Ko e Hā ʻOku Leaʻaki ʻe he Tohi Tapú?
Ko e hā ʻa e Puleʻanga ʻo e ʻOtuá?
ʻOKU TUI ʻA E KAKAI ʻE NIʻIHI ʻokú ne fakafofongaʻi ʻa e pule ʻa e ʻOtuá ʻi he loto ʻo ha taha; ʻoku fakakaukau e niʻihi ko e ola ia e ngaahi feinga ʻa e tangatá ke ʻai e māmaní ke melino mo fetokouaʻaki. Ko e hā hoʻo fakakaukaú?
MEʻA ʻOKU LEAʻAKI ʻE HE TOHI TAPÚ
“Ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata. . . . ka te ne laiki mo fakaʻauha ʻa e ngaahi puleʻanga [fakaetangata] ko ia.” (Taniela 2:44) Ko e Puleʻanga ʻo e ʻOtuá ko ha founga-pule moʻoni ia.
MEʻA TE TAU TOE AKO MEI HE TOHI TAPÚ
ʻOku pule ʻa e Puleʻanga ʻo e ʻOtuá mei hēvani.—Mātiu 10:7; Luke 10:9.
ʻOku ngāueʻaki ʻe he ʻOtuá ʻa e Puleʻangá ke fakahoko hono finangaló ʻi hēvani mo māmani.—Mātiu 6:10.
ʻE hoko mai ʻa e Puleʻanga ʻo e ʻOtuá ʻafē?
KO E HĀ TE KE LEAʻAKÍ?
ʻIkai ke ʻilo ʻe ha taha
Vavé ni mai
ʻIkai ʻaupito ke hoko ia
MEʻA ʻOKU LEAʻAKI ʻE HE TOHI TAPÚ
“Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai leva ʻa e ngataʻangá.” (Mātiu 24:14) Ko e kakato pē hono malangaʻi ʻa e ongoongo leleí, ʻe hoko mai leva ʻa e Puleʻangá ke fakangata ʻosi ʻa e tuʻunga fulikivanu lolotongá.
MEʻA TE TAU TOE AKO MEI HE TOHI TAPÚ
ʻOku ʻikai ha taha ʻi he māmaní te ne ʻiloʻi ʻa e taimi ʻe hoko mai ai ʻa e Puleʻanga ʻo e ʻOtuá.—Mātiu 24:36.
ʻOku fakahaaʻi ʻe he kikite ʻi he Tohi Tapú ʻoku vavé ni ke hoko mai ʻa e Puleʻangá.—Mātiu 24:3, 7, 12.