Ke Alaisia-Alaikolonga ʻi Hoʻo Ngāue Fakamalangá
1 Kuo faʻa pehē ko e faikehekehé ʻoku fakamānako ai ʻa e moʻuí. ʻOku faʻa hoko, ko ha kehe ʻa hono fakahoko ʻo ha kaveinga ʻokú ne ʻai ke fakamānako ange. ʻOku moʻoni ʻeni ʻi heʻetau ngāue fakamalangá. Kapau ʻe ʻikai te tau tokanga, ko ʻetau lea ʻi he fale-ki-he-falé ʻe faingofua ʻene hoko ʻo hangē ha ākenga-taha pē. Ko hono toutou toe leaʻaki pē ʻa e ngaahi lea fakafeʻiloaki tatau maʻu ai pē ʻe hoko ia ʻo fakafiu fakatouʻosi kiate kitautolu mo e ngaahi ʻapí. Ko ia ai, ʻai ke alaisia-alaikolonga ʻi hoʻo ngāue fakamalangá. Ka ʻe lava fēfē ke ke aʻusia ʻa e meʻá ni?
2 Fēfē ke ke fakakaukau ki ha ngaahi founga ke kehekehe ai ʻa hoʻo ngaahi lea kamatá, kaeʻoua ʻe leaʻaki ai pē ʻo hangē ko ʻeni, ‘Mālō ʻetau maʻu ʻa e pongipongí ni. ʻOku mau ʻaʻahi mai ki homau ngaahi kaungāʻapí mo e ongoongo lelei ʻo e Puleʻangá’. Ko e tohi Reasoning ʻoku fonu ʻi he ngaahi fakamatala lahi ʻo fekauʻaki mo e ngaahi lea kamatá. ʻI he peesi 9-15, ʻoku ʻi ai ʻa e ngaahi lea kamata ʻi he kaveinga kehekehe ʻe 18. Pea ʻoku ʻi ai ʻa e ngaahi lea kamata ʻe ua, tolu pe lahi ange ki he lahi taha ʻo e ngaahi kaveingá.
3 Kapau ʻokú ke ngāueʻaki ʻa e polosiua ko e “Does God Really Care About Us?,” ʻe tokoni nai ʻa e lea kamata ko ʻeni mei he konga ko e “Life/Happiness” ʻi he peesi 13:
◼ “ʻOku mau talanoa mo e kakai ʻoku nau tokanga moʻoni ki he anga ʻo e moʻuí ʻi he ʻaho ní. ʻOku fifili ʻa e tokolahi; ʻE malava moʻoni ke ʻi ai ha moʻui fiefia? Ko e polosiua ko ʻení ʻoku ʻi ai ʻa e ngaahi fakakaukau fakalototoʻa mo fakatupu fakakaukau.” Hukeʻi ʻa e polosiuá ki he peesi 25, pea lau ʻa e taha pe ua ʻo e ngaahi mea mahuʻinga ʻi he palakalafi 15 mo e 16.
4 Ko e kau malanga ʻe niʻihi ʻo e Puleʻangá—tautefito ki he kau foʻofoʻoú mo e kau taʻu siʻi angé, pea pehē pē ki he faʻahinga motuʻa angé—ʻoku nau pehē ʻoku fakamānako ʻa hono ngāueʻaki ʻa e ngaahi tulekí ʻi he ngaahi matapaá.
Ko ha tokotaha malanga kei siʻi te ne ngāueʻaki nai ʻa e tuleki “Fiefia ʻI he Moʻui Fakafāmili” peá ne pehē:
◼ “ʻOku ou maʻu ha pōpoaki nounou kiate koe ʻo fekauʻaki mo e anga ʻo hono fakatahaʻi ʻe he ʻOtuá ʻa e ngaahi fāmilí ʻi he fiefia. ʻOku ou fie ʻoatu kiate koe ʻa e tuleki ko ʻeni kuo fakakaveinga ko e Fiefia ʻI he Moʻui Fakafāmili.” Ko e tokotaha malanga matuʻotuʻa ange ʻokú na hoa mo e tokotaha malanga kei siʻí te ne fakakaukauʻi pe te ne toe tānaki atu ha ngaahi fakakaukau pe ngaahi fakamatala, ka ʻe fakatuʻunga ia ʻi he tali ʻa e tokotaha-ʻapí.
5 Kapau ʻoku hā mei he tokotaha-ʻapí ha mahuʻingaʻia, ʻe pehē atu nai ʻe he tokotaha malanga matuʻotuʻa angé:
◼ “Kuo tokonaki mai ʻi he Tohitapú ʻa e fakahinohino ki he fatongia totonu ʻo e husepānití, ko e uaifí, mo e fānaú ʻi he fokotuʻutuʻu ʻo e fāmilí. Pea koeʻuhi ko e ʻOtuá ko e Tupuʻanga ia ʻo e fāmilí, ʻikai te ke loto-tatau ki he pehē ko ia ʻoku ʻi ha tuʻunga lelei taha ke ne fakahā mai kiate kitautolu ʻa e founga totonu ke fakaleleʻaki ʻa e fāmilí? ʻOku ou fie fanongo pe ko e hā haʻo fakakaukau ki he akonaki fakahangatonu ʻa e Tohitapú ki he ngaahi mēmipa ʻo e fāmilí.” Pea ke lau ʻa e ʻEfesō 5:22, 23, 28-31.
6 Kapau ʻokú ke fakaʻaliʻali ʻa e polosiua Vakai!, fēfē ke ke fakaeʻa ʻa e fakakaukau pau ki he kahaʻú ʻoku fokotuʻu ʻi he Fakahā 21:3, 4? Pea lau ʻa e palakalafi 57 mo e 58 ʻi he peesi 29 mo e 30 ʻo e polosiuá. ʻEke ki he tokotaha-ʻapí pe ʻoku totonu ke tui ko e ʻOtuá te ne fakahoko ʻa e ngaahi palōmesi ko ʻení. Ko ha fetalanoaʻaki fuonounou ki he ngaahi fehuʻi kehekehe ʻi he peesi 30 te ne fakalototoʻaʻi nai ʻa e tokotaha-ʻapí ke ne lau ʻa e tohi mahuʻingá ni.
7 ʻOku fie kau kotoa ʻa e kau malangaʻi ʻo e Puleʻangá ki hono fakalahi atu ʻa e ngaahi meʻa mahuʻinga fakateokalatí, ʻo tō ʻa e ngaahi tenga ʻo e moʻoní ʻi ha feituʻu pē ʻe malavá pea tokangaʻi ʻa e mahuʻingaʻia ʻoku hā aí. ʻI heʻetau fai ʻa ʻetau tafaʻakí, te tau fiefia ke tuku ʻa e tupu ʻi he kahaʻú ki he toʻukupu ʻo Sihová. ʻOku tau maʻu ʻa e ongoongo lelei taha ke ʻoatu ki hotau ngaahi kaungāʻapí. ʻI haʻatau teuteu maʻu pē, ʻe lava ke tau alaisia-alaikolonga ʻi hono ʻoatu ʻa e pōpoaki ʻo e Puleʻangá mo kehekehe ʻa e anga hono tuʻuaki ʻo ʻetau ngaahi tohí.