Teuteuʻi ʻa e Kau Ako Tohi Tapú ki he Ngāue Fakamalangá

¹ Ko e tefitoʻi taumuʻa ʻi hono fai ʻo e ngaahi ako Tohi Tapú ko hono ngaohi ha kau ākonga foʻou, ko ha kau ngāue te nau kau fakataha mo kitautolu ʻi hono akoʻi ha faʻahinga kehe. (Mt. 28:​19, 20) Ko ia ai, ko e taumuʻa ʻo e akó ʻoku ʻikai ko hano ʻoatu pē ʻo e ʻiló; ka ʻoku totonu ke fakahūhū ʻo fokotuʻu ʻa e tui fakamātoató ki heʻetau kau akó mo teuteuʻi kinautolu ke nau fakahā atu ʻenau ʻamanakí ki he faʻahinga kehé. (2 Kol. 4:13) Ko e hā ʻa e ngaahi founga ʻaonga ʻe lava ai ke tau tokoniʻi kinautolu ke nau hoko ʻo taau ke toe akoʻi mo ha faʻahinga kehe?​—2 Tīm. 2:2.

² Fokotuʻu ʻa e Ngāue Fakamalangá ko ha Kolo: Mei he kamataʻangá pē, ʻai ke mahino ʻoku kau ki he lotu moʻoní ʻa hono “fai ʻa e fakaha ʻaki ʻa e ngutu ke maʻu ʻa e fakamoʻui.” (Loma 10:10) ʻOku tau maʻu ʻa e fakakaukau mei hotau hingoa ko e Kau Fakamoʻoni ʻa Sihová, kuo pau ke tau lea ki he faʻahinga kehé. Tokoniʻi kinautolu ke nau ʻilo ko hono akoʻi kinautolú ʻoku ʻikai ke ngata pē ki honau fakamoʻuí. ʻI heʻenau hoko ko e kau faiakó, ko e faʻahinga ʻoku fanongo kiate kinautolú ʻoku nau toe maʻu ʻa e faingamālie ke maʻu ʻa e fakamoʻuí.​—1 Tīm. 4:16.

³ Toe Fakamanatu ʻa e Ngaahi Meʻa Naʻe Akó: Ko hono fai ʻa e fakamanatu ʻi he taimi ʻe niʻihi ʻo kau ki he ngaahi meʻa kuo akó ko ha founga akoʻi ia ʻoku mātuʻaki mahuʻinga. ʻOku tokoni ai ki he kau akó ke nau tupu fakalaumālie ʻo maongo loloto ki hono ʻatamaí mo e lotó ʻa e ngaahi moʻoni ʻoku toki ako foʻou ki aí. Ko e meʻa ia kuo tau hokosia ʻi he taimi ʻoku tau tali ai ʻa e ngaahi fehuʻi fakamanatu ʻoku fakakau ʻi he Ako Taua Leʻó. Teuteuʻi ha ngaahi fehuʻi faingofua mo hangatonu ki he toko taha ʻokú ke ako mo iá ke ne tali ʻaki pē ʻene lea pē ʻaʻana.

⁴ ʻI hono fai ʻo e fakamanatú ʻoku malava ke ngāueʻaki ʻa e fokotuʻutuʻu ko e ngāue fakamalanga. ʻEke ha fehuʻi pe fakamatalaʻi ha tuʻunga ʻoku faʻa hoko ʻi he fai fakamoʻoni ki he faʻahinga kehé. ʻI hoʻo ʻai ke pehē ko e toko taha ʻapí koe, ʻai ke fakahāhā ʻe he toko taha ʻokú ke ako mo iá ʻa e meʻa te ne leaʻakí. Fakaongoongoleleiʻi ia ki he ngaahi meʻa naʻe lelei hono faí, pea toe ʻoatu mo ha ngaahi fokotuʻu ʻaonga ʻe tokoni kiate ia ke toe ola lelei ange ʻi he taimi hoko maí. Ko e founga ako ko ení te ne akoʻi ai ia ki he founga ke ne ngāueʻaki ʻa e meʻa kuó ne akó pea tupulekina ai ʻene pōtoʻi ʻi hono ngāueʻaki ʻa e Tohi Tapú.

⁵ Tohi Reasoning: ʻAi ke fakapapauʻi ʻoku maʻu ʻe he toko taha ʻokú ke ako mo iá ha tatau ʻo e tohi Reasoning, pea akoʻi ia ki he anga hono ngāueʻaki iá. Fakahā ʻa e anga hono tokonaki mai ʻe he tohí ni ʻa e ngaahi fokotuʻu ki hono kamata ha ngaahi fetalanoaʻakí, tali ha ngaahi fehuʻi mei he Tohi Tapú, pe ko e meʻa ke fai ʻi he hā mai ha loto-kehe. Ngāueʻaki ʻa e tohí ʻi he lolotonga ʻa e akó ke fakahāhaaʻi ʻa e ngaahi founga ke lea ai ki he faʻahinga kehé ʻi ha founga fakatupu fakalotoʻi. Ko e tohí ni te ne langaʻi hake ʻene loto-maʻú, ʻo fakatupulekina ʻene tomuʻa fai ʻe ia ha meʻa ke fakahāhā ʻa e pōpoaki fekauʻaki mo e Puleʻangá.

⁶ Fakamamafaʻi ʻa e Mahuʻinga ʻo e Ngaahi Fakatahá: Ko e ngaahi fakataha ʻa e fakatahaʻangá, tautautefito ki he Fakataha Ngāué mo e Ako Fakafaifekau Fakateokalatí, kuo faʻu kinaua mo e taumuʻa ke teuteuʻi ai kitautolu ki he ngāue fakamalangá. Ko e kotoa ʻo e ngaahi tefitoʻi meʻa ki he fai fakamoʻoni ola leleí ʻoku fakamanatu mai ia mo fakahāhaaʻi ʻe kinautolu ʻoku nau taukei mo pōtoʻí. Fakamamafaʻi ʻa e mahuʻinga ʻo e ngaahi fakatahá, pea fai ha meʻa pē te ke malava ke tokoniʻi ia ke ne maʻu ʻa e ngaahi fakatahá. Ko hono maʻu maʻu pē ʻa e ngaahi fakatahá te ne tokonaki ki he toko taha ʻokú ke ako mo iá ʻa e meʻa ʻoku fie maʻu kiate ia ke ne hoko ai ko e ākonga moʻoni ʻa Sīsū.

⁷ ʻOua ʻe fakangaloʻi ʻa hoʻo faʻifaʻitakiʻanga ʻaʻaú. Ko hoʻo loto-lelei mo kau maʻu pē ʻi he ngāue fakamalangá ʻoku fakahā ai ʻa hoʻo houngaʻia loloto ki he moʻoní. Ko e ʻalunga peheé te ne fakalototoʻaʻi ai ʻa e toko taha ʻokú ke ako mo iá ke ne fai ʻa e meʻa lahi ange ke fakahāhā atu ai ʻene tuí. (Luke 6:40) Ko hono kotoa ʻo e ngaahi meʻá ni te ne tokoniʻi ai ʻa e toko taha foʻoú ke ne vakai ki he ngāue fakamalangá ko ha monū ia pea ke nau houngaʻia ke kau ki he ngāue ko iá.​—1 Tīm. 1:12.