TALI ʻO E NGAAHI FEHUʻI FAKATOHITAPÚ

Ko e hā ke lotu ai ke hoko mai ʻa e Puleʻanga ʻo e ʻOtuá?

Ko e Puleʻanga ʻo e ʻOtuá ko e founga-pule fakahēvani ia. Naʻe tala ange ʻe Sīsū ki hono kau muimuí ke nau lotu ke hoko mai ʻa e Puleʻangá koeʻuhí ke ne fakafoki mai ʻa e māʻoniʻoní mo e melinó ki he māmaní. ʻOku ʻikai ke lava ʻe he founga-pule fakaetangatá ke ne toʻo ʻosi atu ʻa e fakamālohí, fakamaau taʻetotonú pe mahamahakí, ka ʻoku lava ia ʻe he Puleʻanga ʻo e ʻOtuá pea te ne malava ke fakahoko ia. Kuo fili ʻe he ʻOtuá hono ʻAló, ʻa Sīsū, ke hoko ko e Tuʻi ʻo e Puleʻangá. Kuo toe fili ʻe Sihova ha kulupu ʻo e kau muimui ʻo Sīsuú ke hoko ʻo kaungā pule mo Sīsū ʻi he Puleʻangá.—Lau ʻa e Luke 11:2; 22:28-30.

ʻOku vavé ni ke toʻo ʻosi ʻe he Puleʻanga ʻo e ʻOtuá ʻa e kau fakafepaki kotoa pē ki he pule ʻa e ʻOtuá. Ko ia ko e lotu ke hoko mai ʻa e Puleʻanga ʻo e ʻOtuá ko e kole ia ke fetongi ʻe he founga-pule ʻa e ʻOtuá ʻa e ngaahi founga-pule fakaetangata kotoa pē.—Lau ʻa e Taniela 7:13, 14; Fakahā 11:15, 18.

Ko e hā ʻe ʻaonga ai ʻa e Puleʻanga ʻo e ʻOtuá ki he kakaí?

Ko Sīsū ʻa e Tuʻi lelei tahá koeʻuhí ʻokú ne kaungāongoʻi. Koeʻuhí ko e ʻAlo ia ʻo e ʻOtuá, ʻokú ne toe maʻu ʻa e mālohi ke ʻomai ha tokoni kiate kinautolu kotoa ʻoku nau kole ki he ʻOtuá ki ha tokoni.—Lau ʻa e Saame 72:8, 12-14.

Ko e Puleʻanga ʻo e ʻOtuá ʻe maʻu ʻaonga mei ai ʻa e faʻahinga kotoa ʻoku nau lotu loto-moʻoni ke hoko maí pea ʻoku nau moʻui ʻo fehoanaki mo e finangalo ʻo e ʻOtuá. ʻE ʻikai ʻaupito te ke fakaʻiseʻisa ʻi he ako ki he meʻa ʻoku leaʻaki ʻe he Tohi Tapú ʻo fekauʻaki mo e Puleʻanga ʻo e ʻOtuá.—Lau ʻa e Luke 18:16, 17; Sione 4:23.