Toe ʻAʻahi ke Langaʻi ʻa e Mahuʻingaʻia ʻi he Tohitapú

¹ ʻI he taimi ʻe niʻihi ʻoku tau fetaulaki ai mo e kakai ʻi he ngāue fakamalangá ʻa ia ʻoku hā mai haʻanau mahuʻingaʻia ʻi he ongoongo leleí ka ʻoku nau fuʻu femoʻuekina ke talanoa mo kitautolu ʻi he taimi ʻoku tau ʻaʻahi aí. ʻOku tau feinga ke toe ʻaʻahi ʻi ha taimi kehe ke fakahā atu ʻa e pōpoaki fekauʻaki mo e Puleʻangá kiate kinautolu? Pe mahalo pē ʻoku tau fai ha fetalanoaʻaki mālie mo ha tokotaha-ʻapi, ka ʻoku ʻikai te ne tali ha taha ʻo ʻetau ngaahi tohí. ʻOku tau toe ʻaʻahi ke toe fai ha fakamatala kiate ia ʻo kau ki he moʻoní?

² ʻOku mahuʻinga ke ngāueʻi fakaʻāuliliki ʻa hotau kauhalá mo toe ʻaʻahi kiate kinautolu kotoa naʻe hā mai nai haʻanau mahuʻingaʻiá. ʻOku tau fai pē ʻa e toe ʻaʻahí kiate kinautolu naʻa nau tali ha tohi pe ko e ngaahi makasini? Kapau ko ia, ʻoku tau taʻetokangaʻi nai ha kakai ʻoku mahuʻingaʻia. ʻOku pau ʻoku ʻikai totonu ke tau fakamaauʻi ha taha ʻo pehē ʻoku ʻikai taau ia ke toe fai ha fakalototoʻa fakalaumālie ki ai koeʻuhi ko e ʻikai ke ne tali ha taha ʻo ʻetau ngaahi tohí. (Fehoanaki mo Loma 14:4.) Mahalo pē ʻi he ʻosi ʻetau ʻaʻahí, kuo fakakaukau ʻa e tokotaha-ʻapí ʻo kau ki he meʻa naʻa tau leaʻakí pe te ne hoko ʻo loto-hounga ki heʻetau feinga ke ʻaʻahi kiate iá. Te ne tali lelei ange nai ʻa ʻetau toe ʻaʻahi angé.

³ ʻI he toe ʻaʻahi ki ha taha naʻe femoʻuekina, te ke lea pehē ni nai:

◼ “ʻOku ou fiefia ke toe sio kiate koe. Ko e taimi naʻá ku ʻi heni ai ki muʻá, naʻe ʻikai ke lava ha talanoa koeʻuhi naʻe ʻikai ke ʻi ai hao taimi. Pea ʻoku ou ʻiloʻi ko e tokotaha femoʻuekina koe, ka te u kiʻi taimi nounou pē. ʻOku ngalingali ʻokú ke tokanga ke maʻu ha moʻui lelei fakaesino kiate koe mo kinautolu ʻokú ke ʻofa aí. Ko ia, ʻokú ke ʻiloʻi kuo talaʻofa ʻe he ʻOtuá te ne fakangata ʻa e ngaahi mahaki kotoa pē? ʻIkai ko e meʻa fakaofo ia? [Tuku ke ne tali.] Fakatokangaʻi ʻa e poini ʻi he palakalafi 4 ʻo e polosiua ko ʻeni ʻoku ui ko e ‘Vakai! ʻOku Ou Fakafoʻou ʻa e Meʻa Kotoa Pe.’” Kapau ʻoku kei faingamālie, lau ʻa e palakalafí pea fai ha fakamatala ki ha taha ʻo e ngaahi konga Tohitapu ʻi lalo ʻi he peesi 4 ʻa ia ʻokú ne fakahā mai ʻa e ngaahi tuʻunga ʻi he māmani foʻoú. Kapau ʻoku ʻatamai fie-fanongo ʻa e tokotaha-ʻapí, te ke lava nai ke kamata ha ako Tohitapu.

⁴ ʻI he fai ha toe ʻaʻahi ki ha taha naʻá ne tali ha tuleki, te ke leaʻaki ha meʻa hangē ko ʻení:

◼ “ʻI heʻeku ʻi heni ki muʻá, naʻá ke tali ha tatau ʻo e tuleki ko ʻeni ʻoku ui Ko Hai ʻOkú Ne Puleʻi Moʻoni ʻa e Māmaní? ʻOku ngali faingataʻa kiate koe ke tui ko Sētane ʻokú ne puleʻi ʻa e māmaní? [Tuku ke ne tali.] Fakatokangaʻi ʻa e ʻuluaki palakalafi ʻi he peesi 6.” Lau ʻa e palakalafí, pea ʻeke leva: “Ko e hā ʻoku fiemaʻu ai ʻe Sētane ke ne kākaaʻi kitautolu?” ʻI he ʻosi hono fai ha tali ʻa e tokotaha-ʻapí, fai ha fetalanoaʻaki ki he palakalafi hono fā ʻi he peesi 3. Te ke hoko atu nai ʻo fakamatalaʻi fakaʻāuliliki ʻa e tulekí, pe te ke loto ke fakahā ʻa e polosiua ko e “Vakai! ʻOku Ou Fakafoʻou ʻa e Meʻa Kotoa Pe” pea fai ha fakamatala ki he palakalafi 29 ʻi he peesi 15.

⁵ ʻOku ʻi ai ʻa e ʻuhinga lelei ke fakakaukau pau ke toe ʻaʻahi kiate kinautolu ʻoku mahuʻingaʻiá lolotonga ʻa e ngāue fakamalangá neongo ko e mahuʻingaʻia siʻisiʻi pē ʻoku hā mai. ʻOku mahuʻinga ke fakahā ʻa e tokanga ki he niʻihi kehé, ke ueʻi hotau lotó ke tokoni kiate kinautolu ke nau ako ʻa e moʻoní. Kuo tokonaki mai ʻe he kautaha ʻa Sihová ʻa e ngaahi tohi mo e ngaahi fakamatala ke fai ke tokoni kiate kitautolu ʻi hono ʻai ke ʻiloʻi ʻe he niʻihi kehé ʻa ʻenau fiemaʻu fakalaumālié.​—Mt. 5:3.

⁶ Kapau naʻá ke fai ha fetalanoaʻaki lelei mo ha taha naʻe hā mei ai ha mahuʻingaʻia siʻisiʻi, ʻoua ʻe taʻetokangaʻi ke toe ʻaʻahi ki ai ke fakautuutu ʻa e mahuʻingaʻiá. ʻE iku nai ki hono kamata ha ako Tohitapu pea ke fokotuʻu ai ha taha ki he hala ki he moʻuí. ʻOku mau fakalotolahiʻi kotoa ke hokohoko atu ke kau loto-tōnunga ʻi he ngāue fakahaofi moʻui ko ʻení.​—1 Tīm. 4:16.