Ko e Ngāue ʻi he Feituʻu ʻOku Toutou Ngāueʻí
1 ʻOku tau fiefia ʻi he maʻu ʻa e ngaahi fakamatala ʻo pehē ʻoku lahi ʻa e ngaahi fakatahaʻanga ʻoku nau toutou ngāueʻi honau feituʻú. (Mt. 24:14; 1 Tīm. 2:3,4) Neongo ʻe hoko ia ko e ngāue faingataʻa, ʻoku fakahā ʻe he ngaahi meʻa kuo hokosiá ʻe malava ke lavameʻa ʻo kapau te tau mateuteu lelei ke lavaʻi ha faʻahinga tuʻunga pē ʻe lava ke hokó.
2 Ko e Meʻa Tefitó ko e Lea Kamata Ola Lelei: ʻOku mātuʻaki mahuʻinga ke mateuteu ke ngāueʻaki ha taha pe lahi ange ʻo e ngaahi lea kamata kuo fakakaukauʻi lelei. ʻOku totonu ke fakakau atu ki ai ʻa e ngaahi fakamatala mahino ki he ʻuhinga mātuʻaki mahuʻinga ʻo ʻetau toutou ʻaʻahí.
3 ʻOku ʻi ai ʻa e ngaahi fakatātā lelei lahi ʻo e ngaahi lea kamata feʻunga mālie ke ngāueʻakí ʻi he tohi Reasoning. ʻI he peesi 15 ʻoku fakahokohoko ai ʻa e meʻa ʻe tolu ʻi he kaveinga ko e “In Territory Often Worked.” ʻAhiʻahiʻi ʻa e niʻihi te ke saiʻia ke ngāueʻaki ʻi hoʻo kauhalá.
4 ʻOku lavameʻa ʻa e kau malanga ʻe niʻihi ʻi hono ngāueʻaki ʻa e ngaahi konga mei he nusipepa fakalotofonuá ke kamata ʻaki ha fetalanoaʻaki ʻi he ngaahi feituʻu ʻoku toutou ngāueʻí. ʻOku fakahā ʻe he fakatātā ʻe tolu ʻi he tohi Reasoning ʻa e founga ki hono fai ʻa e meʻá ni. Fakakaukau ki he lea kamata hono ua ʻi he kaveinga ko e “Crime/Safety” ʻi he peesi 10 mo e ʻuluaki lea kamata ʻe ua ʻi he kaveinga ko e “Current Events” ʻi he peesi 10 mo e 11.
5 Ko ha Ngaahi Lea Kamata ʻOkú Ke Teuteu: Ongoʻi tauʻatāina ke fokotuʻu mo ngāueʻaki ha ngaahi lea kamata feʻunga mālie ʻo maʻu ha sīpinga ki ai mei he ngaahi lea kamata ko ia ʻoku hā ʻi he tohi Reasoning. Leaʻaki ia ʻi hoʻo founga mo e lea pē ʻaʻau. Te ke ʻahiʻahiʻi nai ia mo ha toko taha malanga taukei ki muʻa pea ke ngāueʻaki ʻi he malanga fale ki he falé.
6 Ko e fakatātā, te ke leaʻaki nai ha meʻa hangē ko ʻení:
◼ “Talu ʻemau ʻaʻahi fakamuimui maí, [fakahā ha meʻa naʻe toki hoko ʻoku fetalanoaʻaki ki ai ʻa e kakai ʻo e feituʻú]. Koeʻuhi ʻoku uesia kitautolu kātoa, ʻoku tokolahi ʻa e faʻahinga ʻi hotau ngaahi kaungāʻapí kuo nau fakahā ʻenau loto-hohaʻa lahi. Mahalo pē kuó ke fakakaukau foki ki ai. [Kiʻi longo kae ʻi ai ha tali nai.] Koeʻuhi ko e ngaahi tuʻunga ʻi he māmaní he ʻahó ni, ʻikai nai te ke loto-tatau mo ia naʻe tohi ʻe he palōfita ko Selemaiá ʻi he Sel vahe 10 veesi 23” ʻI he ʻosi hono lau ʻa e konga Tohi Tapú, ʻai ke fakamatala mai ʻa e toko taha ʻapí pe ko e hā haʻane lau, pea fakahanga ʻa e tokangá ki ha konga Tohi Tapu ʻokú ne fakahā ai ʻa e founga ʻe fakaleleiʻi ai ʻe Sihova ʻa e palōpalema ʻoku fai ki ai ʻa e fetalanoaʻakí.
7 Pe ko hoʻo lea pehē ni nai:
◼ “ʻOku ʻikai ha veiveiua ʻokú ke ʻilo ʻa e meʻa naʻe fakahā ʻi he ongoongó he ʻahó ni [fakahā ʻa e meʻa naʻe hokó]. Te ke loto-tatau nai ko e meʻá ni ʻokú ne uesia kitautolu kotoa. [Kiʻi longo kae ʻi ai ha tali nai.] ʻOku lava ke tau ʻamanaki ʻe fokotuʻu mai ʻe he ngaahi mafai māʻolungá ha fakaleleiʻanga fakataimi; kae kehe, ʻoku fakahā ʻe he Tohi Tapú ʻa e founga ʻe fakaleleiʻi ʻo taʻe ngata ai ʻa e palōpalemá.” Fakahanga ʻa e tokangá ki ha konga Tohi Tapu ʻokú ne fakamatalaʻi ʻa e meʻa ʻoku pau ke fai ʻe he ʻOtuá.
8 “Ko e Hā ʻOku Mou Toutou ʻAʻahi Aí?” ʻOku ʻi ai ʻa e ngaahi tali feʻunga mālie ki he meʻa ko ʻeni ʻe taʻofi nai ai ʻa e fetalanoaʻakí ʻi he tohi Reasoning ʻi he peesi 20 ʻi he kaveinga ko e “Why Do You People Call So Often?” Neongo ʻoku ʻikai ke ʻekeʻi, te tau malava ʻo fai ha fakamoʻoni lelei kapau te tau ngāueʻaongaʻaki ʻa e ngaahi faingamālie feʻunga ke tokoni ki ha niʻihi kehe ke nau maʻu ʻa e mahino ko e ʻofa moʻoni ki he ʻOtuá mo e kaungāʻapí ʻokú ne ueʻi kitautolu ke tau toutou ʻaʻahi ʻi he faingamālie kotoa pē. Ko ha fetalanoaʻaki ki he ngaahi lea ʻa Sīsū ʻi he tohi Sione 21:15-17 ʻe hoko nai ʻo mātuʻaki ʻaonga ʻi he tuʻunga ko ʻení.
9 ʻAi ke tau hokohoko atu ke lavaʻi ʻa e ngāue faingataʻa ko e ngāue ʻi he feituʻu ʻoku toutou ngāueʻí, kae ʻoua kuo folofola mai ʻa Sihova kuo feʻunga. ʻI he maʻu ʻa e loto-ʻalovili peheé, ʻoku fakapapauʻi mai ʻe Sihova ʻa ʻene tataki, maluʻi, mo e tāpuaki ʻo aʻu ki he ngataʻanga.—Mt. 28:19, 20.