Fakavīkivikiʻi ʻa e ʻUluaki Tama ʻa Sihová!

¹ ʻI he ʻaho Sāpate, Nīsani 9, 33 T.S., ko ha fuʻu kakai tokolahi naʻa nau toʻo ʻa e ngaahi vaʻa paame ʻo fakavīkivikiʻi ʻa e ʻuluaki ʻAlo ʻo Sihová, ko e ʻEiki ko Sīsū Kalaisí “ae Tuʻi oku haele mai i he huafa o Jihova.” (Luke 19:​38, PM; Hep. 1:6) ʻI he ʻaho Mōnite mo e Tūsite, Nīsani 10 mo e 11, naʻe mātuʻaki femoʻuekina ʻa Sīsū ʻi heʻene ngāue fakamalanga fakahāhā, ʻo hoko ai ʻa e ngaahi ʻaho fakaʻosi ko iá ko e taimi femoʻuekina lahi taha ia ʻi heʻene moʻui ʻi he māmaní.

² ʻI he ʻahó ni, ʻoku fuʻu tokolahi ange ʻa e fuʻu kakai ʻoku nau toʻo ʻa e ngaahi vaʻa paame fakaefakatātā mo nau kalanga ʻi he leʻo lahi: “Ko hotau fakamoʻui ʻoku mei he ʻOtua, ʻa ia ʻoku ʻafio ʻi he taloni, pea mei he Lami.” (Fkh. 7:​9, 10) ʻI Maʻasi 26, te tau fakatahataha ai ke fai ʻa e Fakamanatu ʻo e pekia ʻa Kalaisí. ʻI he fakaofi atu ki he ʻaho ko iá, ʻe lava ke tau ʻai ke lahi ange ʻa ʻetau ngaahi feinga ʻi he ngāue fakamalangá pea mo tau kau atu ki he kaila ko eni ʻo e fakamālō ʻi māmani lahi?

³ Fakalahi ʻa e Ngāue Fakamalangá: Ko e tokolahi ʻo e kau malangá kuo nau ʻosi hiki honau hingoá ke nau hoko ko e kau tāimuʻa fakataimi ʻi Maʻasi. Te ke loto ke ke kau mo kinautolu? Kapau ʻoku pehē, ʻoatu leva ʻa hoʻo tohi kolé ʻo ʻoua ʻe toe toloi. Ko ha taha ʻo e kau mātuʻá ʻe fiefia ke ne tali haʻo ngaahi fehuʻi pē ʻo fekauʻaki mo e ngāué.

⁴ Te ke loto ke kau lahi ange ʻi he ngāue fakamalangá ʻi Maʻasi, tatau ai pē pe te ke hoko ko ha tāimuʻa pe ʻikai. ʻE malava ʻa e fakatahaʻangá ke fokotuʻutuʻu nai ha ngāue fakamalanga fakakulupu ʻi he ʻaho kotoa pē ʻi he lolotonga ʻa e māhiná. ʻOku totonu ke vaheʻi ha feituʻu feʻunga ki he taumuʻa ko iá.

⁵ ʻOku totonu ki he fakatahaʻanga kotoa pē ke nau fokotuʻutuʻu ha fakataha makehe ki he ngāue fakamalangá ʻi he Tokonaki ʻo Maʻasi 26. ʻOku poupouʻi atu ki he toko taha kotoa pē ʻokú ne malava ke kau ki he ngāue fakamalanga ʻi he pongipongi Tokonakí, neongo ʻoku lahi ʻa e meʻa ke fai ʻi he teuteu ki he Fakamanatú. Tānaki atu ki he ngāue mei he fale ki he falé, ʻai ke fakapapauʻi ko kinautolu kuó ke ʻosi fakaafeʻi ke haʻu ki he Fakamanatú ʻoku ʻi ai ha meʻalele ke nau haʻu ai pea ʻoku nau ʻilo pau ʻa e taimi mo e feituʻu ʻe fai aí.

⁶ Fakaafeʻi mo Fakalototoʻaʻi ʻa e Niʻihi Kehé: Naʻe fekau ʻe Sīsū ki hono kau muimuí: “Mou fai pehe mōku fakamanatu.” (1 Kol. 11:24) ʻI he talangofua ki he fekau ko iá ʻa e kau muimui pani topuvaʻe taha mo Sīsuú, ʻoku fakaafeʻi ʻa e kau sevāniti kotoa pē ʻa Sihova ke haʻu ʻo mamata ki hono fai ʻa e Fakamanatú. ʻOku totonu ke ke fakaafeʻi ʻa e kau ako Tohi Tapu, ngaahi kāinga, ko kinautolu naʻa mou fetalanoaʻaki ʻo kau ki he Tohi Tapú, ngaahi hoa mali taʻe tui, mo e ngaahi maheni ʻi hoʻo ngāueʻangá. ʻAi ha fakahokohoko koeʻuhi ke ʻoua naʻa ngalo ha taha.

⁷ ʻE ʻi ai ʻa e ngaahi faingamālie kehe ke fakalototoʻaʻi ʻa e kakai fie fanongó ʻi he Fakamanatu tonu. Fakapapauʻi ke ke haʻu kei taimi ki muʻa koeʻuhi ke ke lava ʻo fakafeʻiloaki ki he kau foʻou ko ʻenau toki ʻuluaki haʻu ia. Kapau ʻoku tokolahi ʻa hoʻo kau ako Tohi Tapu ʻe haʻú, ʻe fakapotopoto nai ki ha toko taha kehe ʻo e kau malangá ke nofo mo e niʻihi ʻo kinautolu he lolotonga ʻa e fakatahá. Fakaafeʻi ʻa e kau haʻu foʻoú ke nau maʻu ʻa e Fakataha Fakahāhā tuʻumaʻu ʻa e fakatahaʻangá. Ko e toko taha ʻo e kau mātuʻá kuo fili ke ne fai ʻa e malanga fakahāhaá ʻoku totonu ke teuteu lelei ke ne fai ha malanga fakaueʻiloto.

⁸ ʻI he fakaʻosi ʻo hono fai ʻa e Fakamanatú, ʻi he kau hotau leʻó ʻi he hivá, ʻofa ke tau malava ʻo sio ki mui mo e fiefia ʻi he māhina ngāue fakateokalati mo faivelenga ʻa ia kuo fakalāngilangiʻi ai ʻa Sihová!