Ko Hono Kamata ha Ngaahi Ako Tohi Tapu he Tohi Moʻui Taʻengata
1 Ko e ʻofa ki he kakaí ʻoku totonu ke ne ueʻi kitautolu ke tau foki vave ke tokoni kiate kinautolu ʻoku nau fiekaia mo fieinua ki he moʻoní. (Mt. 5:6) ʻOku totonu ke tau fakatokangaʻi mo fakatupulekina ha mahuʻingaʻia ʻoku ʻasi neongo ʻoku siʻi, kapau ʻoku ʻikai te tau loto ke toe mole atu ia. Ko e teuteú ko e kī ia ki he lavameʻá.
2 ʻOku totonu ko ʻetau koló ke kamata ha ngaahi ako Tohi Tapu. (Mt. 28:20) Ko e ngaahi ʻuluaki tatau ʻo e tohi Moʻui Taʻengata naʻe ʻi ai ʻa e talateu ko ʻení: “Ko e tohi lelei moʻoni ʻeni ke ngāueʻaki ʻi he ako mo e tokotaha kotoa pē, talavou pe motuʻa, tatau ai pē pe ʻoku fēfē ʻa honau tuʻunga fakaakó.” Naʻe fatu ia ʻi ha founga ke faingofua ange ʻa hono fai ʻo e ngaahi akó, naʻa mo e kau malanga foʻofoʻoú ke nau kau ki ai. Ko ʻetau lavameʻa ʻi he kamata ʻo ha ngaahi ako foʻou ʻoku fakatuʻunga ia ʻi heʻetau pōtoʻi ʻi hono fai ʻa e ngaahi toe ʻaʻahí.
3 ʻE Anga-Fēfē Ke Tau Kamata ha Ngaahi Ako?: ʻI heʻetau toe ʻaʻahí, ʻoku faʻa lelei ke fakahoko ʻa ʻetau fetalanoaʻakí mo ha poini pe ko ha fehuʻi naʻe lave ki ai ʻi heʻetau ʻaʻahi ki muʻá. Mahalo naʻa mou fetalanoaʻaki ki he tuʻunga ʻo e maté, pea ko e fehuʻi naʻe langaʻi aí, “Ko e hā ʻa e ʻamanaki ki hotau ngaahi ʻofaʻanga kuo maté?” Fakamatalaʻi ko e toetuʻú ʻoku ʻikai ko ha ʻamanaki taʻehoko ia; ʻoku fakamatala ʻa e Tohi Tapú ki he ngaahi fakatātā lahi ʻo e ngaahi toetuʻu mei he maté naʻe ʻosi hoko. Fakamatala ʻa e ngaahi fakatātā ʻi he peesi 167-169. Pea fetalanoaʻaki ki he meʻa ʻoku lave ki ai ʻi he palakalafi 1 mo e 2 ʻi he peesi 166. Kapau ʻoku fie fanongo, tuʻuaki ke toe ʻaʻahi ʻo hoko atu ʻa e fetalanoaʻakí.
4 Naʻá ke ʻosi lea nai ki ha mātuʻa naʻá ne fakahā ʻoku hohaʻa ʻo fekauʻaki mo e ngaahi palopalema kuo hokosia ʻi hono tauhi ʻo e fānaú. ʻI hoʻo ngaahi lea pē ia ʻaʻau, te ke leaʻaki nai ʻo hangē ko ʻení:
◼ “Ko e ngaahi mātuʻa hono kotoa pē ʻoku nau fiemaʻu ʻa e lelei tahá ki heʻenau fānaú. ʻOku ʻi he Tohi Tapú ʻa e fakahinohino ʻoku lava ke tokoni ki he ngaahi mātuʻá ke akoʻi ʻa ʻenau fānaú ki he anga ʻo hono maʻu ʻa e moʻui fiemālie ʻoku ʻi ai ʻa hono ʻuhinga mo e taumuʻá. ʻI he ʻuhinga ko iá, ʻoku mau poupouʻi mālohi ʻa e ngaahi fāmilí ke nau ako fakataha ʻa e Tohi Tapú. [Lave ki he palakalafi 23 ʻi he peesi 246.] ʻOku lava ke ʻomai ʻe he ʻilo kuo maʻú ʻa e ngaahi tāpuaki taʻengata ki he fāmilí fakakātoa!” Lau ʻa e Sione 17:3. Fakahā ʻa hoʻo loto-lelei ke toe foki ʻo fakahā ki he fāmilí ʻa e anga ʻo hono kamata ʻo ʻenau akó.
5 Kapau ko ha talavou koe pe ko ha tokotaha malanga foʻofoʻou pea naʻá ke lea fuonounou pē ʻo kau ki he ʻamanaki ki he Palataisí ʻi he ʻuluaki ʻaʻahí, fakaava ʻa e tohí ki he peesi 3, pea fakamatala ʻo hangē ko ʻení:
◼ “ʻOku talaʻofa mai ʻi he Tohi Tapú ko kinautolu ʻoku nau fai ʻa e finangalo ʻo e ʻOtuá ʻoku lava ke nau hanga atu ki he moʻui ʻi ha māmani ʻoku hangē ko ʻení ʻa ia ʻe ʻi ai ʻa e fiefia mo e melino. Kuo tokoniʻi au ʻe he tohi ko ʻení ke ako ki he meʻa te u fai ke maʻu ai ʻa e tāpuaki ko iá. ʻOku ou loto ke tokoniʻi koe ki he anga ʻo hono fai ʻa e meʻa tatau pē.” Fakamatala fuonounou ki heʻetau founga akó, pea tuʻuaki ke fakahāhā ia.
6 Ko hotau fatongia ia ke tokoni ki he kakaí, ʻo hangē pē ko e kau ākonga ʻa Sīsuú. (Loma 10:14) Kapau naʻa tau tuku ha tohi pe fetalanoaʻaki lelei pē, ʻoku ʻi ai hotau fatongia ke fakatupulekina ʻa e mahuʻingaʻia ko iá. (Mt. 9:37, 38) Kapau te tau fakahoko totonu ʻa e ngāue ko ʻení, ko hono olá ʻe lava ke tau maʻu kotoa ʻa e ngaahi tāpuaki mei ai.—1 Tīm. 4:16.