Femoʻuekina mo Fiefia ʻi he Ngāue ʻa e ʻOtuá

ʻOKU loto ʻa Sihova ke ke fiefia. (Sāme 100:2) ʻI he hoko ko e taha ʻo ʻene kau sevānití, ngalingali ʻokú ke femoʻuekina mo koe foki. Mahalo pē naʻe ʻikai te ke femoʻuekina peheni ʻi he taimi naʻá ke fakatapui ai ʻa hoʻo moʻuí ki he ʻOtuá, ka ʻi he taimi ní ʻe fakatupunga nai ʻe he ngaahi fatongia fakamāmaní mo fakalaumālié ke ke ongoʻi mafasia. ʻE aʻu nai ʻo ke ongoʻi halaia ʻi he ʻikai lava ke ke fakahoko kotoa ʻa e meʻa naʻá ke loto ke faí. ʻE lava fēfē ke ke maʻu ʻa e mafamafatataú pea tauhi maʻu ʻa e “fiefia a Jihova”?—Nehe. 8:10, PM.

ʻOkú ke moʻui ʻi he taimi faingataʻa pea ʻoku uesia koe ʻe he tenge lahi, ko ia ʻoku fiemaʻu ai ke ke fokotuʻutuʻu maau lelei. ʻI he meʻá ni, ʻoku kaungatonu tefito ai ʻa e akonaki fakamānavaʻi ʻa e ʻapositolo ko Paulá: “Ko ia, mou tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto: mo mou lamalama [pe fakatau mai ʻa e taimi] ke ngaueʻaki ʻa e faingamalie, koeʻuhi ʻoku kovi ʻa e ngaahi ʻaho.”—Ef. 5:15, 16.

ʻI he fakakaukau ki he akonaki fakapotopoto ko iá, ʻe lava fēfē ke ke fokotuʻu ha ngaahi taumuʻa moʻoni maʻau pea ʻai ke mafamafatatau ʻa e ako fakafoʻituituí, tokangaʻi ʻo e fāmilí, ngāue fakamalangá, ngāue fakamāmaní mo e ngaahi ngāue kehe ʻoku fiemaʻú?

ʻOkú ke manatuʻi ʻa e fiefia naʻá ke aʻusia ʻi he taimi naʻá ke fakatapui ai koe ki he ʻOtuá pea papitaisó? ʻOku haʻu ʻa e fiefiá mei he ʻilo fekauʻaki mo Sihova pea mo ʻene ngaahi taumuʻá. Naʻe fiemaʻu nai ʻa e ngaahi māhina ʻo e ako tōtōivi ke maʻu ai ʻa e mahino mo e fiefia ko iá. Ka naʻe tuha moʻoni ia mo e feinga. Ko e ako ko iá naʻá ne liliu ke lelei ange ai ʻa hoʻo moʻuí.

Ke tauhi maʻu ʻa hoʻo fiefiá, ʻoku fiemaʻu ke ke hanganaki kai fakalaumālie. Kapau ʻokú ke fāinga ke maʻu ʻa e taimi ke lau ai mo ako ʻa e Tohi Tapú, sivisiviʻi ʻa hoʻo taimi-tēpilé. Naʻa mo ha ngaahi miniti siʻi ʻo e ako mo e fakalaulauloto ʻi ha ʻahó ʻe ʻai ai koe ke ke ofi ange kia Sihova, pea ʻe tokoni moʻoni ia ki hoʻo fiefiá.

Ko e tokolahi taha ʻo e kau sevāniti ʻa e ʻOtuá ʻe lava ke nau fakatau mai ha taimi ki he ngaahi ngāue mātuʻaki mahuʻingá mei he taimi ʻoku fakamoleki ʻi he ngaahi meʻa ʻoku ʻikai loko mahuʻingá. ʻEke hifo kiate koe, ‘Ko e hā e lahi ʻo e taimi ʻoku ou fakamoleki ʻi he lau ʻa e ngaahi makasini pe nusipepa fakamāmaní, sio TV, fanongo fasí, pe tuli ki ha meʻa ʻokú te manako ai?’ Ko e ngaahi meʻa ko iá ʻe lava ke fakafiefia ka ʻi hono tauhi pē ke mafamafatatau. (1 Tim. 4:8) Kapau ʻokú ke ʻiloʻi ko ha palopalema kiate koe ʻa e anga ʻo hoʻo ngāueʻaki ho taimí, fou ʻi ha ngaahi sitepu ke feʻunuʻaki ai ʻa hoʻo taimi-tēpilé.

Ko Adam, ko ha husepāniti, tamai ʻa ha toko tolu, pea ko ha mātuʻa, ʻokú ne fakamatala ki he meʻa ʻokú ne tokoniʻi iá: “ʻOku ou feinga mālohi ke maʻu ha moʻui faingofua. ʻOku ou fakaʻehiʻehi mei he ngaahi vaʻinga fakamole taimí mo e ngaahi koloa ʻe fiemaʻu ke tokangaʻi lahí. ʻOku ʻikai pehē ia ʻoku ou moʻui fakaʻikaiʻi-kita—ʻoku ou fiefia pē au ʻi he fakafiefia feʻungá.”

Ko e fakalaulauloto ki he ngaahi ola lelei ʻo hoʻo filí ʻe lava ke fakafoʻou ai ʻa hoʻo fiefiá pea tokoniʻi ai koe ke ke tauhi maʻu ha fakakaukau pau. Ko e fakatātaá, ko Mariusz, ko ha mātuʻa ia ʻoku ʻi ai ʻene fānau ʻe toko tolu, ʻokú ne pehē: “ʻI he taimi naʻá ku kamata ako ai ʻa e Tohi Tapú, naʻá ku hoko ai ko ha tokotaha fakatuʻamelie. ʻI he taimi ki he taimi, ʻoku ou kei fehangahangai pē mo e ngaahi faingataʻá, ko e lahi aí ko Sihova pē taha ʻokú ne ʻafioʻí. Kae mālō mo ʻene poupoú, ʻoku ou hanga atu ai ki he kahaʻú mo e fiefia.”

Hangē ko e tuʻunga ʻo Mariusz, ko ha fakakaukau pau heʻikai ke toʻo ʻosi ai ʻa e ongoʻi loto-moʻua kotoa pē. Ka ʻe lava ke ne tokoniʻi koe ke ke ongoʻi lelei ange pea ke fekuki ola lelei ange ai mo e ngaahi palopalema ʻi he moʻuí. ʻOku tau lau: “Oku kovi ae aho kotoabe onautolu oku mamahi ka oku fai katoaga mau ai be ia aia oku loto fiemalie.” (Pal. 15:15, PM) Fakakaukauloto foki ki he ʻofa ʻa e ʻOtuá kuo ʻosi fakahaaʻi kiate koé. Ko e fakalaulauloto peheé ʻe lava ke fakatupulekina ai hoʻo ʻofa kiate iá pea fakalahi ai ʻa hoʻo fiefia fakaʻotuá.—Mt. 22:37.

Ko hono fakamuʻomuʻa ʻo Sihova mo ʻene ngaahi meʻá ʻi he moʻuí ʻoku fakalahi ai ʻa e fiefia ʻa ha fāmili. Ko hono fakahāhā ʻa e ngaahi ʻulungaanga faka-Kalisitiané ʻoku fakasiʻisiʻi ai ʻa e fetēlení pea iku ai ki he feangaingaʻaki vāofi ange mo lelei ange ʻi he fāmilí. Ko ia ai, ʻe hoko ʻa ho ʻapí ko ha taulangaū moʻoni ʻo e melino mo e fāʻūtaha ki he fāmilí fakakātoa.—Sāme 133:1.

Ko e kau ʻi he ngaahi ngāue fakalaumālié ʻi he tuʻunga ko ha fāmilí ʻoku fakalahi ai ʻa e fiefia moʻoní. Ko Mariusz ʻokú ne fakamatala: “ʻOku ou fakamahuʻingaʻi ʻa e taimi ʻoku mau fakamoleki ʻi he tuʻunga ko ha fāmilí. Ko hoku uaifí ʻoku poupou lahi mai. ʻI heʻene ala lavá, ʻokú ne ʻi hoku tafaʻakí ʻo tatau ai pē pe ʻoku ou ʻi he ngāue fakamalangá pe fakamaʻa ʻa e sitētiumé ki muʻa ʻi he ngaahi fakataha-lahí, pea ʻokú ne ʻalu fakataha mo au ʻi heʻeku fakahoko ʻa e malanga maʻá e kakaí ʻi he ngaahi fakatahaʻanga kehé. ʻOku hoko eni ko e fakalototoʻa kiate au.”

ʻOku fekauʻi ʻe he Tohi Tapú ʻa e kau Kalisitiané ke nau tokonaki maʻá e ngaahi fiemaʻu fakamatelie ʻa honau fāmilí. (1 Tim. 5:8) Ka ʻo kapau ʻoku fakamoleki ʻi he ngāue fakamāmaní ʻa e fuʻu taimi mo e ivi lahi, ʻe lava ke ne kaihaʻasi ʻa hoʻo fiefia ʻi he ngāue ʻa e ʻOtuá. Lotu kia Sihova fekauʻaki mo e meʻá ni. (Sāme 55:22) Kuo fakaʻosiʻaki ʻe he niʻihi ko hono fakamuʻomuʻa ʻa e Puleʻanga ʻo e ʻOtuá ʻoku ʻuhinga iá ko e kumi ki ha ngāue kehe. ʻOku ʻikai totonu ke fakaʻatā ʻe ha Kalisitiane ʻa e ngaahi ʻaonga fakapaʻanga ʻo ha ngāue ʻoku kounaʻi ai ʻa hono taimí ke fakakuihi ai ia ki he ngaahi meʻa fakalaumālie mahuʻinga angé.—Pal. 22:3.

Te ke ʻiloʻi nai ʻoku ʻaonga ke tohiʻi ʻa e tuʻunga ʻaonga mo ʻikai ʻaonga ʻo ha ngāue ʻoku ala maʻu pe ko ha ngāue lolotonga. Ko hono moʻoní, ko e ngāue vāhenga lelei mo fakafiemālié ʻoku taau ke maʻu. Neongo ia, ʻoku tokoniʻi koe ʻe hoʻo ngāue lolotongá ke pouaki ʻa e tuʻunga lelei fakalaumālie ʻa ho fāmilí? Fakakaukau fakalelei ki he ngaahi meʻa tefitó kotoa, pea fai ha ngaahi fili ʻe ʻai ai ke muʻomuʻa ʻa ho vahaʻangatae mo Sihová.

Kapau ko hoʻo ngāue lolotongá ʻoku ʻikai tokoni ia ki hoʻo tupu fakalaumālié, ʻoku fiemaʻu ke ke fengaʻunuʻaki ho tuʻungá. Kuo fai ʻe he kau Kalisitiane tokolahi ʻa e ngaahi liliu lahi koeʻuhi ke maʻu ai ʻa e taimi ki he ngaahi meʻa fakalaumālié. ʻOku fakamatala ha tokoua ʻi Pōlani: “Ne ʻi ai e taimi naʻe ʻikai ai ke toe ʻi ai haʻaku fili ka ke mavahe mei he kautaha naʻá ku ngāue ki aí koeʻuhi naʻá ku faʻa mavahe ʻi ha ngaahi folau fakapisinisi. Naʻe ʻikai te u maʻu ha taimi feʻunga ke tokangaʻi lelei ai ʻa e ngaahi meʻa fakalaumālié pe ko hoku fāmilí.” ʻOku maʻu ʻene moʻuí he taimí ni ʻi ha ngāue ʻoku fiemaʻu ki ai ʻa e taimi mo e ivi siʻisiʻi mamaʻo ange.

Maʻu ʻa e Fiefia ʻi he Tokoniʻi ʻa e Niʻihi Kehé

Naʻe pehē ʻe Sīsū “ʻoku te monuʻia [pe fiefia] lahi ʻi he fai ha foaki atu, ʻi heʻete maʻu ha foaki mai.” (Ng. 20:35) ʻOku maʻu ʻe he kau Kalisitiané ʻa e faingamālie lahi ki he foaki peheé. ʻI he taimi ʻe niʻihi, ko ha malimali loto-māfana, lulululu, pe ko ha lea fakamālō loto-moʻoni ki he ngāue mālohi ʻa ha taha ʻi ha konga fakateokalati ʻa e meʻa pē nai ʻoku fiemaʻu ke ʻai ai ke mo fakatou fiefiá.

Naʻe fakalototoʻaʻi ʻe he ʻapositolo ko Paulá ʻa e kaungā Kalisitiané: “Fakafiemalie ki he kau loto foi, boubou ae vaivai.” (1 Tes. 5:14, PM) ʻE ongoʻi nai ʻe he faʻahinga ʻoku loto-foʻí ʻoku ʻikai malava ke nau fekuki mo e ngaahi palopalemá ʻi he ivi pē ʻonautolú. ʻE lava ke ke fai ha tokoni ki he faʻahinga peheé? Kapau ʻokú ke sio ʻoku mole mei ha taha ʻo ho fanga tokouá ʻa ʻene fiefia ʻi he ngāue ʻa Sihová, feinga ke fakalototoʻaʻi ia. Ko e fai peheé ʻe fakalototoʻaʻi ai mo koe foki. Ko e ngaahi palopalema ʻe niʻihi ʻoku ʻikai lava ke fakaleleiʻi ia ʻe ha tangata. Kae kehe, ʻe lava ke ke manavaʻofa loto-moʻoni kiate ia pea ʻe lava ke ke fakaʻaiʻai ho tokouá ke falala ki he poupou lavameʻa ʻa Sihová. Ko e faʻahinga ʻoku nau fai iá heʻikai ʻaupito siva ʻenau ʻamanakí.—Sāme 27:10; Ai. 59:1.

Ko ha toe sitepu ʻaonga ʻe taha ko hono fakaafeʻi ʻa e tokotaha ʻoku hā ngali mole ʻene fiefiá ke mo ō ʻi he ngāue fakafaifekaú. ʻI hono fekauʻi atu ʻe Sīsū ʻa e kau ākonga ʻe toko 70, naʻá ne vaheʻi “tautau toko ua” kinautolu. (Luke 10:1) ʻIkai ʻokú ke tui ʻokú ne tokonaki mai ha founga ke fefakalototoʻaʻaki ai? ʻE lava ke ke ngāueʻaki ʻa e sīpinga ko iá ke tokoniʻi ha niʻihi ke nau toe maʻu he ʻahó ni ʻa e fiefiá?

ʻOku fonu fakahohaʻa moʻoni ʻa e moʻuí. Neongo ia, ʻoku naʻinaʻi mai ʻa Paula: “Mou fiefia ʻi he ʻEiki maʻu ai pe: ʻio, kau toe ʻai atu, Mou fiefia.” (Fili. 4:4) Koeʻuhi ko hoʻo ʻofa ki he ʻOtuá, talangofua kiate ia, pea kītaki faivelenga ʻi he ngāue kuó ne ʻoatu ke ke faí, ʻoku ʻi ai e taumuʻa ʻa hoʻo moʻuí. ʻOku ʻoatu ai kiate koe ʻa e fiefia. Ko e toe meʻa ʻoku mahulu angé, ʻoku tokoniʻi koe ʻe Sihova ke ke fekuki mo e ngaahi tenge mo e palopalema ʻokú ke fehangahangai mo iá.—Loma 2:6, 7.

ʻI he mata ʻo e tuí, ʻoku tau ʻiloʻi ai ʻa ʻetau ofi ki he māmani foʻou ʻa Sihova naʻe talaʻofá. He tāpuaki lahi ē mo e ʻuhinga ki he fiefia ʻe hoko maí! (Sāme 37:34) Ko ia ʻe lava ai ke tau fiefia moʻoni, ʻo ʻikai mole ʻetau vakai ki he lahi ʻo e tāpuaki ʻa Sihová naʻa mo e ʻi he taimí ni. Ko ia ʻe lava ai ke tau “tauhi ʻa Sihova ʻaki ʻa e fiefia.”—Sāme 100:2.

[Taiakalami ʻi he peesi 8]

(Ki he fakamatala kuo fokotuʻú, sio ki he tohi)

ʻE fiemaʻu nai ke ke feʻunuʻaki ʻa e anga hoʻo vaheʻi ʻa ho taimí kapau ʻoku fiemaʻu ke ke fiefia ai pē

SIPOTI mo e FAKAFIEFIA

ʻAPI mo e TOKANGAʻI E FĀMILI

NGĀUE

FAKATAHA FAKA-KALISITIANE

AKO FAKAFOʻITUITUI

NGĀUE FAKAFAIFEKAU

[Fakatātā ʻi he peesi 10]

ʻOkú ke ʻi ha tuʻunga ke tokoniʻi ʻa e niʻihi kehé ke toe maʻu ʻenau fiefiá?