Ngaahi Fakataha-Lahi Fakavahe mo e Fakavahaʻapuleʻangá ʻOku Ueʻi Ai Kitautolu ke ʻAve ki he ʻOtuá ʻa e Lāngilangí!
Ko e ngaahi Fakataha-Lahi Fakavahe mo e Fakavahaʻapuleʻanga “ʻAve ki he ʻOtuá ʻa e Lāngilangí” kuo fai ʻo aʻu mai ki he lolotonga ní, kuo ʻomai ai ha fakamoʻoni lahi fakaʻulia. Ko e ngaahi meʻa fakateokalati mahuʻingá ni kuo ngāue ia ke hakeakiʻi ʻa e huafa ʻo Sihová pea fakaleleiʻi ʻetau malava ke “tuku kia Sihova ʻa e kololia [pe lāngilangi] hono huafa.” (Sāme 96:8) Ko e moʻoni, ʻoku taau ke fakalāngilangiʻi ia koeʻuhí ko ʻene ngaahi ngāue fakaefakatupu fakaofó, ʻa ia ʻoku tapua atu ai ʻa hono ngaahi ʻulungaanga fisifisimuʻá.—Siope 37:14; Fkh. 4:11.
ʻI hono ngāueʻaki ʻa e ngaahi fehuʻi hokó fakataha mo hoʻo ngaahi nouti fakafoʻituituí, teuteu pea kau ʻi he fakamanatu ʻo e polokalama fakataha-lahí ʻe fai lolotonga ʻa e uike ʻo Tīsema 1.
1. ʻOku anga-fēfē hono fakahā ʻe he meʻa fakatupu ʻikai moʻuí ʻa e lāngilangi ʻo e ʻOtuá, pea ʻoku anga-fēfē ʻa e kehe ia mei he founga ʻoku fakahīkihikiʻi ai ʻa e ʻOtuá ʻe he faʻahinga ʻo e tangatá? (Sāme 19:1-3; “Fakahā ʻe he Fakatupú ʻa e Lāngilangi ʻo e ʻOtuá”)
2. Ko e hā ʻa e moʻoni lolotonga ʻoku tomuʻa fakatātaaʻi ʻe he fakasinokehé, pea ʻi he founga fē ʻoku fakaivia ai ʻa e kau Kalisitiane he ʻaho ní ʻe he moʻoni ko ení? (Malanga he Tefitoʻi Fakakaukaú, “Hanga ʻe he Ngaahi Vīsone Fakaekikite Lāngilangiʻiá ʻo Fakaivia Kitautolu!”)
3. ʻE lava fēfē ke tau fakatupulekina ʻa e faʻahinga anga-fakatōkilalo naʻe fakahāhā ʻe he palōfita ko Tanielá, pea ʻe anga-fēfē ʻetau maʻu ʻaonga mei hono fai iá? (Tan. 9:2, 5; 10:11, 12; “Fakaeʻa ʻa e Lāngilangi ʻo Sihová ki he Faʻahinga Anga-Fakatōkilaló”)
4. (a) Ko e hā ʻa e meʻa ʻe tolu fekauʻaki mo e fakamaau fakaʻotuá ʻoku lava ke tau ako mei he kikite ʻa ʻĒmosí? (Emosi 1:3, 11, 13; 9:2-4, 8, 14) (e) Ko e hā ʻa e lēsoni ʻaonga ʻoku lava ke ako ʻe he Kau Fakamoʻoni ʻa Sihova he ʻaho ní mei he fakatātā fakaefakatokanga ʻoku maʻu ʻi he Emosi 2:12? (“Ko e Kikite ʻa ʻĒmosí—Ko ʻEne Pōpoaki ki Hotau ʻAhó”)
5. (a) Ko e hā ʻa e ngaahi fakatuʻutāmaki ʻo hono ngāueʻaki ʻo fuʻu hulu ʻa e ʻolokaholó, neongo kapau ʻoku ʻikai konā ai ʻa e tokotahá? (e) ʻE fakatonutonu fēfē nai ha palopalema ʻi hono maʻu ʻo fuʻu hulú? (Mk. 9:43; Ef. 5:18; “Fakaʻehiʻehi mei he Tauhele ʻo e Ngāuehalaʻaki ʻa e ʻOlokaholó”)
6. ʻOku anga-fēfē hoʻo maʻu ʻaonga mei he tohi foʻou “See the Good Land”? (“‘Ko e Fonua Lelei’—Tomuʻa Fakaʻali ʻo e Palataisí”)
7. Ko e hā ʻa e founga ʻe tolu ʻe lava ke tau “tapua atu [ai] hangē ha ngaahi sioʻatá ʻa e lāngilangi ʻo Sihová”? (2 Kol. 3:18, NW; “Tapua Atu Hangē ha Ngaahi Sioʻatá ʻa e Lāngilangi ʻo Sihová”)
8. Ko e hā ʻa e tupuʻanga ʻo e tāufehiʻa taʻetotonú, pea ko e hā ʻe lava ke ne tokoniʻi kitautolu ke tauhi maʻu ʻetau anga-tonú neongo hono hokosia e tāufehiʻa peheé? (Sāme 109:1-3; “Fehiʻanekinaʻi Taʻehanoʻuhinga”)
9. Ko e hā ʻa e vakai faka-Kalaisi ki he tuʻunga lahí, pea ʻe anga-fēfē nai hano fakapapauʻi ʻe ha tokotaha ʻoku fiemaʻu ke ne fakatupu ke toe kakato ange ʻa e anga ʻo e vakai ko ení? (Mt. 20:20-26; “Fakatupulekina ha Vakai Faka-Kalaisi ki he Tuʻunga Lahí”)
10. Ko e hā ʻe lava ke ne tokoniʻi kitautolu ke nofoʻaki longomoʻui fakalaumālie neongo ʻa e ongosia fakaesinó? (“Helaʻia kae ʻIkai Helaʻia ʻOsi”)
11. Ko e hā ʻa e niʻihi ʻo e ngaahi kautaha ʻa ia ʻoku pouaki ʻo fakafou mai ai ʻe Sētane ʻa e loí, pea ko e hā ʻa e akonaki Fakatohitapu feʻungamālie ki he ngaahi feinga ke maumauʻi ʻetau tuí? (Sione 10:5; “Tokanga Fekauʻaki mo e ‘Leʻo ʻo e Kau Mulí’”)
12. (a) ʻE lava fēfē ke muimui ʻa e ngaahi mātuʻá ki he faʻifaʻitakiʻanga ʻa Sīsū ʻoku lēkooti ʻi he Maake 10:14, 16? (e) Ko e hā ʻokú ke saiʻia ai fekauʻaki mo e tohi foʻou Ako mei he Faiako Lahí? (“Ko ʻEtau Fānaú—Ko ha Tofiʻa Mahuʻinga”)
13. ʻOku anga-fēfē hono fakahīkihikiʻi ʻe he toʻutupú ʻa Sihová? (1 Tim. 4:12; “Founga ʻOku Fakahīkihikiʻi Ai ʻa Sihova ʻe he Toʻutupú”)
14. Ko e hā ʻa e ngaahi konga mei he tulama “Faifakamoʻoni Loto-Toʻa Neongo ʻa e Fakafepakí” ʻoku tuʻu-ki-muʻa ʻi hoʻo manatú?
15. ʻE lava fēfē ke tau faʻifaʻitaki ki he faʻifaʻitakiʻanga naʻe fokotuʻu ʻe (a) Pita mo Sione? (Ng. 4:10) (e) Sitīveni? (Ng. 7:2, 52, 53) (f) he fakatahaʻanga Kalisitiane he ʻuluaki senitulí? (Ng. 9:31; tulamá mo e malanga “Talaki ʻa e Ongoongo Leleí ʻo ‘ʻIkai Tuku’”)
16. (a) Naʻa tau fakapapau ke ʻave ki he ʻOtuá ʻa e lāngilangí ʻi he ngaahi founga fē? (e) Ko e hā ʻe lava ke tau fakapapauʻi ʻi heʻetau ngāueʻaki ʻa e meʻa kuo tau ako ʻi he ngaahi Fakataha-Lahi “ʻAve ki he ʻOtuá ʻa e Lāngilangí”? (Sione 15:9, 10, 16; “‘Fua Lahi’ Maʻá e Lāngilangi ʻo Sihová”)
ʻI he fakalaulauloto ki he fakahinohino fakalaumālie lelei naʻe ʻomai ʻi he fakataha-lahí, ʻe ueʻi ai kitautolu ke ngāueʻaki ʻa e ngaahi meʻa kuo tau akó. (Fili. 4:8, 9) ʻE fakaivimālohiʻi ʻe he meʻá ni ʻetau fakapapau ke “fai ʻa e meʻa kotoa pē ke lāngilangi ai ʻa e ʻOtuá.”—1 Kol. 10:31, NW.