Tokoni ki he Kakai Hangē ha Sipí ke Nau Langa ʻi ha Makatuʻunga Fefeka
1 ʻE fie maʻu ha palani lelei mo e feinga fakamākukanga ʻi hono langa ha fale. ʻI he ʻosi hono tā palani ʻo e falé, kuo pau ke teuteu ʻa e feituʻu ʻe tuʻu aí pea fokotuʻu ha makatuʻunga fefeka. ʻOku kamata ke hā mai ʻa e fakalakalaka ʻa e ngāue ki he langá ʻo aʻu ki hono fakaʻosí. Pehē pē, kuo pau ke tau tokoni ki he kakai hangē ha sipí ke fakalakalaka ʻi hono ako ʻa e moʻoní. ʻOku tau feinga ke langaʻi ʻa e mahuʻingaʻiá ʻi he ʻuluaki ʻaʻahí. Hili ia, ʻoku tau toe ʻaʻahi, ʻo fokotuʻu ʻa e makatuʻungá ʻaki hono akoʻi ʻa e ngaahi moʻoni tefito ʻo kau ki he ʻOtuá mo ʻene taumuʻa ki he kakaí.—Luke 6:48.
2 Ka, ki muʻa ke fokotuʻu ʻa e makatuʻungá, ʻoku fie maʻu ke tau teuteu ʻa e feituʻu ʻe fai ai ʻa e langá, pea ʻoku pehē pē ʻa hono fie maʻu ke fai ha tokanga ki he ngaahi tuʻunga ʻo e toko taha ʻapí. Ko e hā ʻa e kaveinga naʻe fai ki ai ʻa e fetalanoaʻaki ki muʻá? Ko e hā ʻa e ngaahi konga Tohi Tapu naʻe ngāueʻakí? Naʻe fēfē ʻa e anga ʻo ʻene talí? Ko e hā ʻa e tohi naʻe tuku ki aí? ʻI he toe ʻaʻahí, ʻai ke maʻu ʻi he fakakaukaú ʻa e ngaahi poini ʻe niʻihi ke fai ha fetalanoaʻaki ki ai pea fakalakalaka hono langa ʻa e makatuʻungá. ʻI he ʻaʻahi taki taha ʻe tupu ʻo lahi ai ʻa e ʻilo ʻa e toko taha ʻapí pea ʻe fakaʻau ke lahi ange ai ʻa ʻene tui ki he ʻOtuá.
3 Kapau naʻe tuku ʻa e tohi ko e “Moʻui Taʻengatá”, te ke lea pehē ni nai:
◼ “ʻOku ou fiefia ʻi heʻeku toe maʻu mai koe ʻi ʻapi ní. Te ke manatuʻi nai ʻa ʻeta fetalanoaʻaki fakamuimuí, naʻá ta lau ai ki he mōlia atu ʻa e mahuʻingaʻia ʻi he ʻOtuá ʻoku hoko ʻi hotau fonuá ni. ʻOku fakahā mahino ʻe he Tohi Tapú ʻoku mahuʻingaʻia ʻa e ʻOtuá ʻi he kakaí pea ʻe tāpuakiʻi ʻa kinautolu ʻe anga-tonú ʻo fakafou mai ʻi hono Puleʻangá. [Lau ʻa e tohi Mātiu 6:9, 10.] Fakafou mai ʻi he Puleʻanga ko ʻení, ʻe eʻa lahi ʻa e māʻoniʻoní mo e fakamaau totonú.” Lau ʻa e tohi ʻAisea 11:3-5, pea fakahanga ʻa e tokanga ʻa e toko taha ʻapí ki he ʻuluaki palakalafi ʻe ua ʻi he vahe 1 ʻo e tohi ko e Moʻui Taʻengatá. Fakahāhā ʻa e founga hono ako ʻa e fakamatalá.
4 Kapau naʻe tuku ʻi he ʻuluaki ʻaʻahí ʻa e tuleki ko e Māmani Foʻou Melinó, ʻe malava ke toe fai ha lave ki he ngaahi poini tefito naʻe fai ki ai ʻa e fetalanoaʻaki ki muʻá, ʻo kau ki hono fie maʻu ha ngaahi tuʻunga lelei ange pea mo e ngaahi talaʻofa ʻa e Tohi Tapú. Fakamamafaʻi kuo pau ke tau maʻu ʻa e ʻilo kānokano ka tau moʻui ʻi he māmani foʻoú. Lau ʻa e tohi Sione 17:3. Fakamatalaʻi ʻo pehē ʻi he hili hono maʻu ʻa e ʻilo peheé, kuo pau ke tau fai ʻa e finangalo ʻo e ʻOtuá. Lau ʻa e tohi 1 Sione 2:17. Fakahanga ʻa e tokanga ʻa e toko taha ʻapí ki he ngaahi poini ʻe niʻihi ʻi he peesi 5 ʻo e tulekí.
5 Kapau naʻe fakaeʻa ʻa e kaveinga ko e moʻui fakafāmilí ʻi hono tuku ʻa e tohi ko e “Moʻui Taʻengata” ʻi he ʻuluaki ʻaʻahí, te ke lea pehē ni nai:
◼ “ʻI heʻeku ʻi heni fakamuimuí, naʻá ta lāulea ki he kaveinga ko e moʻui fakafāmili. Naʻá ta loto-tatau ko hono maʻu ha moʻui fakafāmili fiefiá, kuo pau ke tau muimui ki he fakahinohino ʻoku maʻu mei he Tohi Tapú. ʻOkú ke fakakaukau ko e hā ʻa e meʻa ʻoku fie maʻú kae lavameʻa ʻa e nofo malí?” Tuku ke ne tali. Fakaeʻa ʻa e ngaahi poini ʻe niʻihi mei he fakamatala ʻoku hā ʻi he peesi 243-6 ʻi he tohi ko e Moʻui Taʻengatá. ʻEke pe ko e hā ʻa e lau ʻa e toko taha ʻapí ki he ngaahi fakatātaá pea fai ʻa e fetalanoaʻakí ki ha ngaahi poini feʻunga kuo filifili. Fakamamafaʻi ʻa e ʻaonga ʻo hono ngāueʻaki ʻa e ngaahi tefitoʻi moʻoni ʻo e Tohi Tapú.
6 Kapau naʻe tuku ʻa e tuleki Fiefia ʻi he Moʻui Fakafāmilí, toe lave ki he ngaahi tefitoʻi moʻoni fakatohitapu ʻoku hā ʻi he peesi 4 mo e 5. Kapau ʻe langaʻi ai ʻa e mahuʻingaʻiá, tuʻuaki ʻa e tohi Moʻui Taʻengatá. Fakahanga ʻa e tokangá ki he vahe 29, “Ko Hono ʻAi Ke Lavameʻa ʻa e Moʻui Fakafāmili,” pea fakahā ʻa e founga ʻe lava ke fai ha fetalanoaʻaki ki ai mo e toko taha ʻapí mo hono fāmilí.
7 ʻOku totonu kiate kitautolu kotoa ke tau kau maʻu pē ʻi hono fai ʻa e ngaahi toe ʻaʻahí. Toe ʻaʻahi kiate kinautolu kotoa pē naʻe hā mei ai ʻa e mahuʻingaʻiá ʻaki hono ʻai ke ola lelei ʻa e ngaahi toe ʻaʻahí he lolotonga ʻo Sēpitemá.