ʻOku Talaʻofa Mai ʻe he Folofola ʻa e ʻOtuá ʻa e Meʻa Lelei Ange
1 Ko e kakai ʻi he feituʻu kotoa pē ʻoku kamata ke nau ʻilo lahi ki he ngaahi palopalema lahi ʻoku fehangahangai mo e faʻahinga ʻo e tangatá he ʻahó ni. ʻOku uesia ʻa e tokolahi ʻe he masivá. Ko e lahi ʻo e ngaahi palopalema fakafāmilí, fakataha mo e movete ʻa e ngaahi fāmili lahi. Ko e tupulaki ʻa e tokolahi ʻo e kau faingataʻaʻiá koeʻuhi ko e faihiá mo e fakamālohí. Ko e hā ʻa e ʻamanaki ʻoku ʻi ai ki ha meʻa lelei ange?
2 ʻOku ʻi he Tohitapú ʻa e ngaahi talaʻofa ʻo e taimi lelei ange ʻe hoko mai. Pehē ki hono lēkooti ʻa e ngaahi ʻuhinga ki he lahi ʻo e ngaahi palopalema ʻoku tau fehangahangai mo ia ʻi he ʻaho ní, ʻokú ne kikiteʻi ha taimi ʻe fakaleleiʻi ai ʻe he ʻOtuá ʻa e ngaahi palopalema kotoa ko ʻení. Ke maʻu ha ʻamanaki, ʻoku fiemaʻu ki he kakaí ke nau ʻilo fekauʻaki mo e ngaahi talaʻofá ni. Te tau feinga ke tokoniʻi ʻa e kakaí ʻi Tīsema ʻaki hono tuʻuaki kiate kinautolu ʻa e tohi Ko ʻEku Tohi ʻo e Ngaahi Talanoa Faka-Tohitapú. Ko e fānau iikí te nau tuʻuaki nai ia ki honau kaungāako ʻi he akoʻangá, ke lau ʻi he lolotonga ʻo e taimi mālōloó. Ko ia ai, ʻoku ʻikai ko hono tuku pē ʻa e ngaahi tohí ʻi ha taha pea ʻoku fakapapauʻi ai te ne ngāue ʻo fakatatau ki he ngaahi talaʻofa ʻa e ʻOtuá. Kuo pau ke tau fai ha ngaahi toe ʻaʻahi mo ha taumuʻa ke kamata ha ako Tohitapu. (Mt. 28:19, 20) Ko e ngaahi tuʻuaki ʻeni ʻe niʻihi ʻoku fokotuʻu mai:
3 Kapau te ke fetaulaki mo ha taha lahi, te ke ʻahiʻahi nai ʻa e fakaofiofí ni:
◼ “ʻI he tuʻunga ko hotau kaungāʻapí, te u saiʻia ke vahevahe atu ha ongoongo lelei fekauʻaki mo ha talaʻofa alafalalaʻanga ʻa ia ʻe vavé ni ke hoko ha melino ʻi māmani lahi. ʻIkai nai ko ha meʻa ʻeni te ke saiʻia ke mamata aí? [Tuku ke ne tali.] ʻOku tau ʻiloʻi kotoa ʻa e ngaahi feinga ʻa e tangatá ke fakahoko ʻa e taumuʻa ko ʻení. Kae fakatokangaʻi pe ko hai ia ʻoku leaʻaki ʻe he Tohitapú te ne ʻomai ʻa e melino tuʻuloá. [Lau ʻa e Sāme 46:8, 9.] ʻI he ʻosi atu ʻa e taú mo e faʻahinga ʻoku nau poupouʻi iá, ʻe ʻikai ʻaupito toe fakangofua ʻe he ʻOtuá ha fakafili ʻi he māmaní. [Lau ʻa e Sāme 72:7.] Ko e faʻahinga ʻe fakahaofi ʻe he ʻOtuá ke moʻui ʻi ha māmani melinó ko e faʻahinga ia kuo nau ako fekauʻaki mo ia pea mo tauhi kiate ia. Kuo tokoniʻi ʻa e kakai tokolahi ʻe he Ko ʻEku Tohi ʻo e Ngaahi Talanoa Faka-Tohitapú ke nau fai ʻa e meʻa ko iá. ʻOku ou fakapapauʻi ʻe fakalototoʻa ʻaupito kiate koe ke lau ia.” Tuʻuaki ʻa e tohí pea fakamatalaʻi ʻa e fokotuʻutuʻu ʻo e tokoní.
4 ʻI hoʻo toe foki ki ha taha lahi naʻá ke tuku ai ʻa e tohí, te ke pehē nai:
◼ “ʻI heʻeta fetalanoaʻaki fakamuimuí, naʻá ta fetalanoaʻaki ai ki he talaʻofa ʻoku maʻu ʻi he Tohitapú ʻa ia ʻe ʻomai ʻe he ʻOtuá ʻa e melinó ki he māmaní. ʻI he Talanoa 71 he tohi naʻá ku tuku ʻiate koé, ʻokú ne fakaeʻa ai ʻa e toe ngaahi kikite ʻe niʻihi fekauʻaki mo e taimi ko ʻení.” Tuhu ki he fakatātaá pea fetalanoaʻaki ʻi he ʻAisea 11:6-9 mo e Fakahā 21:3, 4. Tuʻuaki ha ako Tohitapu taʻetotongi ʻi ʻapi.
5 Kapau te ke fakakau mai ha tokotaha kei talavou ʻi he fetalanoaʻakí, te ke pehē nai:
◼ “Te u saiʻia ke ʻeke atu ha fehuʻi: ʻI ho tuʻunga ko e tokotaha kei talavoú, ʻokú ke ongoʻi ʻokú ke maʻu ha ʻuhinga ke fakakaukau lelei ai fekauʻaki mo e meʻa ʻoku hanga mei muʻá? ʻOku anga-fēfē hoʻo vakai ki he kahaʻú? [Tuku ke ne tali.] Ko e meʻa ʻoku leleiʻakí, ʻoku ʻi ai ʻa e ʻuhinga ke hoko ʻo tuipau ai fekauʻaki mo e kahaʻú. [Lau ʻa e Sāme 37:10, 11.] Fakatokangaʻi ʻoku talaʻofa mai ʻe he konga Tohitapu ko ʻení ha taimi ʻe fakaʻauha atu ai ʻa e faʻahinga anga-fulikivanú, pea ko e kakai faitotonú pē te nau moʻui ʻi he māmaní. Ke fakapapauʻi mai kiate kitautolu ʻe hoko ʻa e meʻá ni ʻoku lēkooti ʻe he Tohitapú ʻa e ngaahi taimi ʻi he kuohilí naʻe fakaʻauha ai ʻe he ʻOtuá ʻa e kakai anga-fulikivanú, kae fakahaofi ʻa e faʻahinga naʻa nau talangofua kiate iá. Ko e fakatātā ʻe taha ʻo e meʻá ni ko hono fakaʻauha ko ia ʻo Sōtoma mo Komolá. ʻOku fakamatalaʻi ia ʻi he tohi ko ʻení Ko ʻEku Tohi ʻo e Ngaahi Talanoa Faka-Tohitapú.” [Huke ki he Talanoa 15, fakamatalaʻi ʻa e fakatātaá pea lau ʻa e palakalafi fakamuimuí.] Tuʻuaki ʻa e tohí.
6 ʻI hoʻo toe foki ke sio ki ha taha talavou naʻá ne tali ʻa e tohi “Ngaahi Talanoa Faka-Tohitapú,” te ke kamata nai ʻaki hoʻo pehē:
◼ “Naʻá ku houngaʻia ʻaupito ke fanongo ki he anga hoʻo fakakaukau fekauʻaki mo e kahaʻú. Manatuʻi naʻá ku fakahā atu kiate koe ha konga Tohitapu ʻoku talaʻofa mai ai kiate kitaua ha kahaʻu fiefia mo malu, pea naʻá ta fetalanoaʻaki ai ki hono fakahaofi ʻe he ʻOtuá ʻa Lote mo hono fāmilí ʻi he taimi ko ia naʻe fakaʻauha ai ʻa Sōtoma mo Komolá. ʻOku ʻi he Tohitapú foki ʻa e ngaahi talaʻofa fekauʻaki mo e ngaahi tuʻunga lelei ange ʻe ʻomai ʻe he ʻOtuá. Ko e taha ʻeni ʻo e ngaahi talaʻofa ko iá. [Lau ʻa e Fakahā 21:3, 4.] Ko e tohi naʻá ku tuku atú ʻokú ne fakamatalaʻi ʻa e ngaahi tuʻunga fakapalataisi ʻe ʻi he māmaní. [Huke ki he Talanoa 115.] ʻOku ʻikai ke talamai pē kiate kitautolu ʻe he Tohitapú pe ko e ngaahi tuʻunga fēfē ʻe ʻi aí, ka ki he founga ʻe lava ai ke tau ʻi ai ʻo fiefia aí. Kapau te ke loto ki ai, te u saiʻia ke ako Tohitapu mo koe ʻo ʻikai ha totongi.” Kapau ʻoku talitali lelei ʻa e akó, kamata ha ako ʻi he Vahe 1 ʻo e tohi ko e ʻIlo. ʻOange ha faingamālie ki he tokotahá ke ne fai ha tokoni.
7 Ko ha tokotaha ʻokú ne hohaʻa fekauʻaki mo e tupulekina ʻa e ngaahi palopalemá ʻi he māmaní te ne tali nai ʻa e fakaofiofi ko ʻení:
◼ “Ko e moʻoni ʻoku ʻi ai ʻa e ngaahi tuʻunga he ʻahó ni ʻoku nau ʻai kitautolu ke tau hohaʻa lahi fekauʻaki mo e kahaʻú, ʻikai nai ko ia? [Tuku ha faingamālie ke ne tali pea ʻomai ha ngaahi fakatātā.] ʻOkú ke fakakaukau ʻe lava ke fakaleleiʻi ʻa e ngaahi tuʻungá, pea ko e kakaí te nau malava ke moʻui ʻi he māmaní ʻi he melino mo e nonga? [Tuku ke ne tali.] Fakatokangaʻi ʻa e talaʻofa ko ʻeni ʻo e ngaahi meʻa lelei angé ʻoku fokotuʻu mai ʻi he Tohitapú ʻi he 2 Pita 3:13.” [Lau ʻa e konga tohí, pea fakamatalaʻi foki ʻa e ʻuhinga ʻoku felāveʻi ai ʻa e “fonua foʻou” ki he kakaí.] Fakaʻosiʻaki ʻa e huke ki he Talanoa 115 ʻi he Ko ʻEku Tohi ʻo e Ngaahi Talanoa Faka-Tohitapú pea fakahā pe ko e ngaahi tuʻunga fēfē ʻe hoko ʻi he “fonua foʻou.” Tuʻuaki ʻa e tohí.
8 Kapau ko e ʻuluaki ʻaʻahí naʻá ke talanoa ai fekauʻaki mo e ngaahi talaʻofa ʻa e Tohitapú ki ha taimi lelei ange ʻe hoko maí, te ke lava ʻo hoko atu ʻa e fetalanoaʻakí ʻi he toe ʻaʻahí ʻaki hoʻo pehē:
◼ “ʻI heʻeta ʻuluaki fetaulakí, naʻá ta fetalanoaʻaki ai ki he talaʻofa ʻa e ʻOtuá ʻi he 2 Pita 3:13 ki ha ‘fonua foʻou’ peá ta ʻilo ai ko e lave ʻeni ia ki he toe fakafoʻou pe ko e kakai māʻoniʻoni ʻa ia te nau moʻui ʻi he melino fakataha mo honau ngaahi kaungāʻapí. Fakatokangaʻi ʻoku pehē ʻe he konga Tohitapú ko ‘ʻene talaʻofá’ foki ʻoku fakakau ki ai ha ‘langi foʻou.’ ʻOku tau fiemaʻu ha langi pe ʻuniveesi foʻou?” [Tuku ki he tokotaha-ʻapí ke ne tali.] Lave ʻo pehē koeʻuhi ko e “nofoʻanga ai ʻa maʻoniʻoni,” ʻoku pau ko e lave ki he kau māʻoniʻoni, ko e kau pule fakahēvaní. Ko e “kakai fakaʻotuamate” ʻoku faʻuʻaki kinautolu ʻa e “ngaahi langi mo e fonua ʻo onopōni” ʻe fakaʻauha ʻo hangē ko ia ʻoku hā ʻi he 2 Pita 3:7. Kapau ʻoku faingamālie ʻa e taimí, lave ki he Fakahā 21:3, 4 pe ʻAisea 65:17, 22, 23. Toe huke ki he Talanoa 115 ʻi he tohi Ngaahi Talanoa Faka-Tohitapú pea fakamatalaʻi ʻa e palakalafi uá pea mo e fakatātaá.
9 ʻE tāpuakiʻi ʻe Sihova ʻetau ngaahi feinga ke tokoniʻi fakatouʻosi ʻa e taʻumotuʻá mo e fānaú ke houngaʻia ʻi he ngaahi talaʻofa maʻongoʻonga ʻo e ngaahi meʻa lelei ange ʻoku ʻi he Folofola ʻa e ʻOtuá pea mo maʻu ʻa e ʻaonga meiate kinautolu.—Sāme 119:105.