Ko e Tohi Tapú—Ko e Maʻuʻanga ʻo e Fiemālie mo e ʻAmanaki ʻi ha Māmani Faingataʻaʻia
1 ʻOku ʻai ʻe he māmani ko ʻení ʻa e kakaí ʻo nau mafasia lahi fakaʻulia pea ʻoku fiemaʻu ai kiate kinautolu ʻa e fiemālie mo e ʻamanaki. Ko e Tohi Tapú ko e maʻuʻanga pē ia ʻe taha ʻo e fiemālie moʻoní. ʻOkú ne ʻomai ʻa e ʻamanaki ki ha māmani foʻou māʻoniʻoni. (Loma 15:4; 2 Pita 3:13) ʻOku pehē ʻi he tohi Insight Voliume 1, peesi 311: “ʻI he ʻikai ke ʻi ai ha Tohi Tapú ʻe ʻikai te tau ʻilo ʻa Sihova, ʻe ʻikai te tau ʻilo ʻa e ngaahi ʻaonga fakaofo ko e tupu mei he feilaulau huhuʻi ʻa Kalaisí, pea ʻe ʻikai te tau maʻu ʻa e mahino ki he ngaahi meʻa ʻoku fiemaʻu ʻa ia kuo pau ke tau aʻusia koeʻuhi kae maʻu ʻa e moʻui taʻengata ʻi he pe\ko e malumalu ʻo e Puleʻanga māʻoniʻoni ʻo e ʻOtuá.”
2 ʻI he lolotonga ʻo Nōvemá te tau tohoaki ʻa e tokanga makehe ki he ngāue ʻa e Folofola ʻa e ʻOtuá, ko e Tohi Tapú, ʻi he tokoni ki he kakaí ke nau fekuki mo e mate ʻa ha taha ʻoku nau ʻofa ai. Te tau tuʻuaki ʻa e polosiua ʻI he Mate ha Taha ʻOkú Ke ʻOfa Ai. Ko e hā ʻoku lava ke tau leaʻaki ʻe tokoni ki he faʻahinga faingataʻaʻiá ke nau houngaʻia ʻi he mahuʻinga ʻo e Tohi Tapú?
3 ʻI he ʻosi hoʻo lea fakafeʻiloakí, ʻe lava ke ke lea ʻo hangē ko ʻení:
◼ “ʻOkú ke ngalingali loto-tatau ki he pehē ʻoku faingataʻa ʻaupito kapau ʻe mate ha tokotaha ʻoku tau ʻofa lahi ai. Te tau maʻu mei fē ha akonaki ʻaonga ke ne fakahā mai kiate kitautolu ʻa e founga ke fekuki ai mo e tuʻunga ko ʻení? [Tuku ke ne tali.] ʻOku ou maʻu ha fakafiemālie ʻi he Tohi Tapú koeʻuhi he ʻokú ne akoʻi kiate kitautolu ʻo fekauʻaki mo e ʻamanaki ki he kau maté. [Lau Sione 5:28, 29.] Ko e taumuʻa ʻo ʻemau ngāué ke fakalototoʻaʻi ʻa e kakaí ke nau lau ʻa e Tohi Tapú mo maʻu ʻa e ʻaonga mei heʻene ngaahi fakahinohinó. Ko e tokoni ko ʻeni ki he ako ʻo e Tohi Tapú, ʻI he Mate ha Taha ʻOkú Ke ʻOfa Ai, ʻe lava ke tokoni ia kiate koe ke ke fai pehē. Fakatokangaʻi ʻa ʻene lave ʻo fekauʻaki mo e ʻamanaki papau ki he kau maté. [Lau ʻa e palakalafi tolu mo e fā ʻi he peesi 26.] Kapau te ke fie lau ʻa e polosiuá ni, te u fiefia ke tuku ia maʻa u.”
4 Te ke fili nai ke ngāueʻaki ha lea kamata faingofua ʻo hangē ko ʻení:
◼ “ʻOku tau mahuʻingaʻia ʻi hono fakalototoʻaʻi lahi ange ʻa e ʻapasia ki he Folofola ʻa e ʻOtuá, ko e Tohi Tapú. ʻOku ou fie ʻoatu kiate koe ʻa e tuleki ko ʻení, Ko e ʻUhinga Ke Ke Falala Ai ki he Tohitapu. ʻOku fakamatala ki he ʻuhinga ʻe lava ai ke tau hanga ki he Tohi Tapú ke maʻu mei ai ʻa e ʻamanaki papau ki ha māmani lelei ange. [Sio ki he peesi 6, pea lau ʻa e Sāme 37:29 fakataha mo e palakalafi fakaʻosí.] Fēfē ke ke hanga ʻo lau ʻa e tulekí ni, pea ʻi heʻeku ʻaʻahi hono hoko maí, pea ke tala mai pe ko e hā hoʻo fakakaukau ki he ʻamanaki ʻoku ʻomai ʻe he Tohi Tapú.”
5 ʻE loto nai ha kau malanga ia ʻe niʻihi ke nau ngāueʻaki ʻa e lea kamata fakahangatonu ko ʻení ke kamata ha ako Tohi Tapu:
◼ “Ko ʻeku haʻú ʻo tuʻuaki atu ha ako Tohi Tapu taʻetotongi kiate koe. Ko e Tohi Tapú naʻe fakamānavaʻi ia ʻe he ʻOtuá, pea ʻoku lava ke tokoni kiate kitautolu ʻa ʻene fakahinohinó ke fakatonutonu ha ngaahi meʻa. [Huke ki he 2 Tīmote 3:16, 17 ʻo lau. Fakatatau ki he fiefanongo ʻoku hā maí, huke ki he Fakahā 21:4 pea fakamatala ki he meʻa kuo taumuʻa ki ai ʻa e ʻOtuá ke fakahoko ʻo fakafou mai ʻi hono Puleʻangá.] Te u fiefia ke toe foki mai ʻo hoko atu ʻa e fetalanoaʻaki ki he ʻamanaki ʻo e Puleʻangá.”
6 Ko e Tohi Tapú ko e maʻuʻanga ia ʻo e fiemālie mo e ʻamanaki pea pehē ki he moʻoni ʻoku lava ke ne taki atu kitautolu ki he moʻui taʻengatá. (Sione 17:3, 17) ʻOku hōifua ʻa Sihova ki hono vahevahe atu ki he niʻihi kehé ʻa e ʻilo ʻo e Tohi Tapú, “ʻa ʻEne ʻAfio ʻoku ne finangalo ke maʻu moʻui ʻe he kakai kotoa pe.”—1 Tīm. 2:4.