Ko e Tokanga ki he Ngaahi Fie Maʻu Fakalaumālie ʻa e Kau Tulí

¹ ʻOku fakautuutu ʻa e tokolahi ʻo e faʻahinga ʻoku tuli kuo tohoaki mai ki he Tauhi-Sipi Leleí pea kuo nau hoko ki he tuʻunga ʻo e vahaʻangatae fakatapui mo Sihova ko e ʻOtuá. (Sione 10:​3, 11) Ko e niʻihi kehe ʻi he fakatahaʻangá, tautefito ki he kau mātuʻá, kuo pau ke nau tokanga ki he ngaahi fie maʻu fakalaumālie ʻa hotau ngaahi tokoua mo e tuofāfine ʻoku nau tulí.

² Tokonaki ʻa e Ngaahi Fie Maʻu ʻa e Kau Tulí: ʻOku fai ʻa e ngaahi fokotuʻutuʻu ke fakamatalaʻi ʻa e ngaahi fakataha ʻa e fakatahaʻangá ʻaki ʻa hono fakatonu lea ʻaki ʻo e nimá ki he kau tulí ʻo ka ʻoku maʻu ha toko taha taau ʻi he meʻa pehē. Kapau ʻoku ʻikai ha toko taha ia ʻi he fakatahaʻangá ʻoku poto ʻi he lea ʻaki ʻa e nimá ki he kau tulí, ʻe feʻunga nai ke ʻave ʻa e kakai ʻoku tulí ki he fakatahaʻanga ofi mai ʻoku malava ke nau fai ʻa e ngāue ko ʻení. Ko e moʻoni, kapau ʻoku ʻikai ke ʻi ai ha fokotuʻutuʻu pehē ia ʻi he feituʻu ʻokú ke kau ki aí, ʻe malava ke vaheʻi ha kau malanga ke nau tangutu fakataha mo e kau tulí ʻo hiki kiate kinautolu ʻa e ngaahi fakamatala ʻo e ngaahi poini tefito ʻoku fai ki ai ʻa e fakamatalá.

³ Ngaahi Fokotuʻutuʻu Fakafeituʻu mo e Fakaefakatahaʻanga: ʻOku fai ʻa e ngaahi fokotuʻutuʻu ki hono fakatonu lea ʻaki ʻa e nimá ki he kau tulí ʻi he ngaahi fakataha fakafeituʻú mo e ngaahi fakataha ʻaho makehé ʻo fakafou ia ʻi he ʻovasia fakafeituʻú. Ko ha toko taha ʻo e kau mātuʻá pe ha sevāniti alafua ʻe fili nai ke ne tokangaʻi. Ko e ngaahi tokoua mo e tuofāfine ala faʻifaʻitakiʻanga mo alafuá ʻe lava ke vaheʻi ke nau kau ki he fakatonu lea ki he kau tulí ʻi he polokalama ʻo e fakatahá. Ko e tefitoʻi moʻoni tatau pē ʻe lava nai ke ngāueʻaki ʻi he fakatahaʻangá, ke fakapapauʻi ʻoku tokangaʻi fakalelei ʻa e ngaahi fie maʻu ʻa e kau tulí.

⁴ ʻOku lelei ange ki he kau tulí ke nau nofo ʻi ha feituʻu ʻe lava ai ke nau sio lelei ki he siteisí mo e toko taha fakatonu lea ʻaki ʻa e nimá. ʻOku fakatou ʻaonga ʻeni ki he ngaahi fakataha ʻi he fakatahaʻangá mo e ngaahi fakataha fakafeituʻú. ʻI he ngaahi fakataha ʻa e fakatahaʻangá ʻe lelei ange ke tangutu pē ʻa e toko taha fakatonu lea ki he kau tulí kapau ʻoku tokosiʻi pē ʻa e kau tulí. Kapau ʻoku malava, ʻoku fakalototoʻaʻi ʻa e kau mātuʻá ke nau fakaʻekeʻeke ki ha tokoua matuʻotuʻa ʻoku tuli ki ha ngaahi fokotuʻutuʻu pau ʻo fekauʻaki mo e tangutuʻangá.

⁵ Kapau ko e toko taha fakatonu lea ʻaki ʻa e nimá ko ha toko taha ia ʻo e kau mātuʻá pe ko ha sevāniti pea ʻoku toko lahi ʻa e ngaahi tokoua mo e tuofāfine ʻoku tulí, ʻe fili nai ʻe he kau mātuʻá ke fai ha ngaahi fakataha maʻá e kau tulí pē. Ko e Ako Tohi Fakaefakatahaʻangá ko e fakataha ia ʻe lelei nai ke ʻuluaki fokotuʻu ke fai ai ia. Kapau ʻe loto ʻa e fakatahaʻangá ke fai ha taha ʻo e ngaahi fakataha ʻe nima fakauiké ki he kau tulí pē (pe ko ha lea kehe pē mei he lea faka-Pilitaniá), ʻoku totonu ke fakahā leva ʻe he kau mātuʻá ki he Sosaieté ʻa honau lotó. ʻOku totonu ke fakatokangaʻi ko e American Sign Language ko e lea ia ʻoku saiʻia lahi taha ai ʻa e kakai lahi ʻoku tuli ʻi he ʻIunaite Seteté mo hono ngaahi feituʻu; ʻoku ʻi ai pē ʻa e lea ʻaki ʻa e nimá kehe ʻi he ngaahi fonua kehe.

⁶ ʻOku totonu ke feinga ʻa e memipa kotoa pē ʻo e fakatahaʻangá ke nau fealāangaʻaki koeʻuhi ke nau lava ʻo fefakalototoʻaʻaki, neongo ko e fetuʻutaki ʻi he kau tulí mo e faʻahinga ʻoku ʻikai ke tulí ʻe fie maʻu ha ngaahi feinga makehe fakatouʻosi ʻi he ongo kulupú. (Hep. 10:24) Ko e ʻasi ʻa e loto ko ʻení ʻi he lotolotonga ʻo e ngaahi tokouá ʻe hoko ia ke ongoʻi ai ʻe he kau foʻou kotoa pē ʻoku talitali lelei kinautolu.