Kamata ha Ngaahi Ako Tohitapu ʻi he Ongo Kiʻi Tohi “Ko e Ongoongo Lelei” mo e “Nofo ʻAmanaki”
1 Ko hono fai ha ako Tohitapu ko e meʻa fakatupu fiefia mo fiemālie ia fakatouʻosi kiate koe mo e tokotaha-ʻapí. ʻOku ʻikai ala fakatataua ʻa e fiefia ʻi hono vahevahe atu ʻo e ʻilo ʻo e Tohitapú ki ha niʻihi kehe.—Pal. 11:25.
2 Fakaʻilonga ʻo e Ngaahi ʻAho Fakaʻosí: Kapau naʻá ke ngāueʻaki ʻa e fokotuʻu ʻi he kupu ʻi ʻolungá pea kamataʻaki hoʻo fetalanoaʻakí mei he tuleki ʻE Kei Tuʻu ʻa e Māmani ko Ení?, te ke lava fēfē ʻo kamata leva ha ako ʻo ngāueʻaki ʻa e kiʻi tohi “Ko e Ongoongo Lelei.” Fakaava ʻa e kiʻi tohí ki he peesi 20, pea lau ʻa e palakalafi 31 mo e 32. ʻE lava ke ke ʻeke nai ʻa e fehuʻi ʻi laló. Tokoniʻi ʻa e tokotaha-ʻapí ke ʻai ke fakatupu fakakaukau ʻo maʻu ʻa e mahino ki he talí. ʻI he ʻosi hono lau ʻa e palakalafi hono 32, ʻeke ʻa e fehuʻi ʻi laló. Kapau ʻe hā mai ʻoku mahuʻingaʻia ʻa e tokotaha-ʻapí pea ʻoku faingamālie pē, hoko atu ʻa e fetalanoaʻakí.
3 Kapau ʻe hā ʻoku sai ange ke toe fai ʻa e fetalanoaʻakí ʻi ha taimi ʻe faingamālie ange ki he tokotaha-ʻapí, te ke ʻeke nai: “Te ke saiʻia ke lahi ange hoʻo ʻilo ʻo kau ki he taimi ʻe hoko mai ai ʻa e ngataʻanga ʻo e ngaahi meʻa ʻoku tuʻú ni?” Te ke toki fokotuʻu nai ke ke toe ʻaʻahi mai ke tali ʻa e fehuʻí.
4 ʻE Malava ke ʻI Ai ha Māmani Melino? Kapau naʻá ke ngāueʻaki ʻa e tuleki ko e Moʻui ʻi ha Māmani Foʻou Melino ke tataki ki he kiʻi tohi “Nofo ʻAmanaki ki he Maama Foʻou Maʻoniʻoni,” ʻe lava fēfē ke tokoni ʻa e palakalafi 3 ʻo e kiʻi tohí ke kamata ha ako Tohitapu?
ʻI he ʻosi hono lau ʻo e 2 Pita 3:13, te ke lau pe fakamatala nounou nai ʻa e palakalafi hono ua ʻi he peesi 3 ʻo e tulekí pea ke lea ʻo pehē:
◼ “Ko Sīsū Kalaisi, ko e ʻAlo ʻo e ʻOtuá, te ne hoko ko e Tuʻi ia ʻo e Puleʻanga ʻo Sihová. Fakatokangaʻi ʻa hono fakamatalaʻi ʻe he kiʻi tohi ko eni ko e “Nofo ʻAmanaki ki he Maama Foʻou Maʻonʻoni” ʻa e meʻa ʻe fai ʻe Sīsū ʻi he kahaʻú.” Pea lau ʻa e palakalafí. ʻEke ki he tokotaha-ʻapí ʻa e ʻuluaki fehuʻi ʻi laló. Pea toki ʻeke ange ki he tokotaha-ʻapí: “Te ke saiʻia ke hoko ko ha konga ʻo e māmani foʻou ʻa ia ʻe pule ki ai ʻa Sīsū ko e Tuʻí? [Tuku ke ne tali] Te u saiʻia ke maʻu ha faingamālie ʻi he uike taki taha ke tokoni kiate koe ke ke sio mei he Tohitapú pe ʻe lava fēfē ke hoko tonu kiate koe ʻa e meʻá ni.”
5 ʻOku kei ʻi ai ʻa e kakai loto-totonu tokolahi ʻoku nau ʻofa ki he māʻoniʻoní pea ʻoku nau kumi atu ki ha ngaahi fakaleleiʻanga ki he ngaahi palopalema ʻoku nau fehangahangai mo iá. Ko e moʻoni, ko e vahevahe atu ʻa e ngaahi akonaki ʻa Sīsū Kalaisí fakafou ʻi he ako Tohitapú ko e ngāue mātuʻaki fakatupu fiemālie ia.