“Naʻe Fakalato Ai ha Fiemaʻu ʻi Hoku Lotó”
“ʻOKU OU fakamālō atu ʻi he loto-moʻoni ki he meʻaʻofa fakaʻofoʻofa ko e Draw Close to Jehovah. Naʻe fakalato ai ha fiemaʻu ʻi hoku lotó—ko e fiemaʻu ke ongoʻi ʻoku ʻofaʻi mo koloaʻaki ʻe Sihova. ʻOku ou ongoʻi mātuʻaki ofi ange kia Sihova mo hono ʻAlo ʻofaʻangá he taimí ni. ʻOku ou loto ke u talanoa ki he tokotaha kotoa ʻo fekauʻaki mo e tohí ni pea ke ʻave ha tatau ki he faʻahinga kotoa pē ʻoku ou ʻofa aí.” Ko e anga ia ʻo e ongoʻi ʻa e taha ʻo e Kau Fakamoʻoni ʻa Sihová ʻo fekauʻaki mo e tohi foʻou peesi ʻe 320 naʻe tukuange mai ʻi he ngaahi Fakataha-Lahi Fakavahe “Kau Fanongonongo Faivelenga ʻo e Puleʻangá” naʻe fai he lolotonga ʻo e 2002/03. Tau sivisiviʻi ange ha niʻihi ʻo e ngaahi tafaʻaki ʻo e tohi foʻoú ni pea mo e ʻuhinga naʻe pulusi ai iá.
Niʻihi ʻo e Ngaahi Tafaʻaki ʻo e Tohi Foʻoú
Ko e hā ʻoku ʻi he tohi foʻou ko ʻení? Ko e ngaahi fakamatala kotoa ʻoku ʻoatu ʻi he ongo kupu ako ʻi he ʻīsiu ko ení—mo e toe ngaahi meʻa lahi ange! ʻOku ʻi he tohí ʻa e vahe ʻe 31, ʻoku meimei lahi tatau ʻa e vahe taki taha mo ha kupu ako ʻo ha Taua Leʻo. ʻI he hili ʻa e talateú mo e ʻuluaki ngaahi vahe ʻe tolú, ʻoku vahevahe ʻa e tohí ki he konga ʻe fā, ko e taha ki he ʻulungaanga tefito taki taha ʻo Sihová. ʻOku kamataʻaki ʻa e konga taki taha ha vakai fakalūkufua ki he ʻulungaanga ko iá. ʻOku lāulea ʻa e ngaahi vahe siʻi ʻoku hoko mai aí ki he founga ʻoku fakahāhā ai ʻe Sihova ʻa e ʻulungaanga ko iá. ʻOku ʻi he konga taki taha ha vahe fekauʻaki mo Sīsū. Ko e hā hono ʻuhingá? Sai, naʻe pehē ʻe Sīsū: “Ko ia kuo ne mātā au, kuo ne mātā ʻa e Tamai.” (Sione 14:9) ʻI he tuʻunga ko ha tapua haohaoa mai ia ʻo Sihová, ʻoku tokonaki mai ai ʻe Sīsū kiate kitautolu ha ngaahi fakatātā mahino ʻo e ngāue ʻa e ngaahi ʻulungaanga ʻo e ʻOtuá. ʻOku fakaʻosiʻaki ʻa e konga taki taha ha vahe ʻokú ne akoʻi mai kiate kitautolu ʻa e founga ke faʻifaʻitaki ai kia Sihova ʻi hono fakahāhā ʻa e ʻulungaanga ʻoku fai ki ai ʻa e lāuleá. ʻI he lāulea ki he ngaahi ʻulungaanga ʻo Sihová, ʻoku lave ai ʻa e tohi foʻoú ni ki he tohi kotoa pē ʻo e Tohitapú.
ʻOku toe maʻu ʻe he tohi Draw Close to Jehovah ha ngaahi tafaʻaki makehe ʻe niʻihi. Kamataʻaki ʻi he vahe 2, ʻoku ʻi he vahe taki taha ha puha ʻoku fakakaveinga “Ngaahi Fehuʻi ki he Fakalaulauloto.” Ko e ngaahi konga Tohitapu mo e ngaahi fehuʻi ʻoku tokonaki mai aí ʻoku ʻikai fakataumuʻa ko ha fakamanatu ia ʻo e vahé. Ka ʻi hono kehé, ʻoku faʻufaʻu ia ke tokoniʻi ai koe ke ke ngāueʻaki ʻa e Tohitapú ke fakalaulauloto loloto ai ki he tuʻunga-leá. ʻOku fokotuʻu atu ke ke lau fakalelei ʻa e konga Tohitapu taki taha. Fakakaukauloto leva ki he fehuʻí pea feinga ke ngāueʻaki fakafoʻituitui ia. ʻE lava ʻe he fakalaulauloto peheé ʻo ueʻi ho lotó, ʻi hono tokoniʻi koe ke ke ʻunuʻunu ke toe ofi ange ai kia Sihova.—Sāme 19:14.
Ko e ngāue fakaeʻaati ʻi he tohi Draw Close to Jehovah naʻe fakatotoloʻi mo teuteuʻi lelei ia koeʻuhi ke ne faiako mo fakaueʻiloto. ʻOku ʻi he ngaahi vahe ʻe hongofulu-mā-fitu ha ngaahi fakatātā peesi kakato ʻo e ngaahi tuʻunga faka-Tohitapú.
Ko e Hā Naʻe Pulusi Aí?
Ko e hā naʻe pulusi ai ʻa e tohi Draw Close to Jehovah? Ko e taumuʻa tefito ʻo e tohi foʻou ko ʻení ke tokoniʻi kitautolu ke tau hoko ʻo ʻiloʻi lelei ange ʻa Sihova koeʻuhi ke tau lava ʻo langa hake ai ha vahaʻangatae fakafoʻituitui mālohi ange mo hotau ʻOtuá.
ʻOku lava ke ke fakakaukau atu ki ha taha ʻe lava ke maʻu ʻaonga mei he tohi Draw Close to Jehovah, ko ha tokotaha ako Tohitapu nai pe naʻa mo ha tokoua pe tuofefine Kalisitiane ʻikai longomoʻui? Fēfē koe—kuó ke kamata lau ʻa e tohi foʻoú ni? Kapau ʻoku ʻikai, fēfē ke fakataimitēpileʻi ha taimi ke kamata ai ia ʻi he vave taha ʻe malavá? Vaheʻi ha taimi ke ke fakakaukauloto ai ki he meʻa ʻokú ke laú. ʻOfa ke tokoniʻi koe ʻe he tohi foʻoú ni ke ke ʻunuʻunu ke toe ofi ange ai kia Sihova ko e ʻOtuá, koeʻuhi ke ke fanongonongo ʻa e ongoongo lelei ʻo hono Puleʻangá ʻaki ʻa e fiefia mo e faivelenga lahi!