Fakalahi Ange Hoʻo Koloaʻaki ʻa e Ngāue Fekauʻaki mo e Puleʻangá
1 Naʻe fakatatau ʻe Sīsū ʻa e ʻamanaki ʻo e Puleʻangá ki ha koloa mahuʻinga ʻaupito. (Mt. 13:44-46) ʻOku tau hangē ko e kau tangata ʻi he talanoa fakatātā ʻa Sīsū ʻa ia naʻa nau fakatau ʻa ʻenau ngaahi koloa kotoa ke fakatau mai ʻaki ʻa e meʻa ʻoku mahuʻinga lahi ange ia? Kapau ko ia, te tau fakamuʻomuʻa ʻa e Puleʻanga ʻo e ʻOtuá, neongo ʻe kau nai ki ai ʻa e faingatāmaki mo e moʻui līʻoa.—Mt. 6:19-22.
2 Pea koeʻuhi ko ʻetau ngāue fekauʻaki mo e Puleʻangá ko ha koloa ia, ʻoku totonu ko ʻetau holí ke fakalahi ia. Ko e hā ʻoku fakahā mei heʻetau moʻui fakafoʻituituí? ʻOku tau fakalahi ange ʻa ʻetau ngāue fekauʻaki mo e Puleʻangá? ʻOku lava ke tau fakalahi ia ʻaki ʻa ʻetau kau ki he ngaahi tafaʻaki kehekehe ʻo ʻetau ngāue fakamalangá, kau ai mo e ngāue fale-ki-he-falé, fai ʻa e ngaahi toe ʻaʻahí, fai ʻa e ngaahi ako Tohi Tapu, mo e fakamoʻoni ʻikai ʻi he founga mahení.
3 ʻOku Lava Fēfē Ke Fakalahi Ange ʻEku Kau Ki Aí?: ʻI he kamata ʻa e taʻu ngāue foʻoú, ʻoku lelei ki he tokotaha taki taha ke toe vakaiʻi ʻa ʻene ngāue fakafoʻituituí ke sio pē ko e hā te ne fai nai ke fakalahi ʻa e taimi ʻi he ngāue fakamalangá mo ʻeke: ‘ʻOku lava ke fokotuʻutuʻu ʻa ʻeku ngaahi meʻá koeʻuhi ke u hoko ko ha tāimuʻa tokoni ʻi he taimi ki he taimi pea naʻa mo ha tuʻunga hokohoko atu ai pē? ʻI ha ngaahi liliu siʻi pē, ʻoku lava ke u kau ki he ngāue tāimuʻa tuʻumaʻú?’ Ko e kau tāimuʻa foʻoú ʻoku nau kau ki muʻa ʻi Sepitema 1 te nau lava ke kau ki he Ako Ngāue Tāimuʻa ʻi he taʻu kahaʻú.
4 Kuo fokotuʻu ʻe he kau malanga ia ʻe niʻihi ha kolo fakafoʻituitui ke fai ʻo lahi ange ʻa e fakamoʻoni ʻikai ʻi he founga mahení. ʻOku faʻa maʻu mei he ngāue ko ʻení ʻa e ola lelei ʻaupito. ʻOku pehē ʻe he niʻihi kehe ia ʻoku fiemaʻu kiate kinautolu ke fakaleleiʻi ʻa hono fai ʻa e ngaahi toe ʻaʻahi ola leleí pe kamata ha ngaahi ako Tohi Tapu foʻou.
5 Kapau ʻoku tau fakaʻosiʻaki ʻo pehē kuo fakangatangata ʻi ha founga ʻa ʻetau ngāue fakamalangá, ko e hā ʻe lava ke tau fai ke fakalahi ange ia? ʻOku fokotuʻu mai ʻe kinautolu kuo nau lavameʻa ʻi hono aʻusia ʻa e ngaahi kolo māʻolunga angé ke tau ʻuluaki ʻai ke fakapapauʻi ke fakamuʻomuʻa ʻa e ngaahi meʻa mahuʻinga ʻo e Puleʻangá tatau ai pē pe ko e hā ʻoku kau ki aí. (Mt. 6:33) ʻOku fiemaʻu ʻa e tui mo falala kakato kia Sihova. (2 Kol. 4:7) Kumi ki heʻene tokoní ʻo fakafou ʻi he lotu fakamātoato mo kīvoi. (Luke 11:8, 9) ʻOku lava ke tau falala ʻe tāpuakiʻi ʻe Sihova ʻa ʻetau ngaahi feinga moʻoni ke fakalahi ʻa ʻetau kau ki heʻene ngāué.—1 Sione 5:14.
6 Talanoa mo e fanga tokoua mo e fanga tuofāfine kuo nau lavameʻa ʻi hono fakalahi ange ʻa ʻenau ngāue fakamalangá. ʻEke kiate kinautolu pe naʻe anga-fēfē ʻa ʻenau lava ke lavaʻi ʻa e ngaahi faingataʻaʻiá kae ʻikai ke loto-siʻi. Ko e ngaahi meʻa naʻa nau hokosia fakafoʻituituí ko e meʻa pē nai ia ʻoku fiemaʻu ke ke tuipau ai ko e fakalahi ange ʻo hoʻo ngāue fakamalangá ʻoku ʻikai taʻealalavaʻi ia.
7 ʻI hoʻo lau ʻa e ngaahi kupu ʻi he Ko e Taua Leʻó pe Ko ʻEtau Ngāue Fakafaifekau ʻo e Puleʻangá ʻoku kau ki he ngāue fakamalangá, lotu mo fakakaukau ki he anga haʻo ngāueʻaki ʻa e ngaahi fokotuʻú ʻi hoʻo ngāue fakamalangá. Fai ʻa e meʻa tatau pē ʻi hoʻo kau ki he ngaahi fakataha ʻa e fakatahaʻangá pe ngaahi fakataha lalahí. Ko e ngaahi fokotuʻu ʻoku ʻoatu ʻi he kupu ko ʻení ʻoku makatuʻunga ia mei he fetalanoaʻaki ʻi he konga ʻo e polokalama fakataha fakafeituʻu ʻi he taʻu kuo ʻosí. Ko e ʻuluaki ia ʻi he ngaahi kupu fakahokohoko naʻe fakataumuʻa ke tokoniʻi kitautolu ke tau feinga mo ngāueʻaki ʻa e fakalototoʻa naʻe fakahā mai ʻi he polokalama ko iá.
8 Naʻe mātuʻaki sio fakamātoato ʻa Sīsū ki heʻene ngāue fakamalangá, ko e meʻa tefito ia naʻá ne tokanga ki aí. Naʻá ne fakahā: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au.” (Sione 4:34) ʻOku pehē ʻa ʻetau fakakaukaú? Kapau ʻoku pehē, ko e moʻoni te tau kumi ha ngaahi founga ke fakalahi ange ai ʻa ʻetau ngāué mo ʻoatu ʻa e “meʻa ʻoku lelei” ki he niʻihi kehé mei he koloa ʻoku tau tauhí.—Mt. 12:35; Luke 6:45.