Tokoniʻi ʻa e Niʻihi Kehé ke Nau ʻIloʻi ha Koloa Mahuʻinga
1 ʻI heʻetau malanga ki he niʻihi kehé ʻo kau ki he ongoongo lelei ʻo e Puleʻangá, ʻoku totonu ko e taha ʻo ʻetau ngaahi taumuʻá ke tokoniʻi ʻa kinautolu ʻoku loto-totonú ke nau houngaʻia ki he mahuʻinga lahi ʻo e Folofola ʻa e ʻOtuá. (Fili. 3:8) ʻOku mahuʻinga ʻaupito ʻa ʻetau ngaahi tohi fakatuʻunga ʻi he Tohi Tapú ʻi hono fakamafola ʻa e ongoongo fekauʻaki mo e Puleʻangá. Ko e fakatātā, kuo tokoniʻi ʻe he tohi ko e Moʻui Taʻengatá ʻa e laui kilu ʻo e kakaí ke nau fai tauhi kia Sihova koeʻuhi ko e ngaahi moʻoni mei he Tohi Tapú kuo nau ako ki aí.
2 ʻOku ʻikai ke ngata pē ʻa ʻetau ngāue fakamalangá ʻi hono tuku ʻa e ngaahi tohí ʻi ha taha ʻoku loto ke ne maʻu ia. ʻOku fie maʻú ke tau fakahoko ʻa e pōpoakí ʻi ha founga fakamānako, fanongo mo tokanga ki he meʻa ʻoku leaʻaki ʻe he toko taha ʻapí, pea ke mateuteu ke ‘fakalotoʻi ia ʻaki hono ngāueʻaki ʻa e Tohi Tapú.’—Ng. 17:2.
3 ʻE Fēfē Hano Fai Ia? ʻE malava ke fakaʻatā ʻe heʻetau ngaahi lea kamatá ke fakahā ʻe he toko taha ʻapí pe ʻokú ne mahuʻingaʻia moʻoni ʻi he Tohi Tapú mo hono pōpoakí.
Te ke lea ʻo pehé ni nai:
◼ “ʻOku mau ʻaʻahi mai ke fetalanoaʻaki ki he ʻuhinga ʻo e ngaahi meʻa ʻoku hoko takatakai kiate kitautolu he ʻahó ni. ʻI he lotolotonga ʻo e kakai tokolahi ʻoku fakaʻau ke mōlia atu ʻa e mahuʻingaʻia ʻi he ʻOtuá mo ʻene ngaahi tuʻunga ki he founga moʻui ʻa ia ʻoku fakahā ʻi he Tohi Tapú. Kuo uesia lahi ʻe he meʻá ni ʻa e anga ʻo e fakakaukau ʻa e kakaí ki he niʻihi kehé. Kuó ke fakatokangaʻi ʻa e meʻá ni? [Tuku ke ne tali. Te ke lave nai ki ha ngaahi meʻa ʻoku hoko moʻoni.] Fakatokangaʻi muʻa ʻa e anga ʻo e fakakaukau ʻa kinautolu ʻoku lave ki ai ʻi he 2 Tīmote 3:1-5, pea ke tala mai pe ko e meʻa ʻeni ʻokú ke fakakaukau ʻoku hoko ʻi he māmaní he ʻahó ni. [Lau; pea tuku ke fai haʻane fakamatala.] ʻOku ʻi ai ha ʻuhinga lelei ke ʻamanekina ʻe toe ʻi ai ha tuʻunga lelei ange ʻi he kahaʻú?” Kapau ʻe hā mai ʻoku ʻi ai ha mahuʻingaʻia, sio ki he fakatātā ʻi he peesi 12 mo e 13 ʻo e tohi Moʻui Taʻengatá pea fakahanga ʻa e tokangá ki he palakalafi 12 mo e 13. Kapau ʻoku ʻikai ke loko mahuʻingaʻia, ʻe tuʻuaki leva ʻa e tuleki ko e Māmani Foʻou Melinó.
4 Kapau te tau lea ki ha taha ʻo e ongo mātuʻá, te tau kamata nai ʻa e fepōtalanoaʻakí ʻi he founga ko ʻení:
◼ “ʻOku mau talanoa ki he kakai ʻa ia ʻoku nau mahuʻingaʻia ki he founga ʻe lava ke fekuki lelei ange ai mo e ngaahi palōpalema ʻo e moʻui fakafāmilí. ʻOku tau feinga kotoa pē ki he lelei taha te tau malavá, ka ʻo kapau ʻoku ʻi ai ha meʻa te ne malava ke tokoniʻi kitautolu ke tau lavameʻa lelei ange, ʻikai ʻoku tau mahuʻingaʻia ai? [Tuku ke ne tali.] ʻOku maʻu mei he Tohi Tapú ha fakahinohino ki he meʻá ni ʻa ia ʻoku ʻasi ʻi he tohi Kolose 3:12-14. [Lau.] Ko ia, ko e hā ʻa e meʻa ʻoku fie maʻu kae lavameʻa ʻa e moʻui fakafāmilí? Fakatokangaʻi ʻa e fakamatala ʻi he tohí ni ʻi he vahe ko e ‘Ko Hono ʻAi ke Lavameʻa ʻa e Moʻui Fakafāmili.’” Lau ʻa e palakalafi 3 ʻi he peesi 238 ʻo e tohi Moʻui Taʻengatá. Kapau ʻoku femoʻuekina ʻa e toko taha ʻapí pe ʻikai ke fuʻu loko loto-lelei ke fai ha talanoa, feinga ke tuʻuaki ʻa e makasini fakamuimui ʻoku lāulea ki he ngaahi meʻa fakafāmilí pe ko e tuleki Fiefia ʻi he Moʻui Fakafāmili.
5 ʻOku totonu ke ʻoua ʻaupito ʻe mōlia atu meiate kitautolu ʻa e taumuʻa ko e fai fakamoʻoni fakaʻāuliliki fekauʻaki mo e Puleʻangá. (Mt. 24:14) ʻI hono ngāueleleiʻaki ʻa e Tohi Tapú mo e ngaahi tokonaki fakaofo ko e ngaahi tohi fakateokalati ʻoku tau ala maʻú, te tau falala kia Sihova ke maʻu ʻene tāpuakí ke lavameʻa ʻi he fai hono finangaló lolotonga ʻa e ngaahi taimi mahuʻinga ko ʻení.—Kal. 6:9.