Ko Hono Fai ha Ako Tohi Tapu ʻi he Ngaahi ʻApí
1 ʻOku fēfē hano fai ha ako Tohi Tapu ola lelei ʻi he ngaahi ʻapí? Ko e hā ʻa e faʻifaʻitakiʻanga tefito ʻoku tau maʻú? ʻOku tonu ke fēfē ʻa e lave ki he ngaahi konga Tohi Tapu ʻoku hā ʻi he fakamatalá? Ko hai ʻoku totonu ke ne lau ʻa e ngaahi palakalafí? Tānaki atu ki he founga tefito hono fai ʻa e akó, ko e hā ʻa e toe meʻa ʻoku fie maʻú ke tokoni ki he toko taha akó ke ne tui moʻoni ʻa ia tonu ki he moʻoní? Ko e hā ʻa e ngaahi tōʻanga kuo pau ke fakaʻehiʻehi mei ai?
2 Ko e Founga Hono Fai ha Akó: ʻI he taimi lahi, ʻoku fai ha ako Tohi Tapu ʻo muimui ʻi he founga ʻo e Ako Taua Leʻó. ʻUluaki, ʻoku lau ʻa e palakalafi ʻe fai ai ʻa e fetalanoaʻakí. Pea hili ia ʻe ʻeke ʻe he toko taha ʻokú ne fai ʻa e akó ʻa e fehuʻi kuo pulusi ʻa ia ʻoku kaunga ki he palakalafí peá ne tuku ki he toko taha akó ke ne tali. Kapau ʻoku toumoua ʻa e toko taha akó, ʻoku totonu ke mateuteu ʻa e toko taha faiakó ke ne ʻeke ha ngaahi fehuʻi ke fakatupunga ʻi he toko taha akó ʻa e fakakaukau ki he fakamatalá pea fakamulituku ki ha tali ʻoku totonú.
3 Fakakaukau ki he kaunga ʻo e ngaahi konga Tohi Tapú ki he fakamatala ʻi he palakalafí. Fakahā ki he toko taha akó ʻa e founga te ne ʻilo ai ʻa e ngaahi konga Tohi Tapu kuo hiki fakaikiiki ʻi he palakalafí, pea ʻai ia ke ne fakakaukau ʻo kau ki he kaunga ʻo kinautolú. Kapau ʻoku hā ha ngaahi konga Tohi Tapu ka ʻoku ʻikai ke hiki fakaikiiki, ʻoku lelei ke vakai ki he Tohi Tapú, tuku kehe pē kapau ko e konga fuʻu lōloa. Pea tuku ki he toko taha akó ke ne lau ʻa e ngaahi konga Tohi Tapú pea ke ne fakamatala mai pe ʻoku pouaki pe fakamaʻalaʻala fēfē ʻe he ngaahi konga Tohi Tapú ʻa e meʻa ko ia ʻoku hā ʻi he palakalafí.
4 Tokoni ki he Toko Taha Akó ke Ne Tui Moʻoni ʻa ia tonu ki he Moʻoní: Fakalototoʻaʻi ʻa e kau akó ke nau teuteu lelei ki he akó. Fakamamafaʻi ʻoku mātuʻaki mahuʻinga ʻa e lau tohí ki he akó. Ko e lahi ange ʻo hono lau mo e fakalaulauloto ʻe fai ʻe he toko taha akó ki he fakamatala te ne ako ki aí, ʻoku toe lahi ange ai hono ʻaonga kiate iá. Ko e kau faiako ʻe niʻihi ʻoku nau tuku ki he toko taha akó ke ne lau kotoa ʻa e ngaahi palakalafí ʻi he lolotonga ʻa e ako Tohi Tapú. Ko e niʻihi kehe ʻoku nau taufetongi mo e toko taha akó ʻi hono lau ʻa e ngaahi palakalafí. ʻOku totonu ke ngāueʻaki ʻa e fakakaukau leleí, ʻo tokanga maʻu pē ki he laka ki muʻa fakalaumālie ʻa e toko taha akó.
5 ʻE tokoni nai ʻa hono fai ʻa e akó ʻi he founga ako fakamāmaní ki he toko taha akó ke ne maʻu ai ʻa e ʻiló, ka ʻokú ne tui ki he meʻa ko ia ʻokú ne ako ki aí? Ke ne hoko ʻo tui moʻoni ʻa ia tonu ki he moʻoní, kuo pau ke ne sio ki he kaunga ʻo e fakamatalá kiate ia tonu. ʻOku fēfē ʻene fakakaukau ʻo kau ki he meʻa ʻokú ne ako ki aí? ʻE lava fēfē ke ne ngāueʻaki ʻa e meʻa kuó ne akó? Ngāueʻaki ha ngaahi fehuʻi fakatupu fakakaukau ke ke aʻu ki he loto ʻo e toko taha akó.
6 Fakaʻehiʻehi mei he Ngaahi Tōʻanga: ʻOku ʻi ai ʻa e ngaahi tōʻanga ke fakaʻehiʻehi mei ai ʻi hono fai ha ako Tohi Tapu. ʻI hono ʻohake ha kaveinga ʻoku ʻikai haʻane fekauʻaki mo e fakamatala ʻoku fai ai ʻa e akó, ʻoku faʻa lelei pē ke toki fai ha lāulea ki ai ʻi he fakaʻosi ʻo e akó pe ko ha toe taimi kehe. ʻIkai ko ia pē, ʻoku mahuʻinga ke fai ʻe he toko taha akó ʻa e talí ʻi heʻene lea pē ʻaʻana kae ʻikai ko e lau pē mei he tohí. ʻE tokoni ʻeni kiate koe ko e toko taha faiakó ke ke fakapapauʻi pe ʻoku mahino ki he toko taha akó ʻa e fakamatala ʻoku fai ai ʻa e akó.
7 Fēfē ke ke ʻai ia ko hoʻo kolo ke fai ha ako Tohi Tapu ʻe taha? ʻOku ʻikai ko ha meʻa faingataʻa ia kapau te ke falala kia Sihova pea muimui ki he ngaahi founga tefito ʻoku fai ʻi he Ako Taua Leʻó. Ko e founga ola lelei taha ke akoʻi ai ʻa e moʻoní ki ha niʻihi kehe pea mo hono ngaohi ʻa e kau ākongá ko hono fai ha ako Tohi Tapu ʻi he ngaahi ʻapí. ʻI hono fai ʻení, te ke kau foki mo koe ki he fiefia ʻoku maʻu mei he kau kakato ʻi hono fakahoko ʻa e fekau ʻa Sīsū ʻi he Mātiu 28:19, 20.