Fai ʻa e Ngaahi Ako Tohitapu ʻi he Tohi ko e Moʻui Taʻengata
1 ʻI he lave ki he tohi ko e Moʻui Taʻengata, naʻe lea ha fefine ʻe taha ʻo pehē: “Ko e tohi tonu matematē, fakafiefia, mo fakaueʻi-loto lahi taha ia kuó u lau ʻi ha taimi, tukukehe pē ʻa e Tohitapú!” ʻOku tau loto-tataú kotoa ko e tohí ni ko e taha ia ʻo e ngaahi tohi lelei taha kuo pulusi ke tokoniʻi ʻa e kakaí ke maʻu ʻa e mahino ʻo e Tohitapú pea tautautefito ke ueʻi honau lotó ke nau hoko ko e kau fakahīkihikiʻi longomoʻui ʻo Sihova.
2 ʻI he 1982, ko e taʻu ia naʻe tuku ange mai ai ʻa e tohi ko e Moʻui Taʻengata, naʻe fai ai ʻe he kau malanga ʻe 613,007 ʻa e ngaahi ako Tohitapu ʻe 344,493 ʻi he ʻIunaite Seteté. ʻI he taimí ni, ko e kau malanga ʻe toko 904,963 ʻoku nau fai ʻa e ngaahi ako Tohitapu ʻe 585,441. ʻI he aʻu mai ki he ʻaho ní, kuo pulusi ʻa e ngaahi tatau ʻe 62 miliona ʻo e tohi ko e Moʻui Taʻengata ʻi he ngaahi lea kehekehe ʻe 115. Ko e ueʻi lahi ē kuo fakahoko ʻe he tohí ki heʻetau ngāue ʻi māmani lahí!
3 Fokotuʻu Ha Ngaahi Kolo: Ko e tupulekina mātuʻaki tuʻu-ki-muʻa ko ʻení ko e ola ia ʻo e tāpuaki meia Sihová mo e vēkeveke ʻa ʻene kakaí ke tokoniʻi ʻa kinautolu ʻoku loto-moʻoní ʻaki ʻa e ongoongo fakahaofi moʻui ʻa e Tohitapú. (Loma 10:13-15; 1 Tīmote 2:4) ʻOku tau ʻiloʻi ʻa e fiemaʻu ke tōtōivi ʻi hono fanongonongo atu ʻa e Puleʻanga ʻo e ʻOtuá mo e taimi fakavavevavé ni.
4 Neongo ʻoku laka ki muʻa ai pē ʻa e kautahá, ʻoku fēfē ʻa kitautolu taautaha? ʻOku tau loto-ʻalovili ke kau kakato ki he ngāue mātuʻaki mahuʻinga ko e ngaohi-ākongá? ʻOku totonu ke tau fokotuʻu ha ngaahi kolo fakafoʻituitui ke lavaʻi eni. ʻE lava ke tau toe tōtōivi ange ʻi hono fai ʻa e ngaahi toe foki kiate kinautolu ʻoku mahuʻingaʻiá? Fēfē ke fokotuʻu ai ha kolo ke kamata ha ako Tohitapu foʻou lolotonga ʻa e māhina ko ʻeni ko Fēpuelí?
5 Ko Hai ʻOku Lava Ke Ne Fai ha Ako Tohitapu?: Ko e kau malanga tokolahi mei he ngaahi ʻātakai kehekehe kuo nau maʻu ʻa e fiefia ʻi hono fai ha ako Tohitapu ʻi he tohi ko e Moʻui Taʻengata. Ko e founga faingofua naʻe tohi ai ʻa e tohí ʻokú ne ʻai ke faingofua ange ai hono fai ʻa e akó, pea ʻokú ne tokoniʻi ʻa e kau malanga kei foʻoú ke nau kau ʻi he ngāue mahuʻinga ko ʻení. ʻIkai ko ia pē, ko e tokolahi ʻo kitautolu kuo tau ako fakafoʻituitui ʻa e tohí ni, ko ia ʻoku tau alāanga mo e ngaahi meʻa ko ia ʻoku ʻi he tohí. Ko ha tokotaha-malanga naʻe ʻikai ke ʻi ai haʻane ngaahi ako Tohitapu ki muʻa ʻi heʻene ngāueʻaki ʻa e tohi ko e Moʻui Taʻengatá, naʻá ne tohi mai ke fakahā ʻene houngaʻiá ʻo ne pehē: “ʻOku ou maʻu ha ngaahi ako ʻe tolu pea ko e ako ʻeni hono faá kuo u mei kamata. ʻOku ʻikai ha fakamālō feʻunga ke fai atu ki hono ʻai ke faingofua ange hono fai ʻa e ngaahi ako Tohitapú.”
6 ʻOku toe kau longomoʻui foki ʻa e kau talavoú ʻi he ngāue ako Tohitapú ʻaki hono ngāueʻaki ʻa e tohi ko e Moʻui Taʻengata. Ko e tokoua kei talavou ʻe taha ʻokú ne hili ʻa e tohí ʻi heʻene tesí ʻi he ʻapiakó. Kuo tokoni eni ke fai ai ha ngaahi fetalanoaʻaki lelei pea mo kamata ʻa e ngaahi ako Tohitapu. Kuo ngāueʻaki ʻe he kau talavou ʻe niʻihi ʻa e founga hangatonu pē ʻo kole ki he ngaahi mātuʻa ʻoku nau fetaulaki ʻi he ngāue fale-ki-he-falé ke maʻu ha ngofua ke fai ha ako Tohitapu mo ʻenau fānaú. ʻOku ʻikai ke fuʻu kei iiki ʻetau fānaú ke nau lea ʻo kau ki he talaʻofa ʻa Sihova ko e moʻui taʻengata ʻi ha māmani palataisí.
7 Tatau ai pē pe ʻoku tau taʻumotuʻa pe kei talavou, ko e fiefia lahi taha ʻe lava ke maʻu ʻe ha taha ʻi he ngāue fakamalangá, ko hono fai ha ako Tohitapu. Ko ia tau taki taha lotu ke maʻu ha tokoni meia Sihova pea ke ngāueʻaki ʻa e faingamālie kotoa pē ke talaki fakahāhā ʻetau ʻamanakí. Ngāueʻaki ʻa e tohi ko e Moʻui Taʻengata ke tokoni ki ha niʻihi kehe ke nau ako ʻa e founga te nau lava ke kau ai ʻi he fakahīkihikiʻi ʻo hotau ʻOtuá, ko Sihova.—Sāme 148:12, 13.