Ngāuefakapotopotoʻaki ʻa e Ngaahi Meʻangāue Mātuʻaki Mahuʻinga
1 ʻI hoʻo ngāue fakamoʻoni fale ki he falé, ʻoku totonu ko hoʻo koló ke fakakau ʻa e tokotaha-ʻapí ki ha fetalanoaʻaki faka-Tohitapu ʻoku fakatupu langa hake ʻi hono ngāueʻaki ʻa e Tohitapú mo e ngaahi meʻangāue mātuʻaki mahuʻinga kehe. (Fehoanaki mo 2 Kolinitō 6:1; 2 Tīmote 2:15.) Ko e hā ʻa e meʻa ʻoku tokanga ki ai ʻa e kakai ʻi ho ngaahi kauhalá ʻi he ngaahi ʻahó ni? ʻOku nau loto-hohaʻa ʻo kau ki he tuʻunga fakaʻikonōmiká pea mo e hoholo ʻo e tuʻunga lelei ʻo e moʻui fakafāmilí? Ko ha ngaahi lea kamata ʻi ha taha ʻo e ongo kaveinga ko ʻení te ne tataki nai ki ha fetalanoaʻaki faka-Tohitapu lelei.
2 Te ke lea pehē ni nai:
◼ “ʻI he ngaahi taimi faingataʻá ni, ʻoku faingataʻa ki he tokolahi ʻo e kakaí ke nau tokonaki feʻunga mai ki heʻenau ngaahi fiemaʻu fakaʻahó. ʻOkú ke fakakaukau ʻe fakaleleiʻi ʻe he ngaahi puleʻanga fakaetangatá ʻa hotau ngaahi palopalema fakapaʻangá ʻi ha founga ʻe lelei ki he tokotaha kotoa pē? [Tuku ke ne tali.] Naʻá ku maʻu ʻe au ha fakalototoʻa mei he fakakaukau ko ení . . . ”
3 Te ke toki lau nai ʻa e Sāme 72:12-14 pea hoko atu ʻa e fetalanoaʻakí ʻaki hano filifili ha toe konga Tohitapu ʻe taha mei he ngaahi konga Tohitapu ʻoku ʻasi ʻi he peesi 154-5 ʻo e tohi Reasoning. Pe ʻi he ʻosi hono lau ʻo ha konga Tohitapu ʻe taha, te ke lave nai ki ha palakalafi ʻi he tuleki ko e Moʻui ʻi ha Māmani Foʻou Melino. Ko e kau malanga tokolahi pea kau ai mo kinautolu kei talavoú ʻoku nau lavameʻa ʻi he kamata ha ngaahi ako Tohitapu ʻi ha taha ʻo e ngaahi tulekí ʻaki hano lau ha palakalafi pea ʻeke ange ki he tokotaha-ʻapí pe ko e hā ʻene fakakaukau ʻi he meʻa ko ia kuo laú.
4 ʻI ha ngaahi feituʻu ʻe niʻihi te ke saiʻia ke ngāueʻaki ʻa e lea ko ʻení:
◼ “ʻOku tokolahi ʻa e kakai ʻoku nau saiʻia ke nau sio ki ha toe foki ki he anga ʻo e nofo fakafāmili ke hangē ko ia naʻe angaʻaki ʻi he kuo hilí. ʻOkú ke fakakaukau ko e meʻa faʻiteliha ʻa e tokotaha taki taha ke ne fakapapauʻi pe ko e hā ʻa e ngaahi founga nofo fakafāmili ko eni ʻoku totonu ke hokó, pe ʻoku totonu ke ʻi ai ha tuʻunga pē taha ke muimui ki ai ʻa e tokotaha kotoa pē? [Tuku ke ne tali.] ʻOku fakahā ʻe he tokolahi kapau ʻe ngāueʻaki ʻa e akonaki fakapotopoto ʻa e Tohitapú, ʻe ʻi ai ha fakalakalaka ʻilonga lelei ki he tuʻunga lelei ʻo e moʻui fakafāmilí.”
5 ʻI he aʻu ki he tuʻunga ko ʻení ʻi he fetalanoaʻakí te ke fakahā mo fakamatalaʻi nai ʻa e fakamatala ʻi he Selemaia 10:23 pe Palōvepi 28:26 pea feinga ke kamata ha ako Tohitapu ʻi he ʻuluaki ʻaʻahí ʻaki hano ngāueʻaki ʻa e ngaahi poini ʻi he palakalafi 17 ʻo e kiʻi tohi ʻOtua ʻOku Tokanga Mai.
6 Kapau ʻe fakahā ʻe he tokotaha-ʻapí ʻa e mahuʻingaʻia, fakahā ange ki ai ʻa e mahuʻinga ʻo hono ako ʻa e kiʻi tohí, pe kapau ʻokú ne lea faka-Pilitānia pea tuʻuaki ki ai ha taha ʻo e ngaahi tohi peesi 192 ʻa e Sōsaietí ʻokú ke tuʻuaki he lolotonga ʻo e māhiná. Kapau kuo ʻikai te ke fakapapauʻi ʻa e lahi ʻo ʻene mahuʻingaʻiá, ngāuefakapotopotoʻaki ha ngaahi meʻangāue mātuʻaki mahuʻinga kehe ʻaki hoʻo fakahā atu ha poini ʻoku feʻungamālie mei ha tuleki.
7 Kapau te ke lava ke kamata ha ako ʻi he ʻuluaki ʻaʻahí, fai ha fokotuʻutuʻu pau ke hokohoko atu ʻa e fetalanoaʻakí ʻi ha ʻaho ʻe taha. Te ke fokotuʻu nai ha makatuʻunga ki hoʻo toe ʻaʻahi hoko maí ʻaki haʻo tala ange ki he tokotaha-ʻapí te ke saiʻia ke fakahā ʻi hoʻo toe foki maí ʻa e tali ki he fehuʻi ʻa ia ʻoku lahi hono ʻekeʻi: “Ko e hā ʻoku fakangofua ai ʻe he ʻOtuá ʻa e faingataʻaʻiá?” Ko e kupu ʻoku hā ʻi laló te ne fakahā pe ʻe fēfē ʻa hono fai ha fetalanoaʻaki lahi ange ki he kaveinga ko iá ʻi he toe fokí.