ʻOkú Ke Fāinga mo Hoʻo Ngaahi Ongoʻí?
KO E konga lahi ʻo ʻene moʻuí, kuo fāinga ai ʻa Lena mo e ngaahi ongoʻi kovi fekauʻaki pē mo ia. “Ko e ngaahi taʻu ʻo e ngaohikovia fakaefehokotaki fakasino lolotonga ʻeku kei siʻí kuó ne maumauʻi ai ʻa e konga lahi ʻo ʻeku tokaʻi-kitá,” ko ʻene laú ia. “Naʻá ku ongoʻi kuó u mātuʻaki taʻeʻaonga moʻoni.” ʻOku manatu foki mo Simone ki heʻene kei finemuí mo pehē, “Loloto ʻi loto ʻia au naʻá ku ongoʻi ngeʻesi mo tui naʻe ʻikai haku loko mahuʻinga.” Ko e fuʻu ongoʻi taʻefiefia ko ia ʻoku iku mei he ngaahi ongoʻi peheé ʻoku hā ngali mafolalahia ia he ʻahó ni. ʻOku pehē ʻe ha kautaha faleʻi maʻá e toʻutupú fou he telefoní, ko e meimei vaeua ʻo ʻenau kau tā telefoni angé ʻoku nau fakahāhā ʻa e “ngaahi ongoʻi hokohoko ʻo e ʻikai loko fakamahuʻingaʻi-kita.”
Fakatatau ki he kau mataotao ʻe niʻihi, ko e ngaahi ongoʻi taʻefeʻungá ʻoku ʻasi hake ia ʻi he taimi ʻoku ʻai ai ʻe he niʻihi kehé ʻa e kakaí ke nau ongoʻi taʻemahuʻingá. Ko ha tuʻunga pehē ʻo e fakakaukaú ʻe tupulaki nai ia ʻi he taimi ʻokú te tofanga ai mo hano tafuluʻi hokohoko, fakaangaʻi lahi mo fefeka, pe ngaohikovia ki ha ʻuhinga siokita. Pe ko e hā pē ʻa e ʻuhingá, ko hono ngaahi nunuʻá ʻe lava ke hoko ia ʻo fakatupu vaivai pea aʻu ʻo fakatupu ʻauha. Naʻe maʻu ʻi ha fakatotolo fakafaitoʻo ki muí ni mai ko e faʻahinga ko ia ʻoku nau maʻu ha ngaahi ongoʻi kovi fekauʻaki mo kinautolú ʻoku nau hehema ke taʻefalala kia kinautolu tonu mo e niʻihi kehé, ʻo maumauʻi fāinoa ai ʻa e ngaahi tuʻunga vahaʻangatae mo e ngaahi tuʻunga kaumeʻa vāofí. “ʻI ha ʻuhinga,” ko e lau ia ʻa e līpooti ʻi he fakatotoló, “ʻoku nau ‘fakatupu’ ʻa e ngaahi tuʻunga tofu pē ko ia ʻoku nau manavahē lahi taha ki aí.”
Ko e kakai ʻoku nau ongoʻi peheé ko e kau faʻa maʻukovia ia ʻo e meʻa ʻoku ui ʻe he Tohi Tapú ko e ‘hohaʻa loto’ ʻanautolu pē. (Sāme 94:19) ʻOku nau ongoʻi heʻikai pē ke nau lelei feʻunga kinautolu. ʻI he taimi ka fehālaaki ai ha meʻá, te nau tafoki hake pē ʻo tukuakiʻi kinautolu. Neongo ʻe fakavīkivikiʻi nai ʻe he niʻihi kehé ʻenau ngaahi lavameʻá, loloto ʻi lotó ʻoku nau ongoʻi ʻe kinautolu ʻoku nau hangē ha taha kākā kuo pau pē ke toki fakaeʻa ia ʻamui. ʻI he tui ʻoku ʻikai ke nau tuha mo ha fiefiá, ʻoku tō ai ʻa e tokolahi ki he tōʻonga fakaʻauha-kita ʻa ia ʻoku nau ongoʻi ʻe ʻikai ala malava ke nau fakatonutonu. Ko Lena, ʻa ia naʻe lave ki ai ki muʻá, naʻá ne fakatupulekina ha mahaki-kai-tamaki koeʻuhi ko e ʻikai ha tokaʻi-kitá, pea ʻokú ne fakahā, “naʻá ku ongoʻi taʻemalava ke toe liliu ha meʻa.”
Ko e faʻahinga ko ia ʻoku nau fāinga mo e ‘hohaʻa loto’ peheé kuo pau ke nau ongoʻi pehē ʻi he toenga ʻo ʻenau moʻuí? ʻE lava ke fai ha meʻa ke tauʻiʻaki ʻa e ngaahi ongoʻi peheé? ʻOku fokotuʻu mai ʻe he Tohi Tapú ha ngaahi tefitoʻi moʻoni mo e ngaahi faleʻi ʻaonga kuó ne hanga ʻo tokoniʻi ʻa e tokolahi ke nau lavameʻa ʻi he fāinga ʻoku faí. Ko e hā ʻa e niʻihi ʻo e ngaahi tefitoʻi moʻoni ko ení, pea kuo anga-fēfē ʻenau tokoniʻi ʻa e kau faingataʻaʻia peheé ke nau maʻu ha fiefia ʻi he moʻuí? Ko e kupu hoko maí te ne fakamatalaʻi mai.