Fehuʻi mei he Kau Lautohí

Ko e hā ʻoku ʻikai ngofua ai ke pousi ʻa e ʻū tohi ʻa e Kau Fakamoʻoni ʻa Sihová ʻi ha uepisaiti fakafoʻituitui pe ʻi he mītia fakasōsialé?

Koeʻuhi ʻoku tau ʻoatu taʻetotongi ʻetau fakamatala makatuʻunga ʻi he Tohi Tapú, ʻoku fakakaukau ai ʻa e niʻihi ia ʻoku ala tali pē ʻa hono hiki mo hono pousi ia ʻi ha ngaahi uepisaiti kehe pe ʻi he mītia fakasōsialé. Kae kehe, ko e fai peheé ʻoku maumauʻi ai ʻa e Makatuʻunga Hono Ngāueʻakía ʻi heʻetau uepisaití pea kuó ne fakatupunga ha palopalema mafatukituki. Hangē ko ia ʻoku fakahaaʻi mahino ʻi he ngaahi Makatuʻunga ko iá, ʻoku ʻikai ngofua ki ha taha ke ne “fakaʻaliʻali ha fakatātā, tatau ʻo e ʻū tohi fakaʻilekitulōnika, trademarks, fasi, ʻū tā, vitiō, pe ko ha kupu mei he uepisaiti ko ení ʻi he ʻInitanetí (ko ha uepisaiti pē, saiti fakafoʻituitui, saiti feʻaveʻaki vitiō, pe netiueka sōsiale).” Ko e hā ʻoku fiemaʻu ai ʻa e fakangatangata peheé?

Ko e fakamatala kotoa ʻi heʻetau uepisaití ʻoku maluʻi fakalao. ʻOku feinga ʻa e kau tafoki ʻo fakafepaki ki he moʻoní mo e kau fakafepaki kehé ke ngāueʻaki ʻetau ʻū tohí ʻi heʻenau uepisaití ke tauheleʻi ʻaki ʻa e Kau Fakamoʻoni ʻa Sihová mo e niʻihi kehé. ʻOku fakahūhū ʻi he ngaahi saiti ko iá ʻa e fakamatala kuo faʻufaʻu ke ne ʻai ke veiveiua ʻa e ʻatamai ʻo e kau lautohí. (Saame 26:4; Pal. 22:5) Kuo ngāueʻaki ʻe he niʻihi ʻa e fakamatala mei heʻetau ʻū tohí pe ko ʻetau fakaʻilonga jw.org ʻi he ngaahi tuʻuaki, pe fakatau atu ʻo ha koloa, pea ʻi he polokalama ʻi he meʻangāue toʻotoʻó. ʻI hono ʻai ke malu ʻa e maluʻi fakalaó mo e maluʻi ʻo e hingoá, ʻoku tau maʻu ai ha makatuʻunga fakalao ke taʻofi ʻa e ngāuehalaʻaki ko iá. (Pal. 27:12) Ka ʻo kapau ʻoku tau fakaʻatā ʻiloʻilo pau ʻa e kakaí, naʻa mo hotau fanga tokouá, ke nau pousi ʻa e ngaahi tatau fakaʻilekitulōniká ʻi he ngaahi saiti kehé pe ngāueʻaki ʻa e fakaʻilonga jw.org ke tuʻuaki koloa atu ʻaki, heʻikai nai ke poupouʻi ʻe he ngaahi fakamaauʻangá ʻetau ngaahi feinga ke taʻofi ʻa e kau fakafepakí mo e ngaahi kautaha fakakomēsialé.

Ko hono hiki ʻetau ʻū tohí mei ha feituʻu kehe kae ʻikai ko e jw.org ʻoku malava ke fakatuʻutāmaki. Kuo tuku ʻe Sihova ʻa e fatongia ʻo hono tokonaki mai ʻa e meʻakai fakalaumālié ki he “tamaioʻeiki anga-tonu mo potó” pē. (Māt. 24:45) Ko e “tamaioʻeiki” ko iá ʻokú ne ngāueʻaki pē ʻa ʻene uepisaiti fakaʻofisialé ki hono tuku atu ʻa e meʻakai fakalaumālié​—ʻa e www.jw.org, tv.jw.org, mo e wol.jw.org. Pea ʻoku tolu pē ʻetau polokalama fakaʻofisiale ki he ngaahi meʻangāue fakaʻilekitulōniká​—ko e JW Language^®, JW Library^®, mo e JW Library Sign Language^®. ʻOku lava ke tau falala ʻoku ʻatā ʻa e ngaahi meʻa ko ení mei he ngaahi tuʻuaki pe fakameleʻi ʻe he māmani ʻo Sētané. Kapau ʻoku fou atu ʻa e meʻakai fakalaumālié ʻi ha ngaahi fouʻanga kehe, ʻoku ʻikai ha fakapapauʻiʻanga kuo ʻikai ke liliu pe fakameleʻi ia.​—Saame 18:26; 19:8.

ʻIkai ko ia pē, ko hono pousi ʻetau ʻū tohí ʻi he uepisaiti ʻoku fakaʻatā ke fai ha fakamatala ki aí ʻoku ʻoange ai ʻa e faingamālie ki he kau tafoki mei he moʻoní mo e kau fakaanga kehé ke nau ʻai ke ʻikai ha falala ki he kautaha ʻa Sihová. Kuo tohoakiʻi ʻa e fanga tokoua ʻe niʻihi ki ha fakakikihi ʻi he ʻinitanetí, pea kuo ʻoatu ai ʻa e luma lahi ange ai ki he huafa ʻo Sihová. Ko ha fakakikihi ʻi he ʻinitanetí ʻoku ʻikai ko ha fokotuʻutuʻu feʻungamālie ia ki hono “akoʻi ʻi he anga-malū ʻa e faʻahinga ʻoku fakafepakí.” (2 Tīm. 2:23-25; 1 Tīm. 6:3-5) Kuo toe ʻiloʻi foki kuo faʻu ha ʻakauni loi ʻi he mītia sōsialé mo e uepisaiti loi ʻi he hingoa ʻo e kautahá, Kulupu Pulé, mo hono kau mēmipa tāutahá. Kae kehe, ʻoku ʻikai ha mēmipa ʻo e Kulupu Pulé ʻe ʻi ai haʻane peesi Uepisaiti fakafoʻituitui pe ʻasi ʻi ha saiti mītia fakasōsiale.

Ko hono tataki ʻa e kakaí ki he jw.org ʻoku tokoni ki hono fakamafola ʻa e “ongoongo lelei.” (Māt. 24:14) Ko e ngaahi tatau fakaʻilekitulōnika ʻoku tau maʻu ke ngāueʻaki ʻi heʻetau ngāue fakafaifekau fakafoʻituituí ʻoku fakaleleiʻi hokohoko. Te tau saiʻia ke maʻu ʻaonga mei ai ʻa e tokotaha kotoa. Ko ia ai, hangē ko ia ʻoku fakahaaʻi ʻi he Makatuʻunga Hono Ngāueʻakí, ʻe lava ke ke ʻīmeili nai ki ha taha ha tatau fakaʻilekitulōnika ʻo ha tohi pe ʻoatu ha link ki ha meʻa ʻi he jw.org. ʻI hono tataki ʻa e kakai mahuʻingaʻiá ki heʻetau uepisaiti fakaʻofisialé, ʻoku tau fakahoko ai kinautolu ki he matavai moʻoni pē ʻe taha ʻo e meʻakai fakalaumālié, “ʻa e tamaioʻeiki anga-tonu mo potó.”