ʻoku ʻi ai ha tatau ʻo ha fakaafe ki he Fakamanatú ʻi he peesi fakamuimuí peá ne fakavave atu ki heʻene tamaí. Naʻá ne ʻuluaki tuhu ki he fakatātaá pea hoko leva ki heʻene tamaí mo ne pehē “ʻA Koe!” Naʻe fesiofaki ʻa ʻene faʻeé mo ʻene tamaí ʻi he ʻohovale ʻi heʻena ʻiloʻi ko hono fakaafeʻi ia ʻe James ʻa ʻene tamaí ki he Fakamanatú. Naʻe tala ange ʻe heʻene tamaí mahalo pē te ne ʻalu ki ai.
ʻI he efiafi ʻo e Fakamanatú, naʻe ʻalu ʻa James ki he tautauʻanga vala ʻa ʻene tamaí, ʻo fili ha talausese peá ne ʻave ia ki heʻene tamaí, ʻo fakaʻilonga ange ke ne tui ia. Naʻe tali ange ʻe heʻene tamaí ʻe ʻikai ke ʻalu ia ki he fakatahá. Ko ia ai, naʻe ʻalu toko ua pē ʻa James mo ʻene faʻeé ki he Fale Fakatahaʻangá.
Kae kehe, ʻi ha taimi ki mui ai, naʻe hoko ai ʻo ʻikai loto-lelei ʻa James ʻi ha tuʻunga fakautuutu ʻi he taimi naʻe feinga ai ʻa ʻene faʻeé ke ʻai ia ke maau ki hono maʻu ʻa e ngaahi fakataha ʻa e fakatahaʻangá, ʻi hono kehé naʻá ne fili ke nofo pē ia ʻi ʻapi mo ʻene tamaí. ʻI he pongipongi Sāpate leva ʻe taha, naʻe toe fakafisi ai ʻa James ʻo ʻikai loto-lelei ʻi he feinga ʻa ʻene faʻeé ke ʻai ia ke ne maau ki he fakatahá. ʻI he ʻohovale lahi ʻa ʻene faʻeé, naʻe tafoki hake ʻa e tamai ʻa James kiate ia ʻo ne pehē ange, “James kapau te u ʻalu he ʻahó ni ki he fakatahá, te ke ʻalu?” Naʻe ulo e mata ʻo James. Naʻá ne fāʻofua ʻi heʻene tamaí mo ne pehē “ʻIo!” pea naʻe ʻalu ʻa e toko tolú ki he Fale Fakatahaʻangá.
Mei he ʻaho ko iá, naʻe hokohoko atu ʻa e tamai ʻa James ke maʻu ʻa e ngaahi fakataha kotoa ʻi he ʻaho Sāpaté pea ʻikai fuoloa kuó ne fakahā ke fakalakalaká, kuo pau foki ke ne maʻu mo e ngaahi fakataha kehé. (Hepelu 10:24, 25) Naʻá ne fai ʻa e meʻá ni, pea ʻi he māhina ʻe ua ki mui aí naʻe kamata ke ne ako tuʻumaʻu ʻa e Tohitapú. Naʻá ne fai ha fakalakalaka vave, ʻo fai vave ʻa e ngaahi liliu naʻe fiemaʻu ʻi heʻene moʻuí, pea ʻikai fuoloa mei ai naʻá ne kamata ke kau ʻi he ngāue malangaʻi ʻo e Puleʻangá. Hili ʻa e taʻu ʻe taha mei heʻene kamata ako ʻa e Tohitapú, naʻá ne fakatapui ai ʻa ʻene moʻuí kia Sihova pea fakahāhaaʻi eni ʻaki ʻa e papitaiso ʻi he vaí. ʻOkú ne ngāue ʻi he lolotongá ni ko ha sevāniti fakafaifekau ʻi heʻene fakatahaʻangá. ʻI he taimí ni, ʻoku tauhi fāʻūtaha ai ʻa e tokotaha kotoa ʻi he fāmilí kia Sihova.