Ko e Hā ʻOku Tala ʻe Hoʻo Ngaahi Lotú Fekauʻaki mo Koé?
“Akoe oku ke ogoʻi ae lotu, e aʻu atu kiate koe ae kakai kotoabe.”—SĀME 65:2, PM.
1, 2. Ko e hā ʻoku lava ai ke lotu ʻi he tuipau ʻa e kau sevāniti ʻa Sihová kiate iá?
ʻOKU ʻikai ʻaupito fakaongotuli ʻa Sihova ki he ngaahi kole ʻa ʻene kau sevāniti faitōnungá. ʻOku lava ke tau tuipau ʻokú ne fanongo mai kia kitautolu. Neongo kapau ʻoku lotu ʻa e laui miliona ʻo e Kau Fakamoʻoni ʻa Sihová ki he ʻOtuá ʻi he taimi tatau, ʻoku kei malava pē ke ne fanongo mai kia kinautolu.
2 ʻI he tuipau naʻe fanongo mai ʻa e ʻOtuá ki heʻene ngaahi kolé, naʻe hiva ʻa e tokotaha-tohi-saame ko Tēvitá: “Akoe oku ke ogoʻi ae lotu, e aʻu atu kiate koe ae kakai kotoabe.” (Sāme 65:2, PM) Naʻe tali ʻa e ngaahi lotu ʻa Tēvitá koeʻuhi ko ha tokotaha lotu mateaki ia ʻa Sihova. ʻOku totonu ke tau ʻeke hifo kia kitautolu: ‘ʻOku fakahaaʻi ʻi heʻeku ngaahi huú ʻoku ou falala kia Sihova pea ko e lotu maʻá ʻoku ou tokanga muʻomuʻa ki aí? Ko e hā ʻoku tala ʻe heʻeku ngaahi lotú fekauʻaki mo aú?’
Lotu kia Sihova ʻi he Anga-Fakatōkilalo
3, 4. (a) Ko e hā ʻa e fakakaukau ʻoku totonu ke tau maʻú ʻi heʻetau lotu ki he ʻOtuá? (e) Ko e hā ʻoku totonu ke tau fai kapau ʻoku fakahohaʻasi kitautolu ʻe ha “fakakaukau hohaʻa” fekauʻaki mo ha angahala mamafa?
3 Kapau ʻoku fiemaʻu ke tali ʻetau ngaahi lotú, kuo pau ke tau lotu ki he ʻOtuá ʻi he anga-fakatōkilalo. (Sāme 138:6) ʻOku totonu ke tau kole kia Sihova ke ne sivisiviʻi kitautolu, ʻo hangē ko ia naʻe fai ʻe Tēvita ʻi heʻene pehē: “E Otua, afioʻi au, bea ke iloʻi hoku loto: ahiahiʻi [pe sivisiviʻi] au, mo ke iloʻi eku gaahi mahalo [pe fakakaukau hohaʻá]: Bea ke vakai be oku ai ha hala kovi iate au, bea ke tataki au i he hala taegata.” (Sāme 139:23, 24, PM) ʻAi ke ʻoua te tau lotu pē kae toe fakamoʻulaloa foki ki he sivi ʻoku fai ʻe he ʻOtuá mo e akonaki ʻa ʻene Folofolá. ʻOku lava ke tataki kitautolu ʻe Sihova ʻi he “hala taegata,” ʻo tokoniʻi kitautolu ke tau tuli ki ha ʻalunga ʻoku taki atu ai ki he moʻui taʻengatá.
4 Fēfē kapau ʻoku fakahohaʻasi kitautolu ʻe he “fakakaukau hohaʻa” fekauʻaki mo ha angahala mamafa? (Lau ʻa e Sāme 32:1-5.) Ko e feinga ke lōmia ha konisēnisi halaiá ʻoku lava ke ne ʻai ke mole ʻa hotau iví, ʻo hangē pē ko e mole mei ha fuʻu ʻakau ʻa e hauhaú ʻi he vela lahi ʻo e faʻahitaʻu māfaná. Koeʻuhi ko ʻene angahalá, naʻe mole ai meia Tēvita ʻa ʻene fiefiá peá ne hoko nai ai ʻo puke. Ka ko e meʻa fakafiemālie moʻoni kiate ia ʻa ʻene vete ki he ʻOtuá! Fakaʻuta atu ki he fiefia ʻa Tēvita ʻi heʻene ongoʻi “kuo fakamolemole ʻene talangataʻa,” pea kuo fakamolemoleʻi ia ʻe Sihová. Ko e vete ʻo e angahalá ki he ʻOtuá ʻoku lava ke ʻomai ai ʻa e fiemālie, pea ko e tokoni ʻa e kau mātuʻa Kalisitiané ʻe toe tokoni ia ke fakafoki mai ai ʻa e tuʻunga moʻui lelei fakalaumālie ʻa e tokotaha faihalá.—Pal. 28:13; Sem. 5:13-16.
Hūfia ki he ʻOtuá pea Fakamālō Kiate Ia
5. Ko e hā e ʻuhinga ʻo e hūfia kia Sihová?
5 Kapau ʻoku tau loto-moʻua lahi ʻi ha faʻahinga ʻuhinga, ʻoku totonu ke tau ngāueʻaki ʻa e akonaki ʻa Paulá: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi.” (Fili. 4:6) “Ke hūfia” ʻoku ʻuhinga iá “ke fai ha kōlenga anga-fakatōkilalo.” ʻOku totonu ke tau kole kia Sihova ki ha tokoni mo ha tataki tautefito ʻi he lolotonga ʻa e fakatuʻutāmakí pe fakatangá.
6, 7. Ko e hā ʻa e ngaahi ʻuhinga ʻoku totonu ke fakakau ai ʻa e fakafetaʻi ʻi heʻetau ngaahi lotú?
6 Kae kehe, kapau naʻa tau toki lotu pē ʻi he taimi naʻa tau fiemaʻu ai ha meʻá, ko e hā naʻe fakahaaʻi ai fekauʻaki mo ʻetau fakaueʻilotó? Naʻe pehē ʻe Paula ʻoku totonu ke tuku ke hā ki he ʻOtuá ʻetau ngaahi kolé “pea fai mo e fakafetaʻi.” ʻOku tau maʻu moʻoni ʻa e ʻuhinga ke fakahāhā ai ʻa e fakakaukau hangē ko e fakakaukau ʻa Tēvitá: “ʻOku oʻou, ʻEiki, ʻa e maʻolunga, mo e malohinga, mo e langilangiʻia, mo e ikuna, mo e aoniu; he ko e meʻa kotoa ʻi langi mo mamani ko hoʻo meʻa: ʻe Sihova, ʻoku oʻou ʻa e pule; pea ʻoku tuku taupeupe atu koe, ko e ʻEiki ʻo e meʻa kotoa. . . . Ko ia ai ʻoku mau fakamālō atu, ʻe homau ʻOtua, mo fakahikihikiʻi ho huafa ongoongoa.”—1 Kal. 29:11-13.
7 Naʻe fakamālō ʻa Sīsū ki he ʻOtuá ki he meʻakai pea ki he mā mo e uaine naʻe ngāueʻaki ʻi he ʻOhomohe ʻa e ʻEikí. (Mt. 15:36; Mk. 14:22, 23) Tuku kehe hono fakahāhā ʻa e houngaʻia meimei tatau, ʻoku totonu ke tau “fakafetaʻi kia Sihova” ki heʻene “ngaahi ngaue fakaofo maʻa e hakoʻi tangata,” ki heʻene “gaahi fakamāu maonioni,” pea ki heʻene folofolá, pe pōpoakí, ʻa ia ʻoku ala maʻu he taimí ni ʻi he Tohi Tapú.—Sāme 107:15; 119:62, 105, PM.
Lotu Maʻá e Niʻihi Kehé
8, 9. Ko e hā ʻoku totonu ai ke tau lotu maʻá e kaungā Kalisitiané?
8 ʻOku ʻikai ha veiveiua ʻoku tau lotu maʻatautolu, ka ʻoku totonu ke fakakau ʻi heʻetau ngaahi lotú ʻa e niʻihi kehé—naʻa mo e kau Kalisitiane ʻoku ʻikai te tau ʻiloʻi ʻa honau hingoá. Neongo naʻe ʻikai nai ʻiloʻi ʻe he ʻapositolo ko Paulá ʻa e kau tui kotoa ʻi Kolosé, naʻá ne tohi: “Oku ma fakafetai ki he Otua koe Tamai a ho tau Eiki ko Jisu Kalaisi, o hufia mau be akimoutolu, Talu e ma fanogo ki hoo mou tui kia Kalaisi Jisu, bea mo hoo mou ofa ki he kaiga maonioni kotoabe.” (Kol. 1:3, 4, PM) Naʻe toe lotu ʻa Paula maʻá e kau Kalisitiane ʻi Tesalonaiká. (2 Tes. 1:11, 12) Ko e faʻahinga lotu peheé ʻoku tala ai e meʻa lahi fekauʻaki mo kitautolu mo e anga ʻo ʻetau vakai ki hotau fanga tokoua mo e fanga tuofāfine ʻi he tuí.
9 Ko ʻetau lotu maʻá e kau Kalisitiane paní pea ki honau takanga ko e “fanga sipi kehe” ʻoku fakamoʻoniʻi ai ʻetau tokanga ki he kautaha ʻa e ʻOtuá. (Sione 10:16) Naʻe kole ʻe Paula ki he kaungālotú ke nau lotu koeʻuhi ‘ke foaki ae lea kiate ia, koeuhi ke ne fakailo atu ae mea fakalilolilo oe ogoogoleleí.’ (Ef. 6:17-20, PM) ʻOku tau lotu fakafoʻituitui ʻi he founga ko iá maʻá e kau Kalisitiane kehé?
10. Ko e lotu maʻá e niʻihi kehé ʻe kaunga fēfē nai ia kia kitautolu?
10 Ko e lotu maʻá e niʻihi kehé ʻe liliu nai ai ʻetau fakakaukau kia kinautolú. Kapau ʻoku ʻikai ke tau saiʻia tautefito ʻi ha taha ka ʻoku tau lotu maʻana, ʻe lava fēfē ke tau taʻeʻofa ki he tokotaha ko iá? (1 Sione 4:20, 21) Ko e faʻahinga lotu pehení ʻoku fakatupu langa hake pea ʻoku pouaki ai ʻa e fāʻūtaha mo hotau fanga tokouá. ʻIkai ngata aí, ko e ngaahi lotu ko iá ʻoku fakahaaʻi ai ʻoku tau maʻu ʻa e ʻofa hangē ko Kalaisí. (Sione 13:34, 35) Ko e ʻulungaanga ko iá ko e konga ia ʻo e fua ʻo e laumālie ʻo e ʻOtuá. ʻOku tau lotu tāutaha ki he laumālie māʻoniʻoní, ʻo kole kia Sihova ke ne tokoniʻi kitautolu ke tau fakahāhā ʻa hono fua ko e ʻofa, fiefia, melino, kātaki-fuoloa, anga-lelei, lelei, tui, anga-malū mo e mapuleʻi-kitá? (Luke 11:13; Kal. 5:22, 23, NW) Kapau ko ia, ko ʻetau leá mo e ngāué ʻe fakahaaʻi ai ʻoku tau ʻaʻeva mo moʻui ʻi he laumālié.—Lau ʻa e Kaletia 5:16, 25.
11. Ko e hā te ke pehē ai ʻoku totonu ke kole ki he niʻihi kehé ke nau lotu maʻatautolú?
11 Kapau ʻoku tau ʻiloʻi ʻoku ʻahiʻahiʻi ʻetau fānaú ke nau kākā ʻi he ngaahi sivi ʻi he ʻapiakó, ʻoku totonu ke tau lotu maʻanautolu pea toe ʻoange kia kinautolu ʻa e tokoni Fakatohitapu koeʻuhi ke nau ngāue faitotonu pea heʻikai ai te nau fai ha meʻa ʻoku hala. Naʻe tala ʻe Paula ki he kau Kalisitiane ʻi Kolinitoó: “ʻOku mau hu ki he ʻOtua ke ʻoua ʻaupito te mou fai ha kovi.” (2 Kol. 13:7) Ko e ngaahi lotu pehē ʻi he anga-fakatōkilaló ʻoku fakahōifuaʻi ai ʻa Sihova pea ʻoku tala ai ʻa e meʻa lelei fekauʻaki mo kitautolu. (Lau ʻa e Palovepi 15:8.) ʻOku lava ke tau kole ki he niʻihi kehé ke nau lotu maʻatautolu, ʻo hangē pē ko ia naʻe fai ʻe he ʻapositolo ko Paulá. “Hokohoko atu ʻa e lotu maʻamautolú,” ko ʻene tohí ia, “he ʻoku mau fakaʻamu ke mau tōʻonga faitotonu ʻi he meʻa kotoa pē.”—Hep. 13:18, NW.
Tala ʻi Heʻetau Lotú ʻa e Toe Meʻa Lahi Ange
12. Ko e hā ʻoku totonu ke hoko ko e tafaʻaki mahuʻinga ia ʻo ʻetau lotú?
12 ʻOku tala ʻi heʻetau lotú ko e Kau Fakamoʻoni fiefia mo faivelenga kitautolu ʻa Sihova? ʻOku fakahanga tefito ʻetau ngaahi hūfiá ki he meʻa ʻoku fehoanaki mo e finangalo ʻo e ʻOtuá, ko hono malangaʻi ʻa e pōpoaki ʻo e Puleʻangá, ko e fakatonuhiaʻi ʻo e tuʻunga-hau ʻo Sihová, mo e fakamāʻoniʻoniʻi ʻa hono huafá? ʻOku totonu ke hoko ko e tafaʻaki mahuʻinga eni ʻo ʻetau lotú, hangē ko ia naʻe fakahaaʻi ʻi he lotu ʻa e ʻEikí, ʻa ia ʻoku kamataʻaki ʻa e ngaahi lea: “Ko ʻemau Tamai ʻoku ʻi hēvani, tuku ke fakamāʻoniʻoniʻi ho huafá. Tuku ke hoko mai ho puleʻangá. Tuku ke fai ho finangaló, ʻo hangē ko ia ʻi hēvaní, ke pehē foki ʻi māmani.”—Mt. 6:9, 10, NW.
13, 14. ʻOku fakahaaʻi ʻe heʻetau lotú ʻa e hā fekauʻaki mo kitautolu?
13 Ko ʻetau lotu ki he ʻOtuá ʻoku fakahaaʻi ai ʻetau fakaueʻilotó, meʻa ʻoku tau mahuʻingaʻia aí, mo e holí. ʻOku ʻafioʻi ʻe Sihova ʻa e tuʻunga ʻoku ʻi ai hotau lotó. ʻOku pehē ʻe he Palovepi 17:3: “Ko e kulo maʻae siliva, pea ko e fonise maʻae koula, ka ko e sivi loto ko Sihova ia.” ʻOku ʻafioʻi ʻe he ʻOtuá ʻa e meʻa ʻoku ʻi hotau lotó. (1 Sam. 16:7) ʻOkú ne ʻafioʻi ʻa e anga ʻo ʻetau ongoʻi fekauʻaki mo ʻetau ngaahi fakatahá, ko ʻetau ngāue fakafaifekaú mo hotau fanga tokoua mo e fanga tuofāfine fakalaumālié. ʻOku lāuʻilo ʻa Sihova ki he anga ʻo ʻetau fakakaukau ki he “ngāhi tokoua” ʻo Kalaisí. (Mt. 25:40) ʻOkú ne ʻafioʻi ʻa e meʻa ʻoku tau holi moʻoni ki aí ko e meʻa ʻoku tau lotu ki aí pe ko ʻetau toe leaʻaki pē ʻe kitautolu ia ha ngaahi foʻi lea papau. “ʻI hono fai ha lotú,” ko e lea ia ʻa Sīsuú, “ʻoua ʻe toutou leaʻaki ʻa e ngaahi meʻa tatau, ʻo hangē tofu pē ko ia ʻoku fai ʻe he kakai ʻo e ngaahi puleʻangá, he ʻoku nau mahalo [hala] ʻe fai mai ha fanongo kiate kinautolu ʻi heʻenau ngāueʻaki ʻa e ngaahi lea lahí.”—Mt. 6:7, NW.
14 Ko ʻetau ngaahi kupuʻi lotú ʻoku toe fakahaaʻi ai ʻa e lahi ʻo ʻetau falala ki he ʻOtuá. “Ko hoku hufanga ko e [Sihova] he taimi kuo hili,” ko e lea ia ʻa Tēvitá, “ko e taua malohi he ʻao ʻo e fili. Kau ʻaunofo ki ho tapanekale ʻo lauikuonga: Kau ʻaunofo ki he toitoiʻanga ho kapakau na.” (Sāme 61:3, 4) ʻI he taimi ʻe ‘folahi ai hono tapanekalé ʻiate kitautolu’ ʻi he tuʻunga fakaefakatātā ʻe he ʻOtuá, te tau maʻu ai ʻa e malu mo ʻene tokanga fakaemaluʻí. (Fkh. 7:15) He fakafiemālie moʻoni ke ʻunuʻunu ofi kia Sihova ʻi he lotu fakataha mo e tuipau ʻokú ne ‘kau maʻatautolu’ lolotonga ha ʻahiʻahiʻi pē ʻo ʻetau tuí!—Lau ʻa e Sāme 118:5-9.
15, 16. ʻE lava ke tokoniʻi kitautolu ʻe he lotú ke tau ʻiloʻi ʻa e hā fekauʻaki mo ʻetau holi ke kakapa atu ki he monū ʻo e ngāué?
15 Ko e lotu faitotonu kia Sihova ʻo fekauʻaki mo ʻetau fakaueʻilotó ʻe lava ke tokoniʻi ai kitautolu ke ʻiloʻi ʻa e moʻoni fekauʻaki mo iá. Hangē ko ení, ko e vēkeveke ke ngāue ʻi ha tuʻunga tauhi ʻi he lotolotonga ʻo e kakai ʻa e ʻOtuá ko ha holi anga-fakatōkilalo moʻoni ia ke tokoni pea ke fai ʻa e meʻa lahi taha te tau malavá ke laka ai ki muʻa ʻa e ngaahi meʻa ʻo e Puleʻangá? Pe ʻe lava ke pehē ʻoku tau loto ke “lahi hake” pe naʻa mo e fakaʻamu ke “puleʻi” ʻa e niʻihi kehé? ʻOku ʻikai totonu ke pehē ʻa e ngaahi meʻá ʻi he lotolotonga ʻo e kakai ʻa Sihová. (Lau ʻa e 3 Sione 9, 10, PM; Luke 22:24-27.) Kapau ʻoku tau maʻu ʻa e ngaahi holi fehālaaki, ko e faitotonu ʻi he lotu ki he ʻOtua ko Sihová ʻoku lava ke fakaeʻa ai ia pea tokoniʻi ai kitautolu ke tau liliu ki muʻa ke hoko ʻo faiaka mālohi ia ʻia kitautolu.
16 Ko e ngaahi uaifi Kalisitiané ʻoku nau maʻu nai ha holi vēkeveke ke ngāue honau husepānití ko e kau sevāniti fakafaifekau pea aʻu nai ʻo hoko ko e kau ʻovasia, pe ko e kau mātuʻa. ʻE lava ke ngāue ʻa e fanga tuofāfiné ni fakataha mo e ongoʻi ʻoku nau fakahāhaá ʻi heʻenau ngaahi lotú ʻaki ʻenau feinga mālohi ke ʻai honau ʻulungaangá ke ʻi ha tuʻunga alafaʻifaʻitakiʻanga. ʻOku mahuʻinga eni, he ko e lea mo e ʻulungaanga ʻo ha fāmili ʻo ha tangata ʻoku ʻi ai hono kaunga ki he anga ʻo e vakai kiate ia ʻa e fakatahaʻangá.
Fakafofongaʻi ʻo e Niʻihi Kehé ʻi he Lotu Fakahāhā
17. Ko e hā ʻoku lelei ai ʻa e mavahé ʻi he taimi ʻoku tau lotu fakaekitautolu aí?
17 Naʻe faʻa mavahe ʻa Sīsū mei he fuʻu kakaí koeʻuhi ke lotu ai ʻiate ia pē ki heʻene Tamaí. (Mt. 14:13; Luke 5:16; 6:12) ʻOku tau maʻu ʻa e fiemaʻu tatau ke ʻi ha tuʻunga mavahe. ʻI he lotu fiemālie ʻi he ngaahi tuʻunga nongá, ʻoku ngalingali te tau fai ai ʻa e ngaahi fili ʻoku fakahōifuaʻi ai ʻa Sihova pea tau ʻi he tuʻunga lelei fakalaumālie ai. Kae kehe, naʻe toe lotu fakahāhā ʻa Sīsū, pea ʻoku lelei ke fakakaukau ki he founga ʻe lava ke fai ai eni ʻi ha founga totonu.
18. Ko e hā ʻa e ngaahi meʻa ʻoku totonu ke manatuʻi ʻe he fanga tokouá ʻi hono fakafofongaʻi ha fakatahaʻanga ʻi he lotu fakahāhaá?
18 ʻI heʻetau ngaahi fakatahá, ʻoku fakafofongaʻi ai ʻe he kau tangata mateaki ʻa e fakatahaʻangá ʻi he lotu fakahāhā. (1 Tim. 2:8) ʻOku totonu ke malava ʻo lea “ʻēmeni,” ʻa e kaungātuí, ʻa ia ʻoku ʻuhingá ko e “ʻofa ke pehē,” ʻi he ngataʻanga ʻo e lotu ko iá. Kae kehe, ke fai peheé, kuo pau ke nau loto-tatau mo e meʻa naʻe leaʻakí. ʻOku ʻikai ha meʻa ʻe fakaʻohovale pe taʻefakapotopoto fekauʻaki mo e lotu ʻa e ʻEikí. (Luke 11:2-4) ʻIkai ko ia pē, naʻe ʻikai lave fakaikiiki ʻa Sīsū ki he ngaahi fiemaʻu pe palopalema kotoa ʻa e tokotaha taki taha ʻi heʻene kau fanongó. Ko e hohaʻa fakafoʻituituí ko ha kaveinga feʻungamālie ia ki he lotu fakafoʻituituí, ʻo ʻikai ko e lotu fakahāhaá. Pea ʻi hono fakafofongaʻi ha kulupu ʻi he lotú, ʻoku totonu ke tau fakaʻehiʻehi mei hono fakakau ai ʻa e ngaahi meʻa fakapulipulí.
19. ʻOku totonu ke fēfē ʻetau tōʻongá lolotonga ʻa e lotu fakahāhaá?
19 ʻI he taimi ʻoku fakafofongaʻi ai kitautolu ʻi he lotu fakahāhaá, ʻoku fiemaʻu ke tau fakahaaʻi ʻa e “manavahe ki he ʻOtua” ʻi he ʻapasia. (1 Pita 2:17) ʻOku ʻi ai nai ha taimi mo e feituʻu totonu ki ha ngaahi tōʻonga ʻa ia ʻe ʻikai feʻungamālie ia ʻi ha fakataha faka-Kalisitiane. (Koh. 3:1) Hangē ko ení, ʻe feinga nai ha taha ke ʻai ʻa e tokotaha kotoa ʻi ha kulupu ke nau fepiki uma pe fetakinima lolotonga ha lotu pehē. ʻE ʻai nai ʻe he meʻá ni ke faingataʻaʻia pe fakaleluʻi ai ha niʻihi, ʻo kau ai ʻa e kau ʻaʻahi ʻa ia ʻoku ʻikai te nau kau ʻi heʻetau tuí. ʻE piki nima fakapotopoto nai ha ngaahi hoa mali, ka ʻo kapau naʻa nau fefāʻofuaʻaki lolotonga ʻa e lotu fakahāhaá, ko e faʻahinga ko ia ʻoku nau hila mai ki he tōʻonga peheé ʻe lava nai ke nau tūkia ai. Te nau fakakaukau nai pe pehē loto naʻe tokangataha ʻa e ongo meʻá ia ki hona vā feʻofaʻakí kae ʻikai ke ʻapasia kia Sihova. Ko ia ai, ʻi he ʻapasia loloto kiate iá, tau “fai kotoa pe ke ongoongolelei ai ʻa e ʻOtua” pea fakaʻehiʻehi mei he tōʻonga ʻe lava ke fakaleluʻi, fakaʻohovaleʻi, pe fakatūkiaʻi ai ha taha pē.—1 Kol. 10:31, 32; 2 Kol. 6:3.
Ko e Hā ke Lotu ki Aí?
20. ʻE fēfē haʻo fakamatalaʻi ʻa e Loma 8:26, 27?
20 ʻI he taimi ʻe niʻihi, ʻoku ʻikai nai ke tau ʻiloʻi ʻa e meʻa ke leaʻaki ʻi heʻetau lotu fakafoʻituituí. “ʻOku ʻikai te ta ʻilo pe ko e ha te ta lotua ke hoa mo ʻetā faingataʻa,” ko e tohi ia ʻa Paulá “ka ko e Laumalie [māʻoniʻoní] ʻoku ne hufekina ʻe ia ʻa kitaua, ʻaki ʻa e ngaahi toʻe ʻoku ʻikai faʻa fakamatala. Ka ko ia [ʻOtuá] ʻoku ne hakule ʻa e loto, ʻoku ne meaʻi ʻa e meʻa ʻoku feinga ki ai ʻa e Laumalie.” (Loma 8:26, 27) Naʻe ʻai ʻe Sihova ke lava ʻo hiki ʻa e lotu lahi ʻi he Tohi Tapú. ʻOkú ne tali ʻa e ngaahi kole fakamānavaʻi ko ení ʻo hangē pē ko haʻatau kolé pea ʻokú ne fakahoko ia. ʻOku ʻafioʻi kitautolu ʻe he ʻOtuá mo e ʻuhinga ʻo e ngaahi meʻa naʻá ne ʻai ke leaʻaki ʻe hono laumālié fakafou ʻi he kau hiki Tohi Tapú. ʻOku tali ʻe Sihova ʻetau lotú ʻi he taimi ʻoku “hufekina” ai pe fakalaloa maʻatautolu ʻa e laumālié. Ka ʻi heʻetau maheni lelei ange mo e Folofola ʻa e ʻOtuá, ʻoku lava ke haʻungofua ai ki hotau ʻatamaí ʻa e meʻa ʻoku totonu ke tau lotu ki aí.
21. Ko e hā te tau sivisiviʻi ʻi he kupu hoko maí?
21 Hangē ko ia kuo tau akó, ʻoku tala ʻe heʻetau lotú ʻa e meʻa lahi ʻo fekauʻaki mo kitautolu. Hangē ko ení, ʻoku fakahaaʻi nai ai ʻa e ofi ʻo ʻetau ʻunuʻunu kia Sihová mo e lelei ʻo ʻetau ʻiloʻi ʻa ʻene Folofolá. (Sem. 4:8) ʻI he kupu hoko maí, te tau sivisiviʻi ai ʻa e ngaahi lotu mo e ngaahi kupuʻi lotu ʻe niʻihi naʻe hiki ʻi he Tohi Tapú. Ko e hā ʻa e ola ʻo ha sivisiviʻi pehē ʻo e Tohi Tapú ʻoku ngalingali ʻe hoko ki heʻetau fakaofiofi ʻi he lotu ki he ʻOtuá?
ʻE Fēfē Haʻo Tali?
• Ko e hā ʻa e fakakaukau ʻoku totonu ke tau fakaofiofi ʻaki kia Sihova ʻi he lotú?
• Ko e hā ʻoku totonu ai ke tau lotu maʻá e kaungātuí?
• Ko e hā nai ʻe fakahaaʻi ʻe heʻetau lotú fekauʻaki mo kitautolu pea mo ʻetau fakaueʻilotó?
• ʻOku totonu ke fēfē ʻetau tōʻongá lolotonga ʻa e lotu fakahāhaá?
[Fakatātā ʻi he peesi 4]
ʻOkú ke fakahīkihikiʻi mo fakamālō maʻu pē kia Sihova?
[Fakatātā ʻi he peesi 6]
Ko ʻetau tōʻonga he lolotonga ʻa e lotu fakahāhaá ʻoku totonu ke fakalāngilangiʻi maʻu pē ai ʻa Sihova