ʻOkú Ke Tapua Atu ʻa e Lāngilangi ʻo Sihová?
“Ko kitautolu . . . ʻoku tau . . . tapua atu ʻo hangē ha ngaahi sioʻatá ʻa e lāngilangi ʻo Sihová.”—2 KOL. 3:18.
ʻE FĒFĒ HAʻO TALI?
Neongo hotau tuʻunga angahalaʻiá, ʻe lava fēfē ke tau fakalāngilangiʻi ʻa Sihova?
ʻOku anga-fēfē hono tokoniʻi kitautolu ʻe he lotú mo e ʻi ai ʻi he ngaahi fakataha faka-Kalisitiané ke tau tapua atu ʻa e lāngilangi ʻo e ʻOtuá?
Ko e hā ʻe lava ke ne tokoniʻi kitautolu ke tau hanganaki fakalāngilangiʻi ʻa Sihová?
1, 2. Ko e hā ʻoku ʻuhinga lelei ai ke ʻamanekina ʻe lava ke tau faʻifaʻitaki ki he ngaahi ʻulungaanga ʻo Sihová?
ʻI HĒ pe ko ē, ko kitautolu kotoa ʻoku tau hangē pē ko ʻetau ongo mātuʻá. Ko ia ai, ʻoku ʻikai fakaʻohovale ke fanongo ʻoku pehē ʻe ha taha ki ha kiʻi tamasiʻi, ‘ʻIloʻi koe ʻokú ke hoko teteʻe pē ki hoʻo tamaí.’ ʻE tala nai ki ha kiʻi taʻahine, ‘Ko hoʻo faʻeé ʻatā koe.’ Pea ʻoku faʻa faʻifaʻitaki ʻa e fānaú ki he meʻa ʻoku nau sio ki ai ʻi heʻenau ongo mātuʻá. Kae fēfē kitautolu? ʻE lava ke tau faʻifaʻitaki ki heʻetau Tamai fakahēvaní, ʻa Sihova? Neongo kuo teʻeki ai ke tau sio kiate ia, ʻoku lava ke tau ʻilo hono ngaahi ʻulungaanga mahuʻingá ʻaki hono ako ʻene Folofolá, ʻaki hono siofi ʻene fakatupú, pea ʻaki e fakalaulauloto ki he Folofolá kae tautefito ki he ngaahi lea mo e ngaahi ngāue ʻa e ʻAlo ʻo e ʻOtuá, ʻa Sīsū Kalaisi. (Sione 1:18; Loma 1:20) ʻOku malava ke tau tapua atu ʻa e lāngilangi ʻo Sihová.
2 Ki muʻa ke fakatupu ʻa ʻĀtama mo ʻIví, naʻe falala-pau ʻa e ʻOtuá ʻe malava ʻa e faʻahinga ʻo e tangatá ke fakahoko hono finangalo kiate kinautolú, tapua atu hono ngaahi ʻulungāngá, pea ʻomi ai ʻa e fakalāngilangi kiate ia. (Lau ʻa e Sēnesi 1:26, 27.) ʻI he tōʻongaʻaki ʻa e anga-līʻoa fakaʻotuá, ʻoku totonu ke tau fakahāhā ʻa e ngaahi ʻulungaanga ʻo e Tokotaha naʻá ne faʻu kitautolú. Kapau te tau fai pehē, ʻoku tau maʻu ai ʻa e monū faitāpuekina ko hono tapua atu ʻa e lāngilangi ʻo e ʻOtuá tatau ai pē pe ko e hā hotau anga fakafonuá, hotau tuʻunga fakaeakó, pe ko hotau puipuituʻa fakamatakalí. Ko e hā hono ʻuhingá? Koeʻuhí “ʻoku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.”—Ngā. 10:34, 35.
3. Ko e hā ʻa e ongoʻi ʻe lava ke hokosia ʻe he kau Kalisitiané ʻi heʻenau tauhi kia Sihová?
3 ʻOku tapua atu ʻe he kau Kalisitiane paní ʻa e lāngilangi ʻo Sihová. Ko ia ai, naʻe tohi ʻe he ʻapositolo pani ʻe he laumālié ko Paulá: “Ko kitautolu kotoa ʻa ia ʻoku tau maʻu ʻa e ngaahi fofonga ʻoku ʻikai fakapūlouʻí, lolotonga ʻetau tapua atu ʻo hangē ha ngaahi sioʻatá ʻa e lāngilangi ʻo Sihová, ʻoku liliu ai kitautolu ki he ʻīmisi tatau mei he tuʻunga ʻe taha ʻo e lāngilangí ki ha toe tuʻunga ʻe taha ʻo e lāngilangí.” (2 Kol. 3:18) ʻI he taimi naʻe ʻalu hifo ai ʻa e palōfita ko Mōsesé mei he Moʻunga Sainaí mo e maka lafalafa ʻe ua ʻoku ʻi ai ʻa e Fekau ʻe Hongofulú, naʻe ulo ʻa e kili ʻo hono matá koeʻuhí he naʻá ne talanoa mo Sihova. (ʻEki. 34:29, 30, PM) Neongo kuo teʻeki ai ke hokosia ʻe he kau Kalisitiané ha meʻa pehē pea kuo teʻeki ke ulo atu honau matá, ʻoku nau ulo atu ʻi he fiefia ʻi heʻenau tala ki he niʻihi kehé fekauʻaki mo Sihová, ko hono ngaahi ʻulungāngá, mo ʻene taumuʻa fakaofo ki he faʻahinga ʻo e tangatá. ʻI he hangē ha ngaahi sioʻata ukamea ngingila ʻi he kuonga muʻá, ʻoku tapua atu ai ʻe he kau paní mo honau ngaahi kaungāmeʻa ʻi he māmaní ʻa e lāngilangi ʻo Sihová ʻi heʻenau moʻuí mo ʻenau ngāue fakafaifekaú. (2 Kol. 4:1) ʻOkú ke tapua atu ʻa e lāngilangi ʻo Sihová ʻaki ho ʻulungaanga fakaʻotuá pea ʻaki hoʻo ngāue ʻi he tuʻunga ko ha tokotaha fanongonongo tuʻumaʻu ʻo e Puleʻangá?
KO ʻETAU HOLÍ IA KE TAPUA ATU ʻA E LĀNGILANGI ʻO SIHOVÁ
4, 5. (a) ʻI he hangē ko Paulá, ko e hā ʻoku tau fāinga mo iá? (e) Kuo anga-fēfē hono uesia kitautolu ʻe he angahalá?
4 ʻI he tuʻunga ko e kau sevāniti ʻa Sihová, ʻoku tau fiemaʻu moʻoni ke fakaʻapaʻapaʻi mo fakalāngilangiʻi hotau Tokotaha-Fakatupú ʻi he meʻa kotoa pē ʻoku tau faí. Kae kehe, ʻoku faʻa hoko, ko e meʻa ʻoku tau holi ke faí ʻoku ʻikai ko e meʻa ia ʻoku tau faí. Naʻe pau kia Paula ke ne fāinga mo e palopalema fakafoʻituitui ko iá. (Lau ʻa e Loma 7:21-25.) ʻI hono fakamatalaʻi ʻa e ʻuhinga ʻoku tau maʻu ai ha fāinga pehē, naʻe tohi ʻe Paula: “Kuo faiangahala kotoa pē mo tōnounou ʻo ʻikai maʻu ʻa e lāngilangi ʻo e ʻOtuá.” (Loma 3:23) ʻIo, fakafou ʻi he tukufakaholo mei he tokotaha angahalaʻia ko ʻĀtamá, kuo hoko ai ʻa e faʻahinga ʻo e tangatá ʻo moʻulaloa ki he pule kakaha ʻa ‘Tuʻi Angahalá.’—Loma 5:12; 6:12.
5 Ko e hā ʻa e angahala? Ko ha faʻahinga meʻa pē ʻoku fepaki mo e ʻulungaanga, ngaahi founga, ngaahi tuʻunga, pea mo e finangalo ʻo Sihová. ʻOku maumauʻi ʻe he angahalá ʻa e vahaʻangatae ha taha mo e ʻOtuá. ʻOku ʻai kitautolu ʻe he angahalá ke tau ʻalu kehe mei he foʻi māká, ʻo hangē ko ha tokotaha fana ngahau ʻoku lava ke ne fanaʻi ha foʻi ngahau ʻo ʻalu kehe mei heʻene tāketí. ʻE lava ke tau faiangahala ʻosi fakakaukauʻi pe ʻi he taʻeʻilo. (Nōm. 15:27-31) ʻOku tongi loloto ʻa e angahalá ʻi he faʻahinga ʻo e tangatá pea fakatupunga ai ha ʻā-vahevahe ʻi honau vahaʻa mo honau Tokotaha-Fakatupú. (Saame 51:5; ʻAi. 59:2; Kol. 1:21) Ko ia ai, ko e faʻahinga ʻo e tangatá fakalūkufua ʻoku ʻikai ʻaupito ke nau feongoongoi mo Sihova pea ʻoku nau ʻalu kehe mei he faingamālie mātuʻaki mahuʻinga ko e tapua atu ʻa e lāngilangi ʻo e ʻOtuá. ʻOku ʻikai toe fehuʻia, ko e angahalá ko e faingataʻa lahi taha ia ʻokú ne uesia ʻa e faʻahinga ʻo e tangatá.
6. Neongo hotau tuʻunga angahalaʻiá, ʻe lava fēfē ke tau fakalāngilangiʻi ʻa e ʻOtuá?
6 Neongo hotau tuʻunga angahalaʻiá, kuo fakamoʻoniʻi ʻa Sihova ko e ‘ʻOtua ʻokú ne foaki mai ʻa e ʻamanaki.’ (Loma 15:13) Kuó ne tokonaki mai ʻa e founga ki hono fakaʻauha fakaʻaufuli ʻa e angahalá—ko e feilaulau huhuʻi ʻa Sīsū Kalaisí. ʻI hono ngāueʻi ʻa e tui ki he feilaulau ko iá, ʻoku ʻikai ke tau kei hoko ai ʻo “pōpula ki he angahalá,” ka ʻoku tau ʻi ha tuʻunga ke tapua atu ʻa e lāngilangi ʻo Sihová. (Loma 5:19; 6:6; Sione 3:16) Ko e tauhi maʻu ʻa e vahaʻangatae fakahōifua ko eni mo e ʻOtuá ʻokú ne fakapapauʻi mai ai kia kitautolu ʻa e ngaahi tāpuaki ʻa Sihová ʻi he taimí ni pea pehē ki he ngaahi ʻaonga ʻi he kahaʻú ʻa e moʻui haohaoa mo taʻengata. Neongo ʻoku tau kei hoko ko e faʻahinga angahalaʻia ʻo e tangatá, ko ha tāpuaki ē ke vakai mai ʻa e ʻOtuá kia kitautolu ko ha faʻahinga ʻoku lava ke tapua atu ʻa hono lāngilangí!
TAPUA ATU ʻA E LĀNGILANGI ʻO E ʻOTUÁ
7. Ko e hā kuo pau ke tau ʻiloʻi fekauʻaki mo kitautolu koeʻuhí ke malava ke tau tapua atu ʻa e lāngilangi ʻo e ʻOtuá?
7 Ke tau ʻi ha tuʻunga totonu ke tapua atu ʻa e lāngilangi ʻo e ʻOtuá, kuo pau ke tau ʻiloʻi faitotonu hotau natula angahalaʻiá. (2 Kal. 6:36) ʻOku fiemaʻu ke tau ʻiloʻi ʻetau ngaahi hehema angahalaʻiá pea ngāue ke mapuleʻi ia koeʻuhí ke tau lava ai ʻo fakalakalaka ʻo aʻu ki he tuʻunga ko hono fakalāngilangiʻi moʻoni ʻa e ʻOtuá. Ko e fakatātaá, kapau kuo tau tō ki he angahala taʻefakalāngilangi ʻo e mamata ʻi he ʻata fakalieliá, kuo pau ke tau sio ki he foʻi moʻoniʻi meʻa ko ia ʻoku tau fiemaʻu ha tokoni fakalaumālie—pea fai ha meʻa ke maʻu ia. (Sēm. 5:14, 15) Ko e ʻuluaki sitepu eni ke tau fakahokó ʻi he ngāue atu ki ha moʻui ʻoku fakalāngilangiʻi kakato ai ʻa e ʻOtuá. ʻI he tuʻunga ko e kau lotu ʻa Sihová, kuo pau ke tau fai ha sivisiviʻi-kita hokohoko ke tau fakapapauʻi pe ʻoku tau aʻusia ʻa ʻene ngaahi tuʻunga māʻoniʻoní. (Pal. 28:18; 1 Kol. 10:12) Tatau ai pē pe ko e hā e natula ʻo ʻetau ngaahi hehema angahalaʻiá, kuo pau ke tau hanganaki mapuleʻi kinautolu koeʻuhí ke lava ke tau tapua atu ʻa e lāngilangi ʻo e ʻOtuá.
8. Neongo ʻoku ʻikai ke tau haohaoa, ko e hā ʻoku totonu ke tau faí?
8 Ko Sīsū tokotaha pē ʻa e tangata kuo moʻui mai pea mate ʻo ʻikai taʻemalava ke fakahōifuaʻi ʻa e ʻOtuá mo tapua atu Hono lāngilangí. Neongo ʻoku ʻikai ke tau haohaoa ʻo hangē ko Sīsuú, ʻoku lava pea ʻoku totonu ke tau feinga ke muimui ʻi heʻene faʻifaʻitakiʻangá. (1 Pita 2:21) ʻOku fuatautau ʻe Sihova ʻa e feinga ʻoku tau fakahokó fakataha mo e fakalakalaka ʻoku tau faí, pea ʻokú ne tāpuakiʻi ʻetau feinga tōtōivi ke ʻomi kiate ia ʻa e lāngilangí.
9. Ko e hā ʻa e ngafa ʻoku fakahoko ʻe he Tohi Tapú ʻi he moʻui ʻa e kau Kalisitiane ko ia ʻoku nau holi ke aʻusia ʻa e ngaahi fiemaʻu ʻa e ʻOtuá?
9 Ko e Folofola tohi ʻa e ʻOtuá ʻoku lava ke ne fakamaama mai kiate kitautolu ʻa e hala ki he fakalakalaká. ʻOku mahuʻinga hono ako fakamātoato ʻa e Folofolá mo lau ʻa e Tohi Tapú ʻi he fakalaulauloto. (Saame 1:1-3) Ko hono lau fakaʻaho ʻa e Tohi Tapú te ne tokoniʻi kitautolu ke tau fai ha fakalakalaka. (Lau ʻa e Sēmisi 1:22-25.) Ko e ʻilo ʻo e Tohi Tapú ko e makatuʻunga ia ki heʻetau tuí pea ko e founga ia ke fakaivimālohiʻi ai ʻetau fakapapau ke fakaʻehiʻehi mei he angahala mamafá pea ke fakahōifua kia Sihová.—Saame 119:11, 47, 48.
10. ʻE lava fēfē ke tokoniʻi kitautolu ʻe he lotú ke tau tauhi kakato ange kia Sihova?
10 Ke tapua atu ʻa e lāngilangi ʻo e ʻOtuá, ʻoku toe fiemaʻu ke tau “kītaki ʻi he lotu.” (Loma 12:12) ʻE lava pea ʻoku totonu ke tau lotu ke hanga ʻe Sihova ʻo tokoniʻi kitautolu ke tau tauhi kiate ia ʻi ha founga fakahōifua. Ke aʻusia iá, ʻe lava ke tau kole fakalelei kiate ia ki hono laumālie māʻoniʻoní, ki ha tui lahi ange, ki ha malava ke talitekeʻi ʻa e ʻahiʻahí, pea mo ha malava ke “tofa totonu ʻa e folofola ʻo e moʻoní.” (2 Tīm. 2:15; Māt. 6:13; Luke 11:13; 17:5) Hangē pē ko ha fakafalala ʻa ha kiʻi tama ki heʻene tamaí, ko ia ʻoku fiemaʻu ke tau fakafalala ki heʻetau Tamai fakahēvaní, ʻa Sihova. Kapau ʻoku tau kole kiate ia ke ne tokoniʻi kitautolu ke tau tauhi ke toe kakato ange kiate ia, ʻoku lava ke tau maʻu ʻa e falala-pau te ne fai pehē. ʻOfa ke ʻoua ʻaupito naʻa tau ongoʻi ʻoku tau fakahohaʻasi ia! Ka, ʻi he lotú tau fakahīkihikiʻi ia, fakamālō kiate ia, kumi ki heʻene tatakí tautefito ʻi he taimi ʻoku tau ʻi he ʻahiʻahí ai pea kole ke ne tokoniʻi kitautolu ke tau tauhi kiate ia ʻi he ngaahi founga te tau fakalāngilangiʻi ai hono huafa māʻoniʻoní.—Saame 86:12; Sēm. 1:5-7.
11. ʻOku anga-fēfē hono tokoniʻi kitautolu ʻe he ngaahi fakataha ʻa e fakatahaʻangá ke tau tapua atu ʻa e lāngilangi ʻo e ʻOtuá?
11 Kuo tuku ʻe he ʻOtuá ʻa e tauhi ʻo ʻene fanga sipi mahuʻingá ki he “tamaioʻeiki anga-tonu mo potó.” (Māt. 24:45-47; Saame 100:3) Ko e kalasi tamaioʻeikí ʻoku nau mahuʻingaʻia ʻaupito ʻi he anga hono hanga ʻe he ngaahi kaungātuí ʻo tapua atu ʻa e lāngilangi ʻo Sihová. Ko hotau fōtunga ʻi he tuʻunga ko e kau faifekau Kalisitiané ʻoku fakatonutonu ia ʻi heʻetau ngaahi fakatahá, ʻo hangē ko haʻatau ʻai ha tokotaha tuitui ke ne fakaleleiʻi hotau valá koeʻuhí ke tau hā lelei ange ai. (Hep. 10:24, 25) Ko ia ai, tau aʻu taimi tonu, he kapau te tau angaʻaki ʻa e aʻu tōmuí, te tau tō ʻi ha kiʻi niʻihi ʻo e ‘fakaleleiʻi’ fakalaumālie ʻoku fiemaʻu ke fakaleleiʻi ʻi hotau fōtungá ʻi he tuʻunga ko e kau sevāniti ʻa Sihová.
TAU FAʻIFAʻITAKI KI HE ʻOTUÁ
12. ʻE lava fēfē ke tau faʻifaʻitaki ki he ʻOtuá?
12 Kapau ʻoku fiemaʻu ke tau tapua atu ʻa e lāngilangi ʻo Sihová, kuo pau ke tau “hoko ko e kau faʻifaʻitaki ki he ʻOtuá.” (ʻEf. 5:1) Ko e founga ʻe taha ke faʻifaʻitaki ai kia Sihová ko hono ohi mai ʻa e anga ʻo ʻene vakai ʻo fekauʻaki mo e ngaahi meʻá. Ko e feinga ke moʻui ʻi ha toe founga kehe ʻoku taʻefakalāngilangi ia kiate ia pea fakatupu maumau kiate kitautolu. Koeʻuhi ko e māmani ʻoku takatakai kiate kitautolú ʻoku ʻi he malumalu ia ʻo e tākiekina ʻa e tokotaha fulikivanú, ʻa Sētane ko e Tēvoló, kuo pau ke tau ngāue mālohi ke maʻu ha fehiʻa ki he meʻa ʻoku fehiʻa ai ʻa Sihová pea ʻofa loloto ki he meʻa ʻokú ne ʻofa aí. (Saame 97:10; 1 Sio. 5:19) ʻOku fiemaʻu ke tau tuipau fakamātoato ko e founga totonu pē ke tauhi ai ki he ʻOtuá ko hono fai e meʻa kotoa pē maʻa hono lāngilangí.—Lau ʻa e 1 Kolinitō 10:31.
13. Ko e hā kuo pau ai ke tau fehiʻa ki he angahalá, pea ko e hā ʻe ueʻi kitautolu ʻe he meʻá ni ke tau faí?
13 ʻOku fehiʻa ʻa Sihova ʻi he angahalá, pea ʻoku totonu ke pehē pē mo kitautolu. Ko e moʻoni, ʻoku totonu ke tau fakamamaʻo ʻaki e lahi taha te tau ala lavá mei he faihalá pea ʻikai sio ki he anga ʻo e ofi te tau lava ʻo aʻu ki aí ʻo taʻehoko ai ʻo ikuʻi ʻe he angahalá. Hangē ko ení, ʻoku fiemaʻu ke tau maluʻi kitautolu mei he tō ki he tafoki ʻo fakafepaki ki he moʻoní, ko ha angahala te ne ʻai kitautolu ke tau taʻefeʻunga ke fakalāngilangiʻi ʻa e ʻOtuá. (Teu. 13:6-9) Ko ia ai, tau ʻai ke ʻoua ʻe ʻi ai haʻatau kaunga ki he kau tafoki ʻo fakafepaki ki he moʻoní pe ko ha taha ʻokú ne taukaveʻi ko ha tokoua ia ka ʻokú ne taʻefakaʻapaʻapaʻi ʻa e ʻOtuá. ʻOku totonu ko e tuʻungá eni neongo kapau ko ha mēmipa ia ʻi he fāmilí. (1 Kol. 5:11) ʻOku ʻikai ke tau maʻu ʻaonga mei he feinga ke fakaʻikaiʻi ʻa e fakaʻuhinga fekauʻaki mo e moʻoní ʻa e kau tafoki ʻo fakafepaki ki he moʻoní pe ko e kau fakaanga ki he kautaha ʻa Sihová. Ko hono moʻoní, ʻoku fakatuʻutāmaki fakalaumālie mo taʻetotonu ke tau lau ʻenau fakamatalá, tatau ai pē pe ʻoku hā ʻi he founga ʻoku tohi pe maʻu ʻi he ʻInitanetí.—Lau ʻa e ʻAisea 5:20; Mātiu 7:6.
14. ʻI he taimi ʻoku tau ngāue ai ke tapua atu ʻa e lāngilangi ʻo e ʻOtuá, ko e hā e ʻulungaanga ʻoku totonu ke hā mahino atu ʻiate kitautolú, pea ko e hā hono ʻuhingá?
14 Ko hono fakahāhā ʻa e ʻofá ko ha founga tuʻu-ki-muʻa ia kiate kitautolu ke tau faʻifaʻitaki ai ki heʻetau Tamai fakahēvaní. ʻIo, ʻi he hangē ko iá ʻoku totonu ke tau ʻofa. (1 Sio. 4:16-19) Ko hono moʻoní, ko e ʻofa ʻoku tau maʻu ʻi hotau lotolotongá ʻokú ne fakaʻilongaʻi kitautolu ko e kau ākonga ʻa Sīsū pea mo e kau sevāniti ʻa Sihova. (Sione 13:34, 35) Neongo ko hotau tuʻunga angahalaʻia tukufakaholó ʻe hū hala hake ia ʻi he taimi ʻe niʻihi, kuo pau ke tau tekeʻi ia ki tafaʻaki pea tau fakamoʻoniʻi ai ʻoku tau ʻofa ʻi he taimi kotoa pē. Ko hono fakatupulekina ʻa e ʻofá mo e ngaahi ʻulungaanga fakaʻotua kehé te ne taʻofi ai kitautolu mei hono fai ha ngaahi meʻa taʻeʻofa mo angahalaʻia.—2 Pita 1:5-7.
15. ʻOku anga-fēfē ʻa e kaunga ʻa e ʻofá ki hotau vahaʻangatae mo e niʻihi kehé?
15 ʻOku hanga ʻe he ʻofá ʻo ʻai kitautolu ke tau fie fai e ngaahi meʻa lelei ki he kakai kehé. Ko e fakatātaá, ko e ʻofa ki hotau hoá te ne tauhi ke ʻoua ʻe ʻuliʻi ʻa e mohenga ʻo e malí. Ko e ʻofa ki he kau mātuʻá, ʻo ō ua mo e fakaʻapaʻapa ki heʻenau ngāué, te ne tokoniʻi kitautolu ke tau talangofua pea fakamoʻulaloa ki heʻenau tatakí. Ko e fānau ko ia ʻoku nau ʻofa ki heʻenau mātuʻá ʻoku nau talangofua mo fakaʻapaʻapa kiate kinautolu pea ʻikai ke nau lea ʻikai lelei ʻo fekauʻaki mo kinautolu. Kapau ʻoku tau ʻofa ʻi hotau kaungāfaʻahinga ʻo e tangatá, ʻe ʻikai te tau vakai kiate kinautolu ʻoku nau māʻulalo ange pe te tau lea taʻefakaʻapaʻapa kiate kinautolu. (Sēm. 3:9) Pea ko e kau mātuʻa ʻoku nau ʻofa ki he fanga sipi ʻa e ʻOtuá te nau tōʻongafai kiate kinautolu ʻi he faimanavaʻofa.—Ngā. 20:28, 29.
16. ʻE anga-fēfē hono tokoniʻi ʻe he fakahāhā ʻo e ʻofá kitautolu ʻi heʻetau ngāue fakafaifekaú?
16 Ko e ʻulungaanga ko e ʻofá ʻoku totonu ke toe hā mahino atu ia ʻi heʻetau ngāue fakafaifekaú. Koeʻuhi ko ʻetau ʻofa loloto kia Sihová, ʻe ʻikai te tau fakaʻatā ai kitautolu ke uesia ʻe he taʻemahuʻingaʻiá pe ko e tali ʻikai lelei mei he faʻahinga ʻi he ngaahi ʻapi ʻe niʻihi. Ka, te tau hokohoko atu pē ʻa hono malangaʻi ʻa e ongoongo leleí. ʻE ueʻi kitautolu ʻe he ʻofá ke tau teuteu lelei pea feinga ke ola lelei ʻi he ngāue fakafaifekaú. Kapau ʻoku tau ʻofa moʻoni ʻi he ʻOtuá pea mo hotau kaungāʻapí, heʻikai ke tau vakai ki he ngāue malangaʻi ʻo e Puleʻangá ko e ngafa pe ko ha faifatongia. Ka, te tau fakakaukau atu ki ai ko ha monū lahi ia pea te tau fakahoko ia ʻi he fiefia.—Māt. 10:7.
HANGANAKI FAKALĀNGILANGIʻI ʻA SIHOVA
17. Ko e hā ʻoku tau maʻu ʻaonga ai mei hono ʻiloʻi ʻoku tau tōnounou ʻo ʻikai maʻu ʻa e lāngilangi ʻo e ʻOtuá?
17 Ko e māmaní fakalūkufua ʻoku ʻikai ke nau lāuʻilo kinautolu ki he mafatukituki ʻo e angahalá, ka ʻoku tau ʻilo ia ʻe kitautolu. ʻOku ʻai ʻe he meʻá ni kitautolu ke tau lāuʻilo ki he fiemaʻu ke tau tauʻi ʻetau ngaahi hehema angahalaʻiá. Ko hono ʻiloʻi hotau natula angahalaʻiá ʻoku fakaʻatā ai kitautolu ke akoʻi hotau konisēnisí koeʻuhí ʻe ueʻi kitautolu ke ngāue totonu ʻi he taimi ʻoku kamata ai ke tupulaki ha vevele ke faiangahala ʻi hotau ʻatamaí mo hotau lotó. (Loma 7:22, 23) ʻOku moʻoni, te tau vaivai nai, ka ʻe lava ke fakaivimālohiʻi kitautolu ʻe he ʻOtuá ke tau fai ʻa e meʻa ʻoku totonú ʻi ha faʻahinga tuʻunga pē.—2 Kol. 12:10.
18, 19. (a) Ko e hā ʻokú ne ʻai kitautolu ke tau lavameʻa ʻi heʻetau tauʻi ʻa e ngaahi kongakau laumālie fulikivanú? (e) Ko e hā ʻoku totonu ko ʻetau fakapapaú ia?
18 Kapau ʻoku tau fiemaʻu ke fakalāngilangiʻi ʻa Sihova, kuo pau ke tau toe tauʻi foki ʻa e ngaahi kongakau laumālie fulikivanú. Ko hotau teunga tau fakalaumālie kuo foaki mai ʻe he ʻOtuá ʻokú ne ʻai ke tau malava ʻo fai lavameʻa eni. (ʻEf. 6:11-13) ʻOku feinga taʻetuku ʻa Sētane ke kaihaʻasi meia Sihova ʻa e lāngilangi ʻoku tuha ʻataʻatā pē mo Iá. ʻOku toe hokohoko atu ʻa e Tēvoló ke fai ʻa e feinga kotoa pē ke fakaʻauha hotau vahaʻangatae mo Sihová. Ka ko ha tā ia ʻe ongo kia Sētane ʻi he taimi ʻoku tauhi maʻu ai ʻa e anga-tonú mo fakalāngilangiʻi ʻa e ʻOtuá ʻe kitautolu mo e laui miliona kehe ʻo e kau tangata, kau fefine, mo e fānau taʻehaohaoá! Ko ia ai, tau hokohoko atu hono fakahīkihikiʻi ʻa Sihová, hangē ko e ngaahi meʻamoʻui fakahēvaní ʻa ia ʻoku nau kalanga: “ʻOku taau mo e ʻAfioná, ʻe Sihova ko homau ʻOtua, ke ke maʻu ʻa e ngeiá mo e lāngilangí pea mo e mālohí, koeʻuhí naʻá ke fakatupu ʻa e ngaahi meʻa kotoa pē, pea koeʻuhí ko ho finangaló naʻa nau hoko mai ai ʻo ʻi ai pea naʻe fakatupu ai kinautolu.”—Fkh. 4:11.
19 ʻOfa ko ʻetau fakapapaú ia ke tau hanganaki fakalāngilangiʻi ʻa Sihova, ʻo tatau ai pē pe ko e hā e meʻa ʻe hokó. ʻOku pau ʻokú ne fiefia koeʻuhí ko e tokolahi ʻa e faʻahinga mateaki taautaha ʻoku nau fai honau lelei tahá ke faʻifaʻitaki kiate ia pea tapua atu hono lāngilangí. (Pal. 27:11) ʻOfa ke hangē ʻetau ngaahi ongoʻí ko Tēvitá, ʻa ia naʻá ne hiva: “Kau fakafetaʻi ki he ʻAfiona ʻaki hoku loto kotoa, ʻe Atonai ko hoku ʻOtua; ʻo fakahikihikiʻi ho huafa ʻo taʻengata.” (Saame 86:12) He fakaʻamua ē ko kitautolu ʻa e ʻaho ko ia te tau tapua haohaoa atu ai ʻa e lāngilangi ʻo Sihová pea lava ke fakahīkihikiʻi ia ʻo taʻengata! Ko e meʻa eni ʻe hokosia fiefia ʻe he faʻahinga talangofua ʻo e tangatá. ʻOkú ke tapua atu ʻa e lāngilangi ʻo Sihova ko e ʻOtuá ʻi he taimí ni, mo e ʻamanaki ke fai pehē ai pē ʻi he kotoa ʻo ʻitānití?
[Fakatātā ʻi he peesi 27]
ʻOkú ke tapua atu ʻa e lāngilangi ʻo Sihová ʻi he ngaahi foungá ni?