Te Ke Malava ʻo Fai Ia?
1 Te ke ʻeke, ‘Ke fai ʻa e hā?’ ʻOku tali ʻe he Palōvepi 3:27: “ʻOua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai.” ʻOku “mafai ʻe ho nima” ke fakalahi hoʻo ngaahi ngāué mo kau ʻi he ngāue taaimuʻa fakataimí pe taaimuʻa tuʻumaʻú? Te ke malava ʻo fai ia?
2 Ko e fakalototoʻa lahi ē ke lau ʻa e 1993 Yearbook ʻa ia naʻe hā ai naʻe fakaʻavalisi ki he kau taaimuʻa tuʻumaʻu mo fakataimi ʻe toko 106,031 ʻi he ʻIunaite Seteté, ko e taaimuʻa ʻe toko 1 ki he kau malanga ʻe toko 8. ʻIo, ko e toko 5,093 naʻe kau foʻou ki he ngāue taaimuʻá ʻi he taʻu kuo ʻosí. ʻOku meimei aʻu eni ki he kau malanga ʻe toko 14 he ʻaho taki taha naʻa nau sivisiviʻi honau ngaahi tuʻungá pea ʻilo te nau malava ʻo toe kau lahi ange ki he ngāue fakamalangá.
3 Ko e taaimuʻa fakataimí ko ha founga ia ke fai lelei ai ki ha niʻihi kehe. ʻI he taʻu kuo ʻosí naʻe ʻi ai ʻa e tumutumu ko e kau taaimuʻa fakataimi ʻe toko 105,748. Ko e meʻa mātuʻaki lelei ʻaupito ia. Ko e tokolahi ʻo e kau malangá ʻoku nau fekumi ki ha ngaahi founga ke nau lava ai ke kau lahi ange ki he ngāue taaimuʻa fakataimi lolotonga ʻa e taʻú.
4 Ke fakapapauʻi pe te ke lava ke “fai ia” pe ʻikai, ko e ʻuluaki meʻa ʻoku fiemaʻu kiate koé ke ke fakakaukau ki he fakaʻamu moʻoni ʻo ho lotó. (Mt. 22:37-39) ʻOku pehē ʻe he tohi Ngāue 20:35: “ʻOku te monuʻia [“fiefia,” NW] lahi ʻi he fai ha foaki atu, ʻi heʻete maʻu ha foaki mai.” ʻOku ʻikai ha veiveiua, ko kinautolu ʻoku nau fai ha tokoni fakalaumālie lahi tupu mei honau lotó ʻoku nau maʻu ʻa e fakaʻamu ʻoku totonú. ʻOku mātuʻaki fiemaʻu ʻa e fakaʻamu ko ʻení kae hoko ko ha tokotaha malanga pe ko ha taaimuʻa lavameʻa.
5 Ko hono uá, fakakaukau ki ho tuʻunga ʻokú ke lolotonga ʻi aí. Te ke malava ʻo fai ha liliu ʻi hoʻo ngaahi ngāue fakaʻahó ka ke ngāue taimi-kakato? Heʻikai lava ʻe he tokotaha kotoa. Ka ʻi he hili ha sivisiviʻi kita mo faʻa lotu, ʻoku ʻilo ai ʻi he taʻu taki taha ʻe he laui afe ha founga ke “fai ia.” (Kol. 4:5; w77 p. 701) Ko e fakatātā, ʻoku fili ʻe ha ngaahi fāmili ʻe niʻihi ha ngaahi māhina ʻe niʻihi ke kau ki he ngāue taaimuʻa fakataimí ha mēmipa ʻe niʻihi ʻo e fāmilí pe ko e fāmilí kātoa. Ko e ngaahi fāmili kehe ʻoku nau fai ha tokoni ki ha taha ʻo honau mēmipá kae hoko ko ha taaimuʻa tuʻumaʻu. Kuo fai ha fakakaukau ʻe ho fāmilí ki he ngaahi meʻa ko ʻeni ʻoku malava ke faí?—Sio ki he Palōvepi 11:25.
6 Ko e fiemālie moʻoní ʻoku hoko mai ia ʻi he tokoni ki he niʻihi ke nau ʻilo ʻa e moʻoní, tatau ai pē pe ʻokú ke ngāue ko ha tokotaha malanga pe ko ha taaimuʻa. ʻOku tau ʻiloʻi ko e fiefia moʻoní ʻoku hoko mai ia mei hono fai ha lelei ki ha niʻihi, kae tautefito kapau ʻoku ‘mafai ʻe hotau nimá ke fai ia.’