Naʻá Ne Vahevahe ʻa ʻEne Tuí ki Hono Kaungā Kalasí

TE KE saiʻia ke tokoniʻi ʻa ho kaungā kalasí ke nau maʻu ha mahino lelei ange ki hoʻo ngaahi tui makatuʻunga ʻi he Tohi Tapú? Ko Magdalena, ko ha tokotaha ako taʻu 18 ia ʻi ha akoʻanga māʻolunga ʻi Pōlani, ʻokú ne faʻa talanoa ki hono kaungā kalasí fekauʻaki mo ʻene ngaahi tuí ʻi he tuʻunga ko e taha ʻo e Kau Fakamoʻoni ʻa Sihová. Ko hono olá, ʻoku toutou ʻeke kiate ia ʻa e ngaahi fehuʻi hangē ko ení, ‘ʻOku ʻuhinga ki he hā ʻa e hoko ko e taha ʻo e Kau Fakamoʻoni ʻa Sihová?’ mo e ‘ʻOku ʻikai koā ke mou tui kimoutolu kia Sīsū Kalaisi?’ Naʻe lava fēfē ke ne tokoniʻi ʻa hono kaungā kalasí? Naʻe lotu ʻa Magdalena kia Sihova ki ha tataki pea ngāue ʻo fehoanakimālie mo ʻene ngaahi lotú.​—Semisi 1:5.

ʻI he ʻaho ʻe taha, naʻe kole ai ʻe Magdalena ki ha faiako ʻa ia naʻá ne saiʻia heʻene tuí pe ʻe lava ke ne huluʻi ki he kalasí ʻa e foʻi vitiō Jehovah’s Witnesses​—The Organization Behind the Name.a Naʻe loto ʻa e faiakó ki he meʻá ni. Naʻe tala ange leva ʻe Magdalena ki hono kaungā kalasí: “ʻOku ou fokotuʻutuʻu ha kaumeʻa ke ne fakahoko ha polokalama miniti ʻe 90 ki he kalasí. ʻE kau ai hono fakaʻaliʻali ʻo ha foʻi vitiō mo ha lāulea ki he Kau Fakamoʻoni ʻa Sihová. Te mou saiʻia ke haʻu ki ai?” Naʻe ʻio ki ai ʻa e tokotaha kotoa. Naʻe kamata ke teuteu ai ki he polosekí ʻa Magdalena mo Wojciech, ko ha ʻevangeliō taukei taimi-kakato.

Ko e palaní ke kamata ʻa hono fakahokó ʻaki ha malanga miniti ʻe 20 makatuʻunga he polosiua Kau Fakamoʻoni ʻa Sihová​—Ko Hai Kinautolu? Ko e Hā ʻOku Nau Tui ki Aí?* ʻo hoko atu ai ha fetalanoaʻaki fehuʻi mo e tali. ʻE toki hulu leva ʻa e foʻi vitioó ʻi he laipeli ʻa e ʻapiakó. Ko e tokotaha ako taki taha ʻe ʻoange ki ai ha meʻaʻofa—ko ha fuʻu sila lahi naʻe ʻi ai ha ngaahi polosiua, ko e tohi Questions Young People Ask​—Answers That Work,* mo e ngaahi tuleki pea mo e ngaahi makasini.

ʻI he ʻaho ʻo hono fakahokó, naʻe kau ʻi he kau fanongó ʻa e kaungā kalasi ʻe toko 14, ko e faiakó, mo e kau ako kehe ʻe toko 4 ʻa ia naʻa nau ʻi he laipelí. Naʻe ʻuluaki fakamatalaʻi ʻe Wojciech ʻo pehē ko e niʻihi ʻo e kau faʻu-maau mo e kau faʻu-tohi Pōlaní naʻa nau ngāueʻaki ʻa e huafa fakaʻotua, ko e Sihová, ʻi heʻenau ngaahi tohí. Naʻá ne toe lave ki he ngaahi tohi fehuʻi mo e tali Katolika motuʻa naʻe ʻi ai ʻa e huafa fakaʻotuá. ʻI hono fakamatalaʻi ʻa e ngāue ʻi onopooni ʻa e Kau Fakamoʻoni ʻa Sihová, naʻá ne fakahaaʻi ai ʻa e ngaahi polosiua ʻo e ngaahi ʻōfisi vaʻa kehekehe mo e ngaahi tā ʻo ha ngaahi Holo ʻAsemipilī lahi.

Naʻe hoko atu ai ha fetalanoaʻaki longomoʻui. Naʻe ngāueʻaki ʻe Magdalena mo Wojciech ʻa e Tohi Tapú ʻi hono tali ʻa e ngaahi fehuʻí. Naʻe maongo eni ki he kau fanongó pea fakatuipauʻi ai kia kinautolu naʻe ʻikai ke malangaʻi ʻe he Kau Fakamoʻoni ʻa Sihová ʻa ʻenau ngaahi fakakaukau pē ʻanautolú. Ko e hā ʻa e niʻihi ʻo e ngaahi fehuʻí pea naʻe anga-fēfē hono talí?

Fehuʻi: ʻOku fonu ʻa e Tohi Tapú ʻi he lea taʻemahino mo e ngaahi lea fakatātā, ʻa ia ʻe lava ke fakaʻuhingaʻi ia ʻi ha ngaahi founga lahi. ʻE malava fēfē ke moʻui ʻo fehoanaki mo e Tohi Tapú?

Tali: ʻOku pehē ʻe he niʻihi ko e Tohi Tapú ʻoku hangē ia ha vālingi ʻa ia ʻe lava ke ke tāʻaki ha fasi pē ʻokú ke saiʻia ai. Kae fakakaukau angé: Kapau ʻokú ke loto ke ʻiloʻi ʻa e ʻuhinga ʻa ha faʻu-tohi ʻi heʻene ngaahi fakamatalá, ʻikai ʻe lelei tahá ke ʻeke pē kiate ia? ʻI he ʻikai hangē ko e kau faʻu-tohi ʻo e ngaahi tohi fakaetangata kuo nau maté, ko e Faʻu-Tohi ʻo e Tohi Tapú, ʻa Sihova ko e ʻOtuá, ʻoku moʻui. (Loma 1:​20; 1 Kolinito 8:​5, 6) Ko e potutohi ʻo ha konga Tohi Tapu ʻe lava ke fakahaaʻi ai ʻa e fakaʻuhinga totonú. Tānaki atu ki ai, ʻoku faʻa fakahoko ʻe he Tohi Tapú ʻa e kaveinga tatau ʻi he ngaahi feituʻu kehekehe, ko ia ko hono fakahoa kinautolú ʻe tokoni ia. Ko ia ʻe lava ke tau tuku ki he ʻOtuá ke ne tataki ʻetau ngaahi fakakaukaú, ʻo hangē ia ko ia tonu naʻá ne fakamatalaʻi mai ʻa e konga Tohi Tapú kia kitautolú. ʻI hono fai iá, ʻe lava ke tau hoko ai ʻo ʻilo pea ke moʻui ʻo fehoanaki mo hono finangaló ʻo hangē ko ia ʻoku fakahaaʻi ʻi he Tohi Tapú, ʻikai ʻe lava ke tau fai ia?

Fehuʻi: Ko e hā ʻa e faikehekehe ʻi he vahaʻa ʻo e kau Kalisitiané mo e Kau Fakamoʻoni ʻa Sihová?

Tali: Ko e kau Kalisitiane kimautolu! Ka ʻi he ʻikai ke taukaveʻi pē ko e kau Kalisitiané, ʻoku feinga ʻa e Kau Fakamoʻoni ʻa Sihová ke moʻui ʻo fehoanaki mo e meʻa ʻoku nau tui ki aí pea mo e meʻa ʻoku akoʻi ʻe he ʻOtuá ke nau maʻu ʻaonga mei aí. (Aisea 48:​17, 18) Koeʻuhi ko e kotoa ʻo ʻenau ngaahi akonakí ʻoku makatuʻunga ʻi he Tohi Tapú, ʻoku nau ʻiloʻi ai ʻoku nau maʻu ʻa e moʻoní.​—Mātiu 7:​13, 14, 21-​23.

Fehuʻi: Ko e hā ʻoku mou fakaofiofi ai ki he kau sola fakaʻaufulí pea fakataumuʻa ke talanoa kia kinautolú? ʻIkai ko hono fakamālohiʻi ia hoʻomou tuí ki he niʻihi kehé?

Tali: ʻOkú ke fakakaukau ʻoku hala ʻa e taimi ʻoku lea anga-fakaʻapaʻapa atu ai ha taha ʻi he halá ʻo ʻeke atu ʻa e anga hoʻo fakakaukau ki ha meʻa? (Selemaia 5:1; Sefanaia 2:​2, 3) (Naʻe fakahāhā leva ʻe Wojciech mo Magdalena ʻa e founga ʻo ʻena ʻeke ki he faʻahinga ʻoku fefonongaʻakí pe ʻoku tokanga mai nai ʻa e ʻOtuá ki he faʻahinga naʻa nau faingataʻaʻia ʻi ha tāfea naʻe toki hoko ʻi Pōlani.) ʻI he fanongo ki he fakakaukau ʻa e tokotahá, naʻá ma tataki ia ki he Tohi Tapú. Kapau ʻoku ʻikai loto-lelei ha taha ke talanoa, naʻá ma fakalea māvae kiate ia pea hoko atu. (Mātiu 10:​11-​14) Ko hano fakamālohiʻi ia ʻo e niʻihi kehé ki ha fetalanoaʻaki? Pe ʻoku totonu ke ʻoua ʻe toe fetalanoaʻaki ʻa e kakaí ia?

Fehuʻi: Ko e hā ʻoku ʻikai ke mou kātoangaʻi ai ʻa e ngaahi ʻaho mālōloó?

Tali: ʻOku mau kātoangaʻi ʻa e meʻa pē taha ʻoku fekauʻi mai ʻe he Tohi Tapú ke fakamanatú—ko e Fakamanatu ʻo e pekia ʻa Sīsū Kalaisí. (1 Kolinito 11:​23-​26) Ki he ngaahi ʻaho mālōloó, ʻe lava ke ke fakatotolo fekauʻaki mo honau tupuʻangá ʻaki ʻa e kumi ki he ngaahi ʻenisaikolopētiá mo e ngaahi maʻuʻanga fakamatala alafalalaʻanga kehe. Kapau te ke fai ia, ʻe faingofua ai hoʻo ʻiloʻi ʻa e ʻuhinga ʻoku ʻikai te mau kātoangaʻi ai ha ngaahi meʻa pehē.​—2 Kolinito 6:​14-​18.

Naʻe ʻeke ʻa e toe ngaahi fehuʻi lahi pea naʻe tali. Naʻe fuʻu fuoloa ʻa e fetalanoaʻakí ʻo pau ai ke toloi hono hulu ʻo e foʻi vitioó.

Ko e hā ʻa e tali ʻa e kau akó? Tuku ke tala mai ia ʻe Magdalena: “Naʻá ku ʻohovale ʻi he ʻeke ʻe he kau ako ʻe niʻihi ʻa ia naʻa nau faʻa tōʻonga sesele mo manuki ki he niʻihi kehé ʻa e ngaahi fehuʻi mafatukitukí. Neongo naʻa nau taukaveʻi ko e kau fakaʻikaiʻi-ʻOtua kinautolu, naʻa nau fakahaaʻi ʻa e tui ki he ʻOtuá lolotonga ʻa e fetalanoaʻakí!” Ko e faʻahinga ko ia naʻe kau ki aí naʻa nau tali houngaʻia ʻa e ngaahi meʻaʻofá—ko ha tohi fakakātoa ʻe 35, polosiua ʻe 63 mo e makasini ʻe 34 naʻe tufa kia kinautolú.

He ngaahi ola fakaofo moʻoni ē mei ha poloseki fakaako! Naʻe ʻikai ngata pē ʻi heʻene tokoniʻi ʻa e kaungā kalasi ʻo Magdalena ke nau hoko ai ʻo ʻiloʻi mo mahinoʻi lelei ange ʻa e Kau Fakamoʻoni ʻa Sihová ka naʻe toe fakalototoʻaʻi ai ʻa e tokolahi ʻo e toʻutupú ke nau fakakaukau fekauʻaki mo e taumuʻa ʻo e moʻuí. Ko e hā ʻoku ʻikai ke ke feinga ai ke tokoniʻi ʻa ho kaungā kalasí ke nau ako lahi ange fekauʻaki mo e meʻa ʻokú ke tui ki aí?

[Fakamatala ʻi lalo]

[Fakatātā ʻi he peesi 31]

Ko e teuteu ʻa Magdalena mo Wojciech ki he fetalanoaʻakí