Fakatupulekina ʻa e Mahuʻingaʻia ʻi he Tohi Moʻui Taʻengata
1 ʻI heʻetau ʻaʻahi ki honau ngaahi ʻapí, ʻoku tau faʻa ʻilo ai ko e kakaí ʻoku nau femoʻuekina kakato ʻi he “faʻa loto moʻua ki he māmani.” (Mk. 4:19) ʻOku tau fehangahangai mo ha pole ke maʻu ʻa ʻenau tokangá ʻaki ha fakamatala fakatupu-fakakaukau. Ko e moʻoni, ko e kakai tokolahi ia ʻoku ʻikai te nau loko mahuʻingaʻia ʻi heʻetau pōpoakí. Kapau ʻe lava ke tau leaʻaki ha meʻa ʻe ueʻi ai ʻa ʻenau moʻuí, ʻe lava nai ai ke tau langaʻi ha mahuʻingaʻia ki he pōpoaki ʻo e Puleʻangá. Ko e hā ʻe lava ke ke leaʻakí?
2 Te ke ngāueʻaki nai ʻeni:
◼ “Kapau ʻokú ke maʻu ʻa e mafai, ko e hā ʻa e palopalema fakatupu mamahi ʻi hotau ʻahó ni te ke fakaleleiʻí? [Tuku ke ne tali, kapau ʻoku feʻungamālie, loto-tatau mo ia ʻo pehē ko e kakai tokolahi ʻoku pehē ʻenau fakakaukaú.] ʻI he aʻu mai ki he taimi ní, ʻoku ngalingali ko e kau taki ʻo e māmaní ia ʻoku fakangatangata pē ʻa ʻenau maʻu ha ngaahi fakaleleiʻanga ki he ngaahi palopalema lahi mo fakapuputuʻu ʻo e ʻaho ní. Ka ʻoku ʻi ai ʻa e Tokotaha ʻokú ne lava pea te ne fakangata ʻa e ngaahi palopalema kotoa pē ʻoku fakamamahiʻi ʻaki ʻa e faʻahinga ʻo e tangatá. Kātaki ʻo fakatokangaʻi ʻa e lau ʻa e Sāme 145:16. [Lau ʻa e veesí, pea lave ki he ngaahi fakatātā ʻi he peesi 11-13.] ʻI he palakalafi 14 ʻi he peesi 14 ʻokú ne ʻohake ʻa e fehuʻi naʻá ta fetalanoaʻaki ki aí pea ke hoko atu ʻo ʻeke: ‘Ka ʻe hoko ʻa e meʻa ko ʻení ʻafē?’” Fakamatala ko e tohí te ne tali ʻa e fehuʻi ko iá, pea kapau ʻoku mahuʻingaʻia, tuʻuaki ʻa e tohí.
3 Pe te ke lea ʻo hangē ko ʻení:
◼ “Mahalo ʻokú ke ʻilo ʻa e ongoʻi ko ha fakamasiva ha mole atu ʻa ha tokotaha naʻá ke ʻofa ai. ʻOku ngalingali ʻokú ne ʻai koe ke ke ongoʻi loto-mamahi mo tuēnoa. ʻOkú ke fakakaukauʻi nai ʻa e ngaahi fehuʻi ko ʻení: [Lau ʻa e ngaahi fehuʻi ʻi he palakalafi 1 ʻi he peesi 76.] ʻIkai ko ha meʻa fakafiemālie ia ke maʻu ʻa e ngaahi tali ki he ngaahi fehuʻi ko ʻení? ʻE fakalototoʻa nai kiate koe ke ʻilo ʻoku fakahā ʻe he Tohi Tapú ha ʻamanaki papau kiate kinautolu kuo nau maté. [Lau ʻa e Sione 5:28, 29.] Ko e tohi ko ʻení ʻe tokoni ia kiate koe ke ke maʻu ʻa e mahino ki he tuʻunga ʻo e maté pea mo e ʻamanaki ki he kahaʻú.” Lave fuonounou ki he vahe 8 mo e 20. Kapau ʻoku ngali mahuʻingaʻia, tuku ha faingamālie ki he tokotaha-ʻapí ke ne vakaiʻi ʻa e tohí.
4 ʻOku ngalingali te ke maʻu ha ngaahi faingamālie ke fai fakamoʻoni ʻo ʻikai ʻi he founga mahení. Kapau ko ia, te ke leaʻaki nai ʻi he ngaahi lea pē ia ʻaʻau ʻo hangē ko ʻení:
◼ “ʻOku fonu ʻa e māmaní ʻi he ngaahi palopalema ʻi he ngaahi ʻahó ni, pea ʻoku ʻikai ha tālaʻa ʻoku hoko pē ia kiate koe. Ko e meʻa pango ia, ʻoku hā ko e faʻahinga tonuhiá ʻoku nau faingataʻaʻia lahi tahá. ʻOkú ke fakakaukau ʻe faifai ange pea fakangata ʻe he ʻOtuá ʻa e faingataʻa hono kotoa? [Tuku ke ne tali.] Te u fakahā atu muʻa ʻa e ngaahi meʻa ʻoku talaʻofa ʻe he ʻOtuá ke fai maʻanautolu ʻoku nau tauhi kiate iá. [Lau ʻa e Sāme 37:40 pea fakaava ʻa e tohi Moʻui Taʻengata ki he peesi 99.] ʻOku fakamatala ʻe he tohi ko ení ʻa e ʻuhinga kuo fakangofua ai ʻe he ʻOtuá ʻa e anga-fulikivanú pea mo e founga te ne fakangata ai iá.”
5 Kapau ko ha tokotaha malanga kei talavou koe, ʻoku lava ke ke ngāueʻaki ʻa e fakamatala ʻo makatuʻunga ʻi he ngaahi fakatātā ʻoku hā ʻi he peesi 156-158. Te ke kamata nai ʻaki haʻo ʻeke:
◼ “Te ke fie nofo ʻi ha māmani ʻoku hangē ko ʻení? [Tuku ke ne tali.] Ko e ngaahi fakatātā taki taha fakaʻofoʻofa ko ʻení ʻoku makatuʻunga ia mei ha talaʻofa ʻoku fakahā ʻi he Folofola ʻa e ʻOtuá, ko e Tohi Tapú. [Tuhu ki he konga Tohi Tapu ʻoku lave ki aí.] ʻOku lava ke tokoni kiate koe ʻa e tohi ko ʻení ke ke ako ʻo lahi ange ʻo fekauʻaki mo e talaʻofa ʻa e ʻOtuá ke ngaohi ʻa e māmaní fakalūkufua ko ha palataisi. ʻOku ʻi ai ʻa e fakamatala fakahaofi moʻui pea ʻoku ʻaonga ke vaheʻi ha taimi ke lau ai ia.”—Sione 17:3.
6 ʻI hono tuʻuaki ʻa e tohí, tokanga ki he fiemaʻu ke ʻai hoʻo kau fanongó ke nau ʻilo ʻoku ʻi ai ʻa e faingamālie ke nau tokoni ai ki he ngāue ʻi māmani lahí.