“Akoʻi . . . ʻa e Ngāhi Meʻa . . . Kuo u Tuʻutuʻuni Atu”
1 ʻOku kau ki he ngaohi ākongá ʻa e akoʻi. Ki muʻa ke hoko ha tokotaha ko ha ākonga ʻa Kalaisi, kuo pau ke akoʻi ia “ke tauhi ʻa e ngāhi meʻa kotoa pe” naʻe fekau mai ʻe Sīsuú. (Mātiu 28:19, 20) Ko e ako Tohitapu ʻi he ʻapí ko e founga lelei taha ia ke lavaʻi ai ʻa e meʻá ni.
2 ʻOku ʻikai ke faingofua maʻu pē ke kamata ha ngaahi ako Tohitapu. Kapau ʻokú ke faingataʻaʻia ʻi hono maʻu ha ako Tohitapu, ʻoua te ke lotosiʻi. ʻOku fiemaʻu ʻa e loto-ʻalovili mo e holi loto-moʻoni ke foaki atu ʻa e moʻoní ki ha niʻihi kehe kae lavameʻa ʻi hono kamata ha ako Tohitapu.—Kalētia 6:9.
3 Fakatupu ʻa e Mahuʻingaʻiá: ʻE fakatupu nai ʻe hoʻo ʻuluaki fetalanoaʻakí ha mahuʻingaʻia siʻisiʻi pē. Fakatuʻunga pē ʻi he ngaahi tuʻunga lolotonga ʻo hoʻomo talanoá, ʻe tuku nai ai ki he tokotaha-ʻapí ha tuleki, ha polosiua, pe ko ha ngaahi makasini. Te ke lava nai ke ngāueʻaki ha taha ʻo e ngaahi meʻa ko ʻení ke kamata ha ako Tohitapu ʻi he ʻapí. Kapau ʻoku hā mai mei he tokotaha-ʻapí ha mahuʻingaʻia lahi ange ki he fanongonongo ʻoku faí, ʻe fakahanga nai ʻene tokangá ki ha taha ʻo e ngaahi tohi kehe ʻe feʻunga ʻi ha toe ʻaʻahi ʻamui ange.
4 Ko e kī ki he lavameʻá ko e mateuteu. Fēfē ke tomuʻa filifili ha konga Tohitapu ʻa ia ʻoku hiki ʻi he tulekí, polosiuá, pe makasini ʻokú ke teuteu ke ngāueʻaki ʻi hoʻo toe fokí? Ko e founga ia te ke malava ai ke fakafehokotaki hoʻo ngaahi fakamatala mei he tohí ki hoʻo fetalanoaʻaki ʻoku faí. Te ke lava nai ke lau hangatonu mai mei he tohí ha palakalafi ʻe taha pe ua.
5 Te ke lea pehē ni nai:
◼ “Kuo mau fai ha ngaahi fakamatala ʻo kau ki he kikite fakaofo ʻa ia ʻoku lolotonga fakahoko ia ʻi he taimí ni.” Lau ʻa e Mātiu 24:3, peá ke fakafehokotaki ʻa e fakatātā mo e ngaahi fakamatala ʻi he peesi 24 ʻo e polosiua ko e “Vakai!” ʻE lava ke ngāueʻaki ha founga meimei tatau pehē ʻi haʻo tuʻuaki ʻa e tuleki ʻE Kei Tuʻu ʻa e Māmani ko Ení?
6 ʻI hano fakatokangaʻi ha mahuʻingaʻia moʻoni, ʻoku totonu ke toe foki vave ki ai. Feinga ke toe foki ki ai ʻoku teʻeki ai ke ʻosi ha uike ʻe taha koeʻuhi ʻe kei manatuʻi lelei ai ʻe he tokotaha-ʻapí ʻa e fepōtalanoaʻakí. ʻI he taimi taki taha te ke toe foki aí, fetalanoaʻaki ki ha ngaahi palakalafi ʻe niʻihi mei he tohi naʻá ke tuku ki aí. Pea ʻi ha taimi ʻoku feʻunga ai, te ke kamata ʻi he tohi ko e Moʻui Taʻengata, ʻo hokohoko atu ʻi he founga tatau.
7 ʻOku kei lahi ʻa e ngāue ʻi he ʻahó ni ke fai ʻi he ututaʻu lahi ko ia naʻe kikiteʻi ʻe Sīsuú. (Mātiu 9:37, 38) ʻI heʻetau hokohoko atu ke akoʻi ʻa kinautolu ʻoku loto-totonú, ʻoku tau maʻu ai ʻa e fakapapau fakatupu mālohi ʻa Sīsū te ne ‘ʻiate kitautolu ʻi he ngaahi ʻaho kotoa pē ʻo aʻu ki he ngataʻanga ʻo e ngaahi meʻa ʻoku tuʻú ni.’