ʻOkú Ke Ngāueʻaki ʻa e Tohi Reasoning?
1. Naʻe anga-fēfē hono akoʻi ʻe he ʻapositolo ko Paulá pea mo Sīsū ʻa e niʻihi kehé?
1 Naʻe feinga ʻa e ʻapositolo ko Paulá ke ‘fakaʻuhinga mei he Tohi Tapú.’ (Ng. 17:2, 3, NW; 18:19) ʻI heʻene fai peheé, naʻá ne faʻifaʻitaki ai kia Sīsū, ʻa ia naʻá ne toutou lave ki he Tohi Tapú pea ngāueʻaki ʻa e ngaahi talanoa fakatātā ke tokoniʻi ʻa ʻene kau fanongó ke nau mahinoʻi ʻa e finangalo ʻo e ʻOtuá. (Mt. 12:1-12) Ko e tohi Reasoning From the Scriptures kuo faʻufaʻu ia ke ne tokoniʻi kitautolu ke tau fai ʻa e meʻa tatau.
2. ʻE lava fēfē nai ke tau ngāueʻaki ʻa e tohi Reasoning ke teuteuʻi ha ngaahi lea kamata ola lelei?
2 Teuteuʻi ʻa e Lea Kamata Ola Lelei: ʻOku ʻi he Reasoning From the Scriptures ʻa e ngaahi lea kamata langaʻi mahuʻingaʻia ʻi he peesi 9-15. Ko hono ako mo ngāueʻaki ʻa e lea kamata kehekehé, tautefito kapau ʻokú ke toutou ʻosiki ʻa e feituʻu ngāué, ʻe ʻai ke toe kehekehe ange ai ʻa e founga ʻo hoʻo ngāue fakafaifekaú pea tokoniʻi ai koe ke ke hoko ʻo pōtoʻi mo ola lelei ange ʻi hono kamata ʻo e fetalanoaʻakí. ʻE lau hangatonu nai ʻa e lea kamatá mei he tohí ʻi he faifakamoʻoni he telefoní pe ʻi he taimi ʻo e lea ʻi he sipiká ʻi he ngaahi fale leʻohi-malú.
3. Ko e hā ʻoku ʻi he peesi 16-24 ʻo e tohi Reasoning ʻa ia te ne tokoniʻi kitautolu ʻi he ngāue fakafaifekaú?
3 Ikuʻi ʻa e Taʻofiʻanga ʻo e Fetalanoaʻakí: Fēfē ke ke tomuʻa fakakaukauʻi ʻa e ngaahi taʻofiʻanga ʻo e fetalanoaʻakí ʻa ia ʻe malanga hake nai ʻi ho feituʻu ngāué pea vaheʻi ha ngaahi miniti siʻi ki muʻa he malangá ke vakaiʻi ai ʻa e peesi 16-21 ki ha founga ke fai ai ha tali. ʻE ngalingali nai ke ʻi ai ha faʻahinga ʻi he ngaahi ʻapí ko e kau lotu Puta, Hinitū, Siu pe Mosilemi? Kapau ko ia, ʻe tokoni lahi ʻa e fakamatala ʻi he peesi 21-24.
4. Te tau ngāueʻaki fēfē nai ʻa e tohi Reasoning ʻi he taimi ʻoku langaʻi hake ai ha fehuʻi pe ko ha kaveinga fakatupunga fakakikihi?
4 Tali ʻo e Fehuʻí: Ko e tohi Reasoning ʻe lava ke ne toe tokoniʻi kitautolu ʻi he taimi ʻoku langaʻi hake ai ha fehuʻi pe ko ha kaveinga fakatupunga fakakikihi. Te ke tala ange pē nai ki he tokotahá ʻokú ke saiʻia ke fakahaaʻi ange kiate ia ha meʻa fakatupu fakakaukau ʻokú ke maʻu ʻi he kaveingá pea toʻo hake hoʻo tohi Reasoning. Koeʻuhi ʻoku fokotuʻu ʻa e kaveingá ʻi he hokohoko fakaʻalafapetí, huke ki he ʻuluʻi kaveinga ʻokú ke fakakaukau ʻe maʻu ai ʻa e fakamatala ʻokú ke fiemaʻú. Sio fakavave leva ki he ngaahi fehuʻi ʻoku mataʻāʻaá. Kapau ʻoku ʻikai te ke maʻu vave ʻa e meʻa ʻokú ke kumí, huke ki he ʻiniteki ʻi muí. ʻI hoʻo maʻu pē ʻa e fakamatala feʻungamālié, lau hangatonu leva ia mei he tohí. Kapau ʻokú ke lāulea ki ha konga Tohi Tapu pau, te ke maʻu nai ʻa e meʻa ʻokú ke fiemaʻú ʻi he peesi 445 ʻi lalo ʻi he “Scriptures Often Misapplied.”
5. Ko e hā ʻa e toe ngaahi ʻaonga kehe ʻo hono ngāueʻaki ʻa e tohi Reasoning?
5 Ngāueʻaki Kehe: ʻOku tuku ʻe he niʻihi ha tatau ʻo e tohi Reasoning ʻi honau ʻapi ngāué pe ʻi he ʻapiakó ke tokoni ia ki heʻenau tali ʻa e ngaahi fehuʻi hangē ko ení, ‘Ko e hā ʻoku ʻikai te mou kātoangaʻi ai ʻa e ngaahi ʻaho mālōloó?’ Kuo ʻiloʻi ʻe he toʻutupú ʻoku tokoni lahi ʻa e fakamatala ʻi lalo he ʻuluʻi kaveinga ko e “Creation” mo e “Evolution” ʻi hono teuteuʻi ʻa e ngaahi fakamatala ʻi he ʻapiakó. ʻOkú ke teu ʻaʻahi ki ha taha ʻoku puke pe kuo mole ʻi he maté ha taha ʻokú ne ʻofa ai? Ko e fakamatala ʻi lalo ʻi he “Encouragement” ʻe tokoniʻi nai ai koe ke ke ʻoatu ha fakafiemālie mei he Tohi Tapú. ʻOku toe ʻi he tohi Reasoning ʻa e fakamatala ʻaonga ki he faʻahinga ʻoku nau teuteu malangá mo fai ʻa e ngaahi fakataha malangá.
6. Ko e hā ʻetau taumuʻa ʻi he malangá?
6 ʻI he malangá, ʻoku ʻikai ko ʻetau taumuʻá ke mālohi ʻi he fakakikihí; pea ʻoku ʻikai ko hono ʻoatu pē ʻo ha fakamatala. ʻOku tau loto ke fakaʻuhinga pōtoʻi mei he Tohi Tapú. ʻI heʻetau ngāueleleiʻaki ʻa e tohi Reasoning, ʻoku tau fakahaaʻi ai ʻoku tau tokanga maʻu pē ki heʻetau akoʻi ʻa e niʻihi kehé.—1 Tim. 4:16.