Ngāueʻaki ʻa e Ngaahi Tulekí ʻo Taki Atu ki he Ngaahi Tohi Iikí
1 ʻI he lolotonga ʻa e māhina ko Suné, ʻe tokolahi ʻa e kau malanga te nau ngāueʻaki ʻa e ngaahi tulekí ke langaʻi ʻa e mahuʻingaʻia ʻi he ongo kiʻi tohi “Ko e Ongoongo Lelei ni ʻo e Puleʻanga” mo e “Nofo ʻAmanaki ki he Maama Foʻou Maʻoniʻoni.” Ko e founga ko ʻení ʻe tokoni kiate kinautolu ke fakapapauʻi ai ʻa e lahi ʻo e mahuʻingaʻiá pea mo fakakaukau pe ʻoku feʻungamālie ke tuʻuaki ʻa e ongo kiʻi tohí ki ha tokotaha-ʻapi ʻi he ʻuluaki ʻaʻahí.
2 ʻE Kei Tuʻu ʻa e Māmani ko Ení? ʻE tokoni lahi ʻa e ngaahi tuleki ʻi hono kamata ha fetalanoaʻaki. ʻOku nau tokoni ke maʻu ʻa e tokanga ʻa e kakaí koeʻuhi ʻoku lave ʻa e ngaahi tulekí ki he ngaahi kaveinga mohu ʻuhinga ʻa ia ʻoku kaunga kiate kinautolu tonu.
Ko e fakatātā, te ke leaʻaki ha faʻahinga meʻa hangē nai ko ʻení:
◼ “ʻI he talanoa mo e kakaí, kuo mau fakatokangaʻi ko e tokolahi ʻoku nau hohaʻa ki he . . . [fili ha meʻa ʻoku lolotonga hoko ʻoku hā ʻi he ngaahi ongoongó]. ʻOku hā ngalingali ko e ngaahi tuʻunga ʻo e māmaní ʻoku fakaʻau ke kovi ange. ʻOku ʻi ai ʻa e faʻahinga ʻoku nau fifili pe ʻe kei tuʻu atu pē ʻa e māmani ko ʻení. Ko e hā haʻo lau ʻo kau ki he meʻa ko iá? [Tuku ʻa e tokotaha-ʻapí ke ne tali. Ko e tokolahi taha ʻo e kakaí ʻoku nau ʻatamai-maama.] Naʻá ku lau ha meʻa fakalototoʻa pea ʻoku ou saiʻia ke fakahā atu kiate koe. ʻOku hā ia ʻi he tuleki ko ʻení. [ʻOange ki he tokotaha-ʻapí ʻa e tuleki ʻE Kei Tuʻu ʻa e Māmani ko Ení? pea pukepuke ʻe koe ha tuleki tatau ʻi ho nimá.] Fakatokangaʻi ʻa e kikite ʻa Sīsū . . . ” Lau mei he palakalafi ʻi he peesi 4 pe 5 ʻa ia ʻoku huʻufataha mo e meʻa ʻoku lolotonga hoko naʻá ke lave ki ai ʻi hoʻo lea kamatá. Kapau ʻe fakahā ʻa e mahuʻingaʻia moʻoni ʻe he tokotaha-ʻapí, te ke fakakaukau nai ke fakahā ʻa e kiʻi tohi “Ko e Ongoongo Lelei.” Kapau ʻoku feʻungamālie, fakahanga ʻa e tokangá ki ha toe fakamatala kehe ʻo kau ki he kikite ʻa Sīsū ʻoku fakaeʻa ʻi he peesi 20 mo e 21, palakalafi 31 mo e 32. Ki muʻa ke ke ʻalú, te ke lava nai ke fakamatala nounou ʻo kau ki heʻetau ngāue fakalūkufua ʻi māmani lahí ʻo ke fakamatalaʻi ʻa e founga hono poupouʻí. Toe fakapapauʻi foki ke langaʻi ha fehuʻi ki ha kaveinga ke toe fai ki ai ha fetalanoaʻaki ʻi hoʻo toe ʻaʻahi.
3 Moʻui ʻi ha Māmani Foʻou Melino: Ko e hā hono ʻuhinga kiate koe ʻa e moʻui ʻi ha māmani foʻou melinó? ʻOku faʻa fakakaukau ʻa e kakaí ki ha feituʻu ʻoku fakaʻofoʻofa hangē ko e ngaahi vaitafe mo e ngaahi teleʻa nonga, fakataha mo e fanga monumanu fakaʻofoʻofa ʻoku nau nofo ʻi he tuʻunga femelinoʻaki. Ko kinautolu ʻoku loto-hohaʻa ʻi he ngaahi tuʻunga lolotongá ni ʻo e māmaní te nau ʻilo nai ko e ʻamanaki ki ha māmani foʻou melinó ko e meʻa fakaongoʻimālohi.
4 ʻOkú ke mateuteu ke fakahā atu ha meʻa fakafiefia ki ho kaungāʻapí, ki ho kaungāngāué mo kinautolu ʻokú ke fetaulaki mo ia ʻi he ngāue fale-ki-he-falé?
ʻI he ngāueʻaki ʻa e tuleki “Moʻui ʻi ha Māmani Foʻou Melino,” te ke leaʻaki nai ha meʻa hangē ko ʻení:
◼ “ʻOkú ke fakakaukau ʻe ʻi ai nai ha taimi ʻe lava ʻa e kakaí ke nau moʻui ʻi he melino ʻo hangē ko ia ʻoku hā ʻi he takafi ʻo e tuleki ko ʻení? [Tuku ki he tokotaha-ʻapí ke ne tali.] Kātaki sio muʻa ki he sētesi fakaʻosi ʻi he ʻuluaki palakalafi ʻi he peesi 2. ʻOku ʻeke ai ʻa e fehuʻi: ‘Ka ko ha misi pē, pe ko e anga pē ʻo e fakakaukau, ke tui ko e ngaahi tuʻunga ko ʻeni ʻe malava ʻapē ke hoko ia ʻi he māmani?’ [Pea toki lau ʻa e palakalafi hono hoko ʻi he tulekí.] Ko e fakamatala ʻeni ʻo kau ki he ngaahi langi foʻou mo e fonua foʻou ʻoku toʻo ia mei he Tohitapú, ʻi he 2 Pita 3:13. Kapau ʻe faingamālie kiate koe ke ke toʻo mai hoʻo Tohitapú te ta lau ʻa e Sāme 104:5 ke ako lahi ange ʻo kau ki he kahaʻu ʻo e māmaní.” Pe te ke lau pē nai ʻa e konga Tohitapú mei hoʻo Tohitapú. Kapau ʻe fakahā mei he tokotaha ko iá ha mahuʻingaʻia, fakahanga ʻa e fetalanoaʻakí ki he kiʻi tohi “Nofo ʻAmanaki ki he Maama Foʻou Maʻoniʻoni” ʻi he peesi 5, palakalafi 3 mo e 4.
5 ʻE fiemaʻu ke toe fai ha ngaahi toe ʻaʻahi ke ‘fuʻifuʻi’ ʻa e tenga kuo toó. (1 Kol. 3:6, 7) Ko e kupu ʻi laló ʻokú ne fokotuʻu mai ʻa e founga ʻe kamata nai ai ha ako ʻi he ongo kiʻi tohí ni ʻi he ʻuluaki ʻaʻahí pe ʻi ha toe ʻaʻahi.