Ngāueʻaki ʻEtau Ngaahi Makasiní mei he Fale ki he Fale
1 ʻOku fakamatala mahino ʻa e taumuʻa ʻo e Taua Leʻó ʻi he peesi 2 ʻo e tatau taki taha: “ʻOkú ne hanganaki leʻo ki he ngaahi meʻa ʻoku hoko ʻi he māmaní ʻi heʻenau fakahoko ʻa e kikite ʻa e Tohi Tapú. ʻOkú ne fakafiemālieʻi ʻa e kakai kotoa pē ʻaki ʻa e ongoongo lelei ʻa ia ko e Puleʻanga ʻo e ʻOtuá kuo vavé ni ke ne fakaʻauha ʻa e faʻahinga ʻoku nau ngaohikoviʻi honau kaungātangatá pea te ne liliu ʻa e māmaní ko ha palataisi.” ʻOku pau ko e faʻahinga makasini pehē ʻoku taau ke ʻai ke lahi taha hono tufaki ʻe malavá ʻi heʻetau ngāue fakamalanga fale-ki-he-falé!
2 Ko e Taua Leʻó ko e kiʻi tohi lelei ʻaupito ki hono langaʻi ʻa e mahuʻingaʻia ʻa e kakai ʻoku nau saiʻia ʻi he ngaahi meʻa fakalaumālié. ʻI hono lau ʻa e tatau taki taha, kumi ki ha ngaahi poini feʻunga ke fakahā atu ki ha niʻihi kehe. Ko e kau malanga ʻe niʻihi ʻoku nau hiki nouti ʻi heʻenau ngaahi tatau fakafoʻituituí, pea ki muʻa ke ʻalu ki he ngāue fakamalangá mo e makasini tatau mo ia, ʻoku nau toe vakai ki he ngaahi fakamatala naʻe hikí koeʻuhi ke ʻi ai ha poini makehe ʻi heʻenau fakakaukaú ke fakahā atu ki he kakaí.
3 Te tau fili nai ke kamata ʻa ʻetau tuʻuakí ʻaki ha fakamatala kaunga tonu ki ha kaveinga ʻoku lāulea ki ai ʻi he makasini Ko e Taua Leʻo ʻoku tau ngāueʻakí.
Kapau ʻe hā mai ha mahuʻingaʻia mei he toko taha ʻapí, te tau tuʻuaki ʻa e makasiní ʻaki ha lea pehē ni nai:
◼ “ʻOku fakamatalaʻi fakaikiiki ange ʻo kau ki he kaveinga ko ʻení ʻi he kupu ko ʻeni ʻo e Taua Leʻó.” Pea lau ha sētesi ʻe taha pe ua kuo ʻosi filifili, pea hoko atu: “ʻI he hā mai ʻokú ke ngali mahuʻingaʻia ʻi he kaveinga ko ʻení, te ke saiʻia ke lau ʻa e kupu ko ʻení pea pehē ki he ngaahi kupu feʻunga ki hotau kuongá ʻi he tatau ko ʻeni ʻo e Ko e Taua Leʻó? Kapau ko ia, te u fiefia ke ʻoatu ʻa e makasiní maʻau.” Kapau ʻe tali ʻe he toko taha ʻapí ʻa e makasiní, ʻe feʻunga mālie nai ke ke leaʻaki ha meʻa ʻo hangē ko ʻení: “ʻOku fai ʻemau ngāué ʻi māmani lahi pea ʻoku poupouʻi ia ʻaki ʻa e ngaahi tokoni loto-fiefai. Kapau te ke loto ke fai ha tokoni siʻisiʻi pē he ʻahó ni, te u fiefia ke tali lelei ia.”
4 Kapau ʻe fakahā mahino ʻe he toko taha ʻapí ʻokú ne mahuʻingaʻia ʻi he ngaahi meʻa fakalaumālié, te tau lave nai ki ha konga Tohi Tapu, ʻo hangē ko e 2 Tīmote 3:1-5 ʻo kau ki he ngaahi ʻaho fakaʻosí. ʻI he hili iá, ke ʻai ke langaʻi ʻene mahuʻingaʻiá ki heʻetau ngaahi makasiní, te tau lau hangatonu nai mei he peesi 2 ʻo e Ko e Taua Leʻo ʻoku lolotonga maʻú ʻa e konga ʻoku kamata ʻaki: “Ko e taumuʻa ʻo e Ko e Taua Leʻó.” Pea ʻi he ʻosi iá, tuʻuaki ʻa e Ko e Taua Leʻo mo e Awake! ʻoku lolotonga maʻú.
5 ʻI ha ngaahi feituʻu ʻa ia ʻoku hā ko e kakaí ʻoku nau mahuʻingaʻia ʻi ha faʻahinga lotu ʻe niʻihi, ʻi he lelei ange ke ʻoua ʻe tuʻuaki ʻa e ngaahi makasiní, te ke lea pehē ni nai:
◼ “ʻI he feituʻú ni, ʻoku mau fetaulaki mo e kakai ʻoku nau kau ki he ngaahi lotu ʻa ia ʻoku kehekehe mei he lotu ʻoku mau kau ki aí. Kuo ʻai ʻe he fekumi ʻa e faʻahinga ʻo e tangatá ki he ʻOtuá ke nau fou ʻi he ngaahi founga kehekehe. [Lau Ngāue 17:26, 27.] ʻOkú ke pehē ʻoku moʻoni ko e tokolahi ʻo e kakaí ʻoku nau muimui ʻi he ngaahi lotu ʻoku kau ki ai ʻenau ngaahi mātuʻá, kae ʻikai te nau kumi ʻiate kinautolu pē ki he ʻOtuá? [Tuku ke ne tali.] Ko e meʻa ʻeni ʻoku fakaeʻa ʻi he ʻuluaki vahe ʻo e tohi ko ʻení, ko e Mankind’s Search for God. [Fakaeʻa ʻa e fakamatala ʻi he palakalafi 12 ʻi he peesi 8.] Ko e ʻilo ʻo lahi ange ʻo kau ki he ngaahi lotu kehé ʻoku fakatou fakamaama mo fakatupu ʻilo. ʻOku fakamatalaʻi ʻe he tohi ko ʻení ʻa e tupuʻanga, mo e ngaahi meʻa ʻoku faʻa fai, mo e ngaahi meʻa ʻoku akoʻi ʻe he ngaahi lotu lalahi ʻo e māmaní.” Fakatatau ki he taimí, fakahā ki he toko taha ʻapí ʻa e fakahokohoko ʻo e ngaahi vahé pea mo e fakatātā ʻe taha pe ua ʻi he tohí.
6 ʻI heʻetau ʻalu mei he fale ki he falé, ʻai ke tau manatuʻi ʻoku tau maʻu ʻa e meʻangāue ʻe ua ʻoku lelei taha ʻi he māmaní ke tokoni ki he kakaí ke fakalaka fakalaumālié, ko e Taua Leʻó mo e Awake! ʻOfa ke tau feinga ke langaʻi ʻa e mahuʻingaʻia ʻa e kakaí ki he ongo makasini ko ʻení pea mo tuku atu ia ʻi he faingamālie kotoa pē.