Sīsū Kalaisi​—Lahi ʻo ʻEne Pōpoakí

“Ko e moʻoni ko e fakamoʻoni tuʻuloa taha ki he tangata poto mei Kāpaneumé ko e hokohoko atu ko ia ʻa ʻene maʻu ʻa e lotó mo e ʻatamaí ʻi heʻene anga-maluú.”a—FAʻU-TOHI KO GREGG EASTERBROOK.

ʻOKU ʻi ai e mālohi ʻo e leá. Ko e ngaahi foʻi lea poto kuo filifili leleí ʻoku lava ke ne ueʻi ʻa e lotó, langaʻi ʻa e ʻamanakí, pea liliu ʻa e moʻuí. Kuo ʻikai ʻaupito ha tangata ʻe mālohi ange ʻene leá ʻia Sīsū Kalaisi. Ko e toko taha naʻe fanongo ʻi hono fai ʻe Sīsū ʻa e Malanga ʻi he Moʻungá ʻa ia ʻoku ʻiloa he taimi ní, naʻá ne tohi ki mui: “ʻI he ʻosi leva ko eni ʻa hono fai ʻe Sīsū ʻa e ngaahi leá ni, ko e olá naʻe fakatumutumu ʻa e fuʻu kakaí ʻi heʻene founga faiakó.”—Mātiu 7:28, NW.

ʻI he aʻu mai ki he ʻaho ní, ko e lahi ʻo e ngaahi lea ʻa Sīsuú ʻoku maheni ia mo e kakai ʻi he kotoa ʻo e māmaní. Vakai angé ki ha fakatātā ʻe niʻihi ʻo e ngaahi lea mohu ʻuhingá.

“ʻOku ʻikai te mou lava ke ʻeikiʻaki ʻa e ʻOtua mo Koloa fakatouʻosi.”—Mātiu 6:24.

“Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.”—Mātiu 7:12.

“Peʻi ʻange kia Sisa ʻa e ngāhi meʻa ʻa Sisa; pea ki he ʻOtua ʻa e ngāhi meʻa ʻa e ʻOtua.”—Mātiu 22:21.

“ʻOku te monuʻia lahi ʻi he fai ha foaki atu, ʻi heʻete maʻu ha foaki mai.”—Ngāue 20:35.

Ka naʻe fai ʻe Sīsū ʻa e meʻa lahi ange ʻi hono leaʻaki pē ʻa e ngaahi lea ʻoku taau ke manatuá. Ko e pōpoaki naʻá ne malangaʻí naʻe ʻi ai hono mālohi koeʻuhi naʻe fakahaaʻi ai ʻa e moʻoni fekauʻaki mo e ʻOtuá, akoʻi ʻa e kakaí ki he founga ke maʻu ai ʻa e ʻuhinga moʻoni ʻi he moʻuí, pea fakahaaʻi mahino ʻa e fakaleleiʻanga ki he faingataʻaʻia kotoa ʻa e tangatá—ko e Puleʻanga ʻo e ʻOtuá. ʻI heʻetau sivisiviʻi ʻa e pōpoaki ko ení ʻi he ngaahi peesi hokó, te tau sio ai ki he ʻuhinga ʻoku hokohoko atu ai hono maʻu ʻe Sīsū “ʻa e lotó mo e ʻatamaí ʻi heʻene anga-maluú.”

[Fakamatala ʻi lalo]