Meʻa ʻOku Tau Ako Meia Sīsū

Fekauʻaki mo e ʻAmanaki ki he Kau Maté

Naʻe fokotuʻu hake ʻe Sīsū ʻo ʻikai siʻi hifo he toko tolu, ʻo fakahaaʻi ai ʻoku ʻi ai ʻa e ʻamanaki ki he kau maté. (Luke 7:11-17; 8:49-56; Sione 11:1-45) Ke mahinoʻi ʻa e ʻamanaki ki he kau maté, kuo pau ke tau ʻuluaki mahinoʻi ʻa e kamata mo e tupuʻanga ʻo e maté.

Ko e Hā ʻOku Tau Puke Ai pea Maté?

ʻI he taimi naʻe fakamolemoleʻi ai ʻe Sīsū e angahala ʻa e kakaí, naʻa nau moʻui. Ko e fakatātaá, ʻi he taimi naʻá ne fehangahangai ai mo ha tangata mamateá, naʻe pehē ange ʻe Sīsū: “Ko e fe ʻoku faingofua; ʻa e pehe, Kuo fakamolemole hoʻo ngāhi angahala: pe ko e pehe, Tuʻu ʻo ʻeveʻeva? Ka koeʻuhi ke mou ʻilo ʻoku mafai ʻe he Fanautama ʻa Tangata ke fakamolemole angahala ʻi mamani, (pea toki hanga ia, ʻo lea ki he tangata mamatea,) Tuʻu, pea toʻo ho mohenga, pea mole ki ho ʻapi.” (Mātiu 9:2-6) Ko ia ko e angahalá ʻa e tupuʻanga ʻo e puké mo e maté. Ko hotau tuʻunga angahalaʻia tukufakaholó naʻe tupu ia mei he ʻuluaki tangatá, ʻa ʻĀtama.—Luke 3:38; Loma 5:12.

Ko e Hā Naʻe Pekia Ai ʻa Sīsuú?

Naʻe ʻikai ʻaupito faiangahala ʻa Sīsū. Ko ia ai, naʻe ʻikai te ne tuha mo e maté. ʻI heʻene pekia ʻo fetongi kitautolú, naʻe totongi ai ʻe Sīsū ʻa ʻetau ngaahi angahalá. Naʻá ne pehē ko hono taʻataʻá ʻe “lilingi koeʻuhi ko e tokolahi ke lava ai ʻa e fakamolemole angahala.”—Mātiu 26:28.

Naʻe toe pehē ʻe Sīsū: “Ko e Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Naʻe ui ʻe Sīsū ʻa e totongi naʻá ne faí ko ha ‘huhuʻi’ koeʻuhi naʻe fakatauʻatāinaʻi ai ʻa e niʻihi kehé mei he maté. Naʻe toe pehē ʻe Sīsū: “Kuo u haʻu koeʻuhi ke nau maʻu moʻui, pea ke nau maʻu ʻo lahi ʻaupito.” (Sione 10:10) Ke mahinoʻi kakato ʻa e ʻamanaki ki he kau maté, kuo pau foki ke tau toe ʻilo fekauʻaki mo honau tuʻunga lolotongá.

Ko e Hā ʻOku Hoko ʻi he Maté?

ʻI he taimi naʻe mate ai ʻa e kaumeʻa ʻo Sīsū ko Lāsalosí, naʻe fakamatalaʻi ai ʻe Sīsū ʻa e meʻa ʻoku hoko ʻi he maté. Naʻá ne pehē ki heʻene kau ākongá: “Ko siʻota kaumeʻa ko Lasalosi kuo mohe; ka ko ʻeku ʻalu ni [ki Pētaní] ke u fafangu ia. . . . ka ka mahalo ʻekinautolu ʻoku ne meʻa ki haʻane toka ʻo mohe. Ko ia naʻe hanga ai ʻa Sīsū, ʻo ne lea fakapatonu kiate kinautolu, ʻo pehe, Kuo pekia ʻa Lasalosi.” Ko ia ai, naʻe ʻai ʻe Sīsū ke mahino ko e kau maté ʻoku nau mohe ʻo ʻikai toe ʻilo ha meʻa.—Sione 11:1-14.

ʻI hono fokotuʻu hake ia ʻe Sīsuú, ne ʻosi mate ʻa hono kaumeʻa ko Lāsalosí ʻo feʻunga mo e ʻaho ʻe fā. Neongo ia, ʻoku ʻikai hiki ʻi he Tohi Tapú ha fakamatala meia Lāsalosi ʻo fekauʻaki mo ʻene hokosia lolotonga ʻa e taimi ko iá. Lolotonga ʻene maté, naʻe ʻikai ha fakakaukau ʻa Lāsalosi pea naʻe ʻikai te ne ʻiloʻi ha meʻa.—Koheleti 9:5, 10; Sione 11:17-44.

Ko e Hā e ʻAmanaki ki he Kau Maté?

ʻE toe moʻui ʻa e kau maté fakataha mo e ʻamanaki ko e moʻui taʻengata. Naʻe pehē ʻe Sīsū: “ʻOku ʻunu mai ha taimi, ʻa ia ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.”—Sione 5:28, 29.

Ko e ʻamanaki ko ení ko ha fakahāhā ia ʻo e ʻofa ʻa e ʻOtuá. Naʻe pehē ʻe Sīsū: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.”—Sione 3:16; Fakahā 21:4, 5.

Ki ha fakamatala lahi ange, sio ki he vahe 6 ʻo e tohi Ko e Hā ʻOku Akoʻi Moʻoni ʻe he Tohi Tapú?a

[Fakamatala ʻi lalo]