Foki ki he Mahuʻingaʻia Naʻá Ke Maʻú
1 ʻI he ngāue mei he fale ki he falé, ʻoku faʻa fakangatangata pē ʻa e lahi ʻo e taimi ʻoku malava ke tau ngāueʻaki mo ha tokotaha ʻoku mahuʻingaʻia. ʻI he taimi lahi ko e ngāue fakafaiako moʻoní ʻoku fai ia ʻi heʻetau ngaahi toe ʻaʻahí mo e ngaahi ako Tohi Tapú. (Mt. 28:19, 20) Ke faiako ola lelei ʻi he toe ʻaʻahí, ʻoku fiemaʻu ke tau fakamanatu ʻa e meʻa naʻa tau fetalanoaʻaki ki ai ʻi he ʻuluaki ʻaʻahí pea teuteu ki he hoko atu ʻo e fetalanoaʻaki.
2 Kapau naʻá ke talanoa ʻo fekauʻaki mo e ʻikai ke tuʻumaʻu ʻa e fokotuʻutuʻu ʻo e fāmilí, ʻe lava nai ke ke ngāueʻaki ʻa e fakamatala ʻi he vahe 29 ʻo e tohi “Moʻui Taʻengata.” Te ke pehē:
◼ “Naʻá ta talanoa ki muʻa ʻo fekauʻaki mo e fakapotopoto ʻo e muimui ki he akonaki ʻa e Tohi Tapú koeʻuhi ke maʻu ai ha fāmili moʻui fiefia. ʻOkú ke pehē ko e hā ʻa e kī ki hono fakafāitahaʻi ʻa e ngaahi fāmili ʻi he ʻaho ní?” Tuku ke ne tali. Lave ki he palakalafi 27 ʻi he peesi 247, pea lau ʻa e Kolose 3:12-14. Fai ha toe fakamatala ʻo fakahā ʻa e founga ʻoku lava ai ʻe he ʻofa moʻoní ʻo pukepuke fakataha ʻa e fāmilí. Fakamatala ki he anga ʻa hono ako tuʻumaʻu ʻa e tohi Moʻui Taʻengata ʻo lava ai ke tokoni ia ke fakaleleiʻi ʻa e ngaahi palopalemá.
3 Kapau naʻá ke fetalanoaʻaki ki he fakaʻau ke kovi ange ʻa e ngaahi tuʻunga ʻo e māmaní ʻi hoʻo ʻuluaki ʻaʻahí, te ke hoko atu ai pē ʻaki haʻo pehē:
◼ “ʻOku ou ʻilo pau te ke loto-tatau mo au kapau ʻoku tau fie nofo melino, ʻe fiemaʻu ʻa e ngaahi liliu lahi ke fai. ʻOku fakahā ʻe he Tohi Tapú ko Sētané ko e fakatupunga tefito ia ʻo ʻetau ngaahi palopalemá. ʻOku fifili ʻa e tokolahi ki he ʻuhinga kuo fakangofua ai ʻe he ʻOtua ʻa Sētane ke moʻui mai ʻo fuoloa peheé. Ko e hā ʻa hoʻo fakakaukau?” Tuku ke ne tali. Huke ki he peesi 20, palakalafi 14 mo e 15, ʻi he tohi Moʻui Taʻengata, pea fakamatala ki he ʻuhinga ʻoku teʻeki ke fakaʻauha ai ʻa Sētané. Lau ʻa e Loma 16:20, ʻa ia ʻokú ne fakahā ʻa ʻetau ʻamanaki ki he kahaʻu ofi maí.
4 Kapau naʻá ke talanoa ʻo fekauʻaki mo e ngaahi tāpuaki ʻe fakahoko ʻi he malumalu ʻo e pule ʻa e Puleʻangá, ʻi hoʻo toe ʻaʻahi, te ke pehē:
◼ “ʻE fakahoko mai ʻe he Puleʻanga ʻo e ʻOtua ʻa e ngaahi tāpuaki fakaofo ki he māmaní mo e faʻahinga ʻo e tangatá. Kuo fakatātaaʻi lelei ʻa e ngaahi tāpuakí ni ʻi he peesi 12 mo e 13. Ko e hā ʻokú ke sio ki ai ʻoku fakamānako kiate koé? [Tuku ke ne tali.] Fakaʻuta atu angé ki he anga ʻo e moʻui ʻi ha māmani ʻoku hangē ko ʻení.” Lau ʻa e palakalafi 12. Kapau ʻoku ʻi ai ha mahuʻingaʻia, ʻeke ʻa e fehuʻi ʻi he palakalafi 13, pea fetalanoaʻaki ʻi he tali. Fakahā ko e vahe ko ʻení ʻokú ne tali ʻa e ngaahi fehuʻi lahi ʻo fekauʻaki mo e ngaahi tāpuaki ʻo e Puleʻangá pea te ke loto-lelei ke fetalanoaʻaki ki ai ʻi hoʻo ʻaʻahi hono hoko maí.
5 Te ke malava nai ke kamata ha ako ʻaki haʻo pehē:
◼ “ʻI hono ngāueʻaki ʻa e tohi ko ʻení kuo maʻu ai ʻe he kakai tokolahi ʻa e ngaahi tali ki heʻenau ngaahi fehuʻi fakatohitapú.” Huke ki he fakahokohoko ʻo e meʻa ʻi lotó, peá ke ʻeke: “Ko e kaveinga fē ʻoku mahuʻinga lahi taha kiate koé?” Tuku ke ne tali, huke ki he vahe ʻoku nau mahuʻingaʻia aí, pea lau ʻa e ʻuluaki palakalafi. Fakamatala ki he anga hono fakaeʻa ʻe he ngaahi fehuʻi ʻi lalo ʻi he peesi taki taha ʻa e ngaahi poini tefito ʻi he palakalafí taki taha. Fakatātaaʻi ia ʻaki ha fetalanoaʻaki ʻi ha palakalafi ʻe taha pe ua pe lahi ange, pea fai ha fokotuʻutuʻu ke toe ʻaʻahi ki ai.
6 ʻI he toe foki ki he mahuʻingaʻia ʻi he tohi Mouʻi Taʻengata ʻoku fakahāhā ai ʻa ʻetau loto ke fai kakato ʻa ʻetau ngāue fakamalangá. (2 Tīm. 4:5) Te tau malava nai ai ke tokoni ki heʻetau kau fanongó ke nau kakapa atu ki he moʻui taʻengatá.—Sione 17:3.