Kamata ha Ngaahi Ako Tohi Tapu he Lolotonga ʻo Tisemá
1 Naʻe fekau ʻe Sīsū ki heʻene kau ākongá ke nau hoko ko e kau faiako ʻo e ongoongo leleí. (Mt. 28:19, 20) Ko ʻetau founga tefito ke akoʻi ai ha niʻihi kehe ko hono fai ʻo e ngaahi ako Tohi Tapu. ʻOkú ke kau ki he ngāue ko ʻení? Kapau ʻoku ʻikai, ʻe lava fēfē ke ke kamata ha ako koeʻuhi ke ke maʻu ʻa e fiefia ʻi he kau lahi ange ki hano akoʻi ha niʻihi kehe?
2 Mahalo pē naʻa tau ʻoange ki he toko taha ʻapí ha tuleki pea naʻa tau fakahā ange te tau toe foki ke fai ha fetalanoaʻaki ʻo kau ki ai.
ʻI he toe ʻaʻahi ki ha toko taha ʻapi ʻa ia naʻa tau tuku ai ʻa e tuleki ko e “ʻE Kei Tuʻu ʻa e Māmani ko Ení?,” te tau lea pehē ni nai:
◼ “ʻI heʻeku ʻi heni ʻi he ngaahi ʻaho siʻi kuo maliu atú, naʻá ta talanoa ki he tuʻunga fakavavevave ʻo hotau taimí pea naʻe fakamatalaʻi fakapatonu mai ʻe Sīsū ʻa e ngaahi tuʻunga ʻoku lolotonga hoko ʻi hotau ngaahi ʻaho ní. Te u toe fiefia ke fakamoleki ha kiʻi taimi siʻi ke fai ha fetalanoaʻaki nounou ki ha fakamatala mei he tuleki ko ia naʻá ku tuku maʻaú. Fakatokangaʻi ʻa e fakamatala ʻi he kaveinga tokoni ‘Ko e Fakaʻilonga.’” Hukeʻi ki he peesi 3 ʻo e tulekí, pea fai ha fetalanoaʻaki ʻi he ʻuluaki palakalafi ʻe ua pe tolu ʻi he kaveinga ko iá, ʻo lau ʻa e ngaahi konga Tohi Tapu ʻoku ʻikai hiki fakaʻāuliliki maí ʻo ka ʻoku feʻunga ʻa e taimí. Fakaeʻa ʻa hono fakahoko moʻoni ʻo e kikite ʻa Sīsuú ʻi hotau ʻahó ni. Fai ha alea ke toe ʻaʻahi ki ai ke fai ha fetalanoaʻaki ki he ngaahi palakalafi kehe ʻi he kaveinga tokoni pē ko iá. Fakalototoʻaʻi ʻa e toko taha ʻapí ke ne lau ʻa e konga ko iá ki muʻa ʻi hoʻo toe ʻaʻahi atú.
3 Pe te ke lea pehē ni nai:
◼ “ʻI heʻeta talanoa fakamuimuí, naʻá ku tuku atu ʻa e tuleki ko hono kaveingá ko e ʻE Kei Tuʻu ʻa e Māmani ko Ení? ʻI heʻeta talanoa ko iá naʻá ta lave ai ki he fekauʻaki ʻa e tuʻunga ʻo Sīsū Kalaisí ki he ngaahi meʻa ʻo e māmaní. Te ta lau ʻene lea ko ia ʻoku hā ʻi he Tohi Tapú ʻi he Sione 17:3. [Lau.] Koeʻuhi ʻoku ʻikai ala tuku ʻetau ako ʻo kau ki he ʻOtuá mo Sīsū ʻo kapau ʻoku tau loto ke tau moʻui taʻe ngata, ʻoku ʻaonga leva ke fai ʻa e meʻa te tau malava ke maʻu ai ʻa e ʻilo ko iá. ʻI he ʻi māmani ai ʻa Sīsuú, naʻe hā meiate ia ʻa e ngaahi ʻulungāanga fakaofo ʻo e ʻOtuá. ʻIkai ʻoku ʻuhinga lelei ke tui ko e lahi ange ʻo ʻetau maʻu ʻa e ʻilo ʻo kau kia Sīsū mo ʻene ngāue fakamalangá, ko e toe lahi ange ia ʻa ʻetau maʻu ʻa e ʻilo ʻo kau ki heʻene Tamaí? [Tuku ke ne tali.] Ko e tohi ko ʻení, Te Ke Malava ʻo Moʻui Taʻengata he Palataisi ʻi he Māmaní, te ne tokoniʻi koe ke ke maʻu ʻa e meʻa tofu pē ko iá. Fakamamafaʻi ko e tohí ni ʻoku ʻi ai ʻa e ngaahi fakamatala ʻo kau kia Sīsū pea mo ʻene Tamaí fakataha mo e ngaahi meʻa lahi naʻe akoʻi ʻe Sīsū ʻa ia ʻoku lava ke tokoniʻi ai kitautolu ke maʻu ʻa e ʻilo ʻoku fie maʻu kae maʻu ʻa e moʻui taʻe ngatá. Lave ki he ngaahi kaveinga ʻe niʻihi ʻo e ngaahi vahé mo e ngaahi fakatātaá. Kapau ʻoku fie fanongo moʻoni ʻa e toko taha ʻapí, tuʻuaki ʻa e tohí.
4 ʻI he ʻosi ʻa e fakafeʻiloaki ki he toko taha ʻapi ʻa ia naʻá ne tali ʻa e tohi “Moʻui Taʻengata” te ke lea pehē ni nai:
◼ “Hangē ko ia naʻá ku lave ki ai ʻi heʻeku ʻuluaki ʻaʻahi maí, kuo faʻu ʻa e tohi ko e Moʻui Taʻengatá ke fai ai ha ako Tohi Tapu. Pea te u fiefia ke fakahāhā nounou ʻa e founga ki hono ngāueʻaki lelei taha iá.” Fakaava ʻa e tohí ki he vahe 1, “Ko e Moʻui Taʻengatá ʻOku ʻIkai ko ha Misi Pē.” Fakahanga ʻa e tokanga ʻa e toko taha ʻapí ki he ngaahi fehuʻi kuo pulusí. Lau ʻa e fehuʻi ʻuluakí mo e uá, pea fai ha fetalanoaʻaki ki he ʻuluaki ongo palakalafí. Fakafekauʻaki mo e fakatātā ʻi he peesi hono uá. Hoko atu ki he ngaahi fehuʻi ʻoku toé, pea fakaeʻa ʻa e ngaahi talí ʻo ka ʻoku kei taimi. Ki muʻa ke fakangata ʻa e ʻaʻahí, fokotuʻutuʻu ki ha toe ʻaʻahi ke hoko atu ʻa e fetalanoaʻakí.
5 ʻI hono tauhi maʻu ha fakakaukau pau, teuteu lelei, pea ngāueʻaongaʻaki ʻa e ngaahi faingamālie kotoa pē, te tau mateuteu lelei ai ke kamata ha ako Tohi Tapu he lolotonga ʻo Tisemá.