Fakafeʻiloaki ʻo e Pulusinga Faka-Pilitānia Faingofua

ʻOKU mau fiefia ke fanongonongo atu ko ha vahaʻa taimi ʻahiʻahi ko e taʻu ʻe taha, ʻo kamata ʻi he ʻīsiu ko eni ʻo e pulusinga ako ʻo e Taua Leʻo, te mau pulusi taimi taha ʻi he māhina taki taha ha pulusinga faka-Pilitānia faingofua. ʻE ʻi ai ʻa e ngaahi kupu ako, pea ka kei ʻatā, ʻe ʻi ai mo e ngaahi kupu iiki kuo filifili. ʻOku mau tui ʻe hanga ʻe he meʻá ni ʻo fakalato ʻa e fiemaʻu fakalaumālie mātuʻaki mahuʻinga ʻa e tokolahi ʻo e Kau Fakamoʻoni ʻa Sihová. Ko e hā ʻoku pehē aí?

Ko e lea faka-Pilitāniá ko e lea fakalūkufua ia ʻoku leaʻaki ʻe hotau fanga tokoua ʻi he fonua hangē ko Fisi, Kana, Keniā, Laipīlia, Naisīlia, Pāpua Niu Kini, Simipāpuē, mo e ʻOtu Motu Solomoné. Neongo ko hotau fanga tokoua ʻi he ngaahi fonua ko ení ʻoku nau lea he ngaahi lea fakalotofonua, pe tuʻufonua, ʻoku nau faʻa ngāueʻaki maʻu pē ʻa e lea faka-Pilitānia ʻi he fetuʻutaki fakaʻahó ʻi he ngaahi fakataha ʻa e fakatahaʻangá pea ʻi he ngāue fakamalangá. Kae kehe, ko e lea faka-Pilitānia ʻoku nau ngāueʻakí ʻoku faingofua ange ia ʻi he lea ʻoku tau ngāueʻaki ʻi heʻetau ʻū tohí. Pehē foki, ʻoku ʻi ai mo e niʻihi kehe ʻo e kakai ʻa Sihová kuo nau hiki ki he ngaahi fonua ʻa ia kuo pau ke nau ngāueʻaki ʻa e lea faka-Pilitāniá ki he fetuʻutakí neongo ko ʻenau ʻilo ki he leá ʻoku mātuʻaki fakangatangata. ʻIkai ko ia pē, heʻikai lava ke nau maʻu ʻa e ngaahi fakataha ʻa e fakatahaʻangá ʻa ia ʻoku fakahoko ʻi heʻenau lea tuʻufonuá.

Ko e ʻū kupu ʻoku tau lāulea ki ai he uike taki taha ʻi he Ako Taua Leʻo ko e ngaahi founga tefito ia ke hanganaki tokonaki lelei mai ai maʻatautolu ʻa e meʻakai fakalaumālie taimi totonu. Ko ia ai, ke tokoni ki he tokotaha kotoa ʻi he kau maʻu fakatahá ke maʻu ʻaonga mei he fakamatala ko ení, ko e pulusinga faka-Pilitānia faingofuá ʻoku tokonaki mai ia ʻo ngāueʻaki e ngaahi lea maʻamaʻa ange mo e kalama mo e faʻunga sētesi faingofua. Ko e pulusinga foʻou ko ení ʻe ʻi ai hano takafi makehe. Ko e ngaahi ʻuluʻi kaveingá, palakalafí, fehuʻi fakamanatú, mo e fakatātā ʻi he ʻū kupu akó te nau fenāpasi mo e ngaahi meʻa ko ia ʻi he pulusinga anga-mahení. Ko ia ai, ko e tokotaha kotoa ʻe lava ʻo muimui fakataha ʻi ha pulusinga pē pea kau ki he Ako Taua Leʻo. Ke fakahaaʻi ʻa e faikehekehe ʻi he fakalea ʻo e ongo pulusingá, sio ki he fakatātā ʻi lalo mei he palakalafi 2 ʻo e kupu ako ʻuluaki ʻi he ʻīsiu ko ení.

Ko e ʻemau ʻamanakí ia ko e tokonaki foʻou ko ení te ne tali e lotu ʻa e tokolahi ʻa ia naʻa nau pehē kia Sihova: “Fakapoto au, pea te u ako ʻi he ngaahi tuʻutuʻuni aʻau.” (Sāme 119:73) ʻOku mau falala pau ko e faʻahinga ko ia ʻoku fakangatangata ʻenau ʻilo ki he lea faka-Pilitāniá, pea pehē ki he niʻihi ʻo e fānau kei iiki ange ʻoku nau lea faka-Pilitāniá, te nau malava ʻo teuteu lelei ange ki he Ako Taua Leʻo ʻi he uike taki taha. ʻOku tau ʻoatu ʻa e fakamālō kotoa kia Sihova tuʻunga he ‘ʻofa ki he haʻohaʻonga fakakātoa ʻo e fanga tokouá,’ ʻokú ne ngāueʻaki ʻa e “tamaioeiki agatonu mo boto” ke ʻomai ʻa e meʻakai fakalaumālie lahi fau.—1 Pita 2:17, NW; Mt. 24:45, PM.

Kulupu Pule ʻo e Kau Fakamoʻoni ʻa Sihová