Lea Kamata Ola Lelei ki he Tohi Moʻui Taʻengata
1 Naʻe pōtoʻi ʻa Sīsū ʻi heʻene ngāueʻaki ʻa e ngaahi lea kamatá. Naʻá ne ʻilo ʻa e meʻa ʻe leaʻakí ke langaʻi ʻaki ʻa e mahuʻingaʻiá. ʻI he taimi ʻe taha naʻá ne kamata ha fetalanoaʻaki mo ha fefine Samēlia ʻaki pē haʻane kole vai inu. Naʻe maʻu leva ʻe he meʻá ni ʻa e tokanga ʻa e fefiné koeʻuhi he ‘naʻe ʻikai feangainga ʻa e kau Siú mo e kau Samēliá.’ Naʻe faifai atu pē ʻa e fetalanoaʻakí pea naʻe tokoniʻi ai ʻa e fefiné mo e niʻihi kehe tokolahi ʻo nau hoko ko e kau tui. (Sione 4:7-9, 41) ʻOku lava ke tau ako mei heʻene faʻifaʻitakiʻangá.
2 ʻI he teuteu ke tuʻuaki ʻa e tohi Moʻui Taʻengata, ʻeke pē kiate koe, ‘Ko e hā ʻoku tokanga ki ai ʻa e kakai ʻi hotau kauhalá? Ko e hā ʻe fakamānako ki ha talavou, ki ha tokotaha taʻumotuʻa, ha husepāniti, pe ha uaifi?’ ʻOku lava ke ke teuteu ha lea kamata ʻo lahi ange he tahá pea teuteu ke ngāueʻaki ʻa e lea kamata ʻe ngali feʻunga taha ki he tuʻunga ko iá.
3 Koeʻuhi ʻoku hohaʻa ʻa e tokolahi ʻo kau ki he fakaʻau ke kovi ange ʻa e moʻui fakafāmilí, te ke pehē nai:
◼ “Ko e ngaahi mafasia fakaʻaho ʻo e moʻuí ʻoku hoko ai ʻa e kulukia lahi ki he ngaahi fāmili ʻo e ʻaho ní. ʻE lava ke nau maʻu mei fē ha tokoni? [Tuku ke ne tali.] ʻOku lava ke hoko ʻa e Tohi Tapu ko ha tokoni moʻoni ia kiate kitautolu. [Lau 2 Tīmote 3:16, 17.] ʻOku ʻomai ʻe he Tohi Tapu ʻa e ngaahi fakahinohino ʻaonga ʻe lava ke tokoni ke hao ai ʻa e ngaahi fāmili. Fakatokangaʻi ʻa e fakamatala ʻi he palakalafi 3 ʻi he peesi 238 ʻo e tohi ko ʻení, Te Ke Malava ʻo Moʻui Taʻengata he Palataisi ʻi he Māmaní.” Lau ʻa e palakalafi 3, pea tuʻuaki ʻa e tohí.
4 Kapau ʻokú ke ngāueʻaki ha ongoongo fakalotofonua, te ke pehē nai:
◼ “Naʻá ke fanongo ki he ongoongo ʻo fekauʻaki [lave ki ha meʻa fakalotofonua]? Ko e hā ʻa hoʻo fakakaukau ʻo fekauʻaki mo iá? [Tuku ke ne tali.] ʻOkú ne ʻai koe ke fifili pē ko e hā ʻa e ikuʻanga ʻo e māmaní, ʻikai ko ia? Naʻe kikiteʻi ʻe he Tohi Tapu ʻa e ngaahi meʻa peheé ko e fakamoʻoni ia ʻoku tau moʻui ʻi he ngaahi ʻaho fakaʻosí.” Pea lave ki he fakamatala ʻi he tohi Moʻui Taʻengata, ʻi he peesi 150-153.
5 Kapau ʻokú ke fiemaʻu ke faingofua ange, te ke ngāueʻaki nai ha lea kamata meimei tatau mo ia ʻoku hā ʻi ʻolunga ʻi he peesi 12 ʻi he tohi “Reasoning.”
◼ “ʻOku mau fakalototoʻaʻi ʻa homau ngaahi kaungāʻapi ke nau fakatokangaʻi ʻa e kahaʻu fakaofo ʻoku fakamatalaʻi ʻe he Tohi Tapú. [Lau ke ne tali.] ʻOku fakamatalaʻi ʻi he vahe 19 ʻo e tohi ko ʻeni ʻa e ngaahi tāpuaki kehe ʻe maʻu ʻe he faʻahinga ʻo e tangata talangofua ʻi he malumalu ʻo e Puleʻanga ʻo e ʻOtuá.” Kapau ʻoku mahuʻingaʻia, tuʻuaki ʻa e tohi Moʻui Taʻengata.
6 Ko e teuteu ʻo e lea kamata ola leleí ʻe lava ke tokoni kiate koe ke aʻu kiate kinautolu ʻoku fiekaia ki he māʻoniʻoní.—Mt. 5:6.