Fakatupulekina ʻa e Fie Fanongo ki he Puleʻanga Melino ʻo e ʻOtuá
1 ʻI he lolotonga ʻo e māhina Fēpuelí, te tau tuʻuaki ai ʻa e tohi ko e Te Ke Malava ʻo Moʻui Taʻengata he Palataisi ʻi he Māmaní. ʻOku totonu ko ʻetau taumuʻá ke tokoni ki he kakai loto-totonú ke nau fakatupulekina ha houngaʻia ki he Puleʻanga ʻo e ʻOtuá pea mo e meʻa te ne fakahokó. ʻE tokoni kiate kitautolu ʻi he meʻa ko ʻení ʻa e ngaahi fehuʻi ʻa ia ʻoku hā mei he talí ʻa e anga ʻo e fakakaukaú.
2 ʻI he ʻosi ha fakafeʻiloaki anga-fakakaumeʻa, ʻe lava ke tau leaʻaki ha meʻa ʻo hangē ko ʻení:
◼ “ʻOku hoko ʻa e ngaahi liliu fakaʻohovale ʻi he ngaahi founga pulé ʻi māmani lahi, pea kuo faʻa lave ki he taumuʻa ko e melino. ʻOkú ke pehē ʻe lavaʻi ʻi ha taimi ʻa hono fakahoko mai ʻa e melino moʻoní? [Tuku ke ne tali.] Neongo ko e tokolahi ʻoku nau hanga mo fakatuʻotuʻamelie ki he kau pule fakaetangatá ke nau fakahoko mai ʻa e melinó, kae fakatokangaʻi ange ʻa e founga naʻe talaʻofa ʻa e ʻOtua te ne fakahoko mai ai ʻa e melinó ʻa ia kuo lave ki ai ʻi he Sāme 46:9. [Lau.] Ko e hā ʻa e ngaahi liliu ʻi he māmaní ʻokú ke fakakaukau ʻe fakahoko mai ʻe he ngāue ʻa e ʻOtuá? [Fanongo ki he tali ʻa e toko taha ʻapí pea fakahā ki ai ʻa e tuleki ko e Moʻui ʻi ha Māmani Foʻou Melino.] ʻOku lava ke ke sio loto atu ki he meʻa ʻoku fakatātaaʻi hení?” Lave ki he fakamatala ʻi he kaveinga tokoni ko e “Moʻui ʻi he Māmani Foʻou ʻa e ʻOtua.” Kapau ʻoku faingamālie, lave ki ha toe fakamatala mei he tohi Reasoning, peesi 227-32, ʻi he fehuʻi ko e “What will God‘s Kingdom accomplish?” Te tau fakaʻosi ʻaki nai ʻa e fetalanoaʻakí hano ʻeke: “ʻOkú ke fakakaukau ʻe fakahoko mai ʻe ha founga pule ʻa e ʻOtuá ʻa e ngaahi liliu ko ʻení?” Kapau ʻoku hā ʻa e fie fanongo mei he toko taha ʻapí, ʻoku totonu ke fai ha fokotuʻutuʻu ke fai ha toe ʻaʻahi.
3 Pe te tau pehē nai:
◼ “ʻOku hā ʻa e tokanga lahi ʻo fekauʻaki mo e ngaahi palōpalema fakatupu hohaʻa ʻoku tau fekuki kotoa pē mo ia ʻi he ʻaho taki taha. ʻOkú ke fakakaukau ʻoku ʻi ai ha ʻamanaki ke ngata ʻa e ngaahi palōpalema ko ʻení? [Tuku ke ne tali.] ʻOku pehē nai ʻe he niʻihi ʻoku fakataʻetaʻetokanga ʻa e ʻOtuá ki hotau faingataʻaʻiá. Ka, fakatokangaʻi ʻa ʻene talaʻofa ʻi he Fakahā 21:3, 4.” Lau ʻa e ongo veesí. ʻI he taimi ko ʻení ʻe lava nai ke fakaeʻa ʻa e tohi ko e Moʻui Taʻengatá, ko ha makasini ʻoku lolotonga maʻu, pe ko e tuleki ko e ʻE Kei Tuʻu ʻa e Māmani ko Ení? Kapau ʻe tuʻuaki ʻa e tulekí, ʻe lava ke fai ʻa e tokangá ki he fakamatala ʻi he peesi 2 mo e 3 ʻi he kaveinga tokoni “Ko e Kahaʻu ʻo e Māmani Ko ʻEni.” Kapau ʻoku hā mai ʻa e fie fanongo, te ke fili nai pe ko e fē ʻa e toe tohi te ke tuʻuakí. Kapau te ke tuʻuaki ʻa e kiʻi tohi ko e ʻOku ʻI Ai Ha ʻOtua ʻOku Tokanga Mai? ko e fehuʻi ʻe langaʻi naí: “ʻE vavé ni ʻa hono fakangata ʻe he ʻOtuá ʻa e faingataʻaʻiá?” Fakahā ʻa e palakalafi 28-31 ʻi he kiʻi tohí pea fokotuʻutuʻu ke fai ʻa e fetalanoaʻaki ki ai ʻi he ʻaʻahi hono hoko maí.
4 Te ke fili nai ke fakaeʻa ha kupu mei he taha ʻo e ngaahi makasini ʻoku lolotonga maʻú ʻaki haʻo fai ha fakamatala ʻi ha meʻa mahuʻinga ʻe taha ʻi ha kupu naʻá ke fili.
Kapau ʻe fie fanongo ʻa e toko taha ʻapí, tuʻuaki ʻa e makasiní ʻi haʻo lea pehē ni nai:
◼ “ʻOku ʻi ai hono fakamatala fakaikiiki ange ʻo kau ki he kaveingá ni ʻi he kupu ko ʻení. [Lau ʻa e sētesi ʻe taha pe ua naʻá ke ʻosi filí.] ʻOku toe fakahā mai ʻi he kupu ko ʻení ha ngaahi fakakaukau ʻe hoko ko e fakalototoʻa kiate koe mo ho fāmilí. Koeʻuhi ʻoku ngalingali ʻokú ke fie ʻilo ʻo kau ki he kaveinga ko ʻení, te ma fiefia ke tuku ʻa e ʻīsiu ko ʻení mo hono hoa makasiní maʻau.” Kapau ʻe tali ʻe he toko taha ʻapí ʻa e ongo makasiní, ʻe feʻunga nai ke lave ki he fokotuʻutuʻu ko e tokoni loto-fiefoakí.
5 Ko e kakaí ʻi he ʻahó ni ʻoku nau faʻa puputuʻu pe te nau hanga ki fē ke maʻu ai ha ngaahi tali ki he ngaahi palōpalema ʻoku hoko ki he kakaí. ʻOku tau maʻu ʻa e monū ke tau fakahā atu kiate kinautolu ʻa e ʻamanaki mahino ki he kahaʻú. (Ng. 17:27) Ko ia ai, ʻofa ke tau fakamākukanga ʻi hono fakahanga ʻa e tokanga ʻa e kakaí ki he Puleʻanga ʻo e ʻOtuá, ko e matavai moʻoni ia ʻo e melinó.