Fetuʻutaki ki he Mahuʻingaʻia Kotoa ke ʻAonga ki he Niʻihi Kehé
1 Ko e hā ʻa e kī tefito ʻokú ne tokoniʻi kitautolu ke fakapapauʻi pe ʻoku totonu pe ʻikai ke tuku ʻetau tohí ki ha taha? Ko e mahuʻingaʻiá! Ko e moʻoni tatau pē ʻi he taimi ʻoku hoko mai ai ke fai ʻa e ngaahi toe ʻaʻahí. ʻI ha taimi ʻoku fakahaaʻi ai naʻa mo ha mahuʻingaʻia siʻisiʻi pē ʻe ha taha ʻi he pōpoaki ʻo e Puleʻangá, ʻoku tau loto ke fai ha meʻa pē ʻoku tau malavá ke ʻaonga ki he tokotaha ko iá. Ko ia ʻoku tau fai ai ʻa e ngaahi toe ʻaʻahi mo e taumuʻa ke ʻai ke tupu ʻa e mahuʻingaʻia ʻa e tokotaha ko iá pea mo kamata ai ha ako Tohitapu ʻi ʻapi. Ko ʻetau koló ia ʻo aʻu ai pē ki he taimi ʻoku ʻikai ke tau tuku ai ha tohí. ʻE malava fēfē ke fai ʻeni?
2 Kapau ko hoʻo fetalanoaʻaki ki muʻá naʻe fekauʻaki mo e mafolalahia ʻa e ngaahi palopalema ʻi he nofo mali ʻi he ʻaho ní pea naʻá ke tuku ʻa e tohi “Moʻui Taʻengata,” ʻe lava ke ke kamata ʻa hoʻo fetalanoaʻakí ʻi he founga ko ʻení:
◼ “ʻI heʻeku ʻaʻahi mai ki muʻá, naʻá ta talanoa ai ʻo kau ki he nofo malí pea mo e akonaki ʻaonga ʻi he Tohitapú ʻa ē ʻoku lava ʻo tokoniʻi ai kitautolu ke maʻu ʻo lahi ange ai ʻa e fiefiá. ʻIkai ʻoku moʻoni naʻa mo e ngaahi fāmili lelei tahá ʻoku malanga hake ai ʻa e ngaahi palopalema ʻi he taimi ki he taimi? [Tuku ke ne tali.] ʻOku ʻomai ʻe he Tohitapú kiate kitautolu ʻa e akonaki lelei ʻaupito ʻa ia ʻe lava ke tokoniʻi ai kitautolu ke fakaleleiʻi ʻa e ngaahi palopalema ʻi he ngaahi vā ʻi he fāmilí. ʻE lava ke faitāpuekina ha fāmili ʻi hono ako fakataha ʻo e Tohitapú.” Huke ki he peesi 246, pea fetalanoaʻaki ʻi he palakalafi 23. Lau ʻa e Sione 17:3, pea fakahā ange hoʻo fie tokoní ki hono tokoniʻi ʻa e fāmilí ke kamata ako ʻa e Tohitapú ʻi ʻapi.
3 Kapau naʻá ke lea ʻo kau ki he fānaú mo e fiemaʻu ki honau akoʻí, te ke hoko atu nai ʻa e fetalanoaʻakí ʻi he foungá ni:
◼ “Ki muʻá naʻá ta talanoa ai ʻo kau ki he ako fakalaumālie ʻoku fiemaʻu ki he fānaú pea mo e founga ʻe lava ai ʻe he ngaahi mātuʻá ke tokoniʻi kinautolú. Ko e lahi taha ʻo e ngaahi mātuʻa kuó u talanoa ki aí ʻoku nau hohaʻa fekauʻaki mo e ʻulungaanga kovi ko ia ʻa e toʻutupu tokolahi fau ʻi he ʻaho ní. Ko e hā hoʻo fakakaukau ʻo fekauʻaki . . . ? [Lave ki ha fakatātā ʻo e ʻulungaanga taʻetotonu ʻi he toʻutupú ʻoku faʻa fakatokangaʻi ia ʻi ho koló. Tuku ke ne tali.] Fēfē ke u fakahā atu kiate koe ha niʻihi ʻo e ngaahi fakahinohino ʻaonga ʻoku ʻomai ʻi he Tohitapú.” Huke ki he palakalafi 22 ʻo e peesi 246 ʻi he tohi Moʻui Taʻengata, fetalanoaʻaki ʻi he poini tefitó, pea lau ʻa e ʻEfesō 6:4. Fakamatalaʻi ange ko e tokolahi taha ʻo e fānaú ʻoku nau fiemaʻu moʻoni ʻa e akonakí mo e fakahinohinó. ʻI he taimi ʻoku tōtōivi ai ʻa e ngaahi mātuʻá ʻi hono fai iá, ʻoku fiefia ange ai ʻa e fānaú mo fakaʻapaʻapa lahi ange ʻi honau ʻulungaangá. Fakamatalaʻi ʻa e founga ʻo ʻetau ako ʻa e Tohitapú mo ʻetau fānaú.
4 Kapau ko e tuʻunga-lea naʻá ke fetalanoaʻaki aí ko e māmani Palataisí, te ke lava nai ke leaʻaki ʻeni ke toe langaʻi ʻa e mahuʻingaʻiá:
◼ “Naʻá ta sio ʻi he ngaahi fakatātā ʻi he tohí ni ʻa ia naʻe fakahaaʻi ai kiate kitautolu ʻa e tuʻunga ʻe ʻi ai ʻa e māmaní ʻi he taimi ʻe ngaohi ai ʻe he ʻOtuá ke hoko ko e palataisí. ʻE ʻikai ke fuʻu mahuʻinga ia kiate kitautolu ʻo kapau ʻe ʻikai malava ke tau fiefia ai fakataha mo kinautolu ʻoku tau ʻofa aí. ʻIkai te ke loto pehē? Tuku ke ne tali. Huke leva ki he peesi 162 ʻi he tohi Moʻui Taʻengata. Lau ʻa e Fakahā 21:3, 4, pea fakamatalaʻi ʻa e founga ʻe lava ai ke fakataha maʻu pē ʻa e faʻahinga ʻoku tau ʻofa aí mo kitautolu. Kapau ʻoku lelei ʻa e tali ki aí, lau ʻa e Sione 5:28, 29 ke fakahā ʻe toe foki ʻo moʻui ʻa e kau maté. Tuhu ki he takafi ʻo e tohí pea pehē: “ʻOku mātuʻaki moʻoni—ʻoku malava ke tau moʻui taʻengata ʻi he Palataisi ʻi he māmaní!” Fokotuʻutuʻu ki ha toe ʻaʻahi ki ai ke fetalanoaʻaki ki he ʻuhinga ʻoku tau ʻiloʻi ai ʻoku ofi ke hoko mai ʻa e Palataisí.
5 Ko e taumuʻa tefito ʻo ha toe ʻaʻahi ke tokoniʻi ʻa e faʻahinga mahuʻingaʻiá ke nau maʻu ha ʻaonga mei he pōpoaki ʻo e Puleʻangá. Ko e tokolahi taha ʻo e kakaí ʻoku fiemaʻu ki ai ha meʻa fakaueʻiloto ke langaʻi hake ʻenau holi ki he ngaahi meʻa fakalaumālié. Fakahanga ʻenau tokangá ki ha ngaahi poini ʻi he tohí ʻoku mahuʻinga ke ngāueʻaki, ʻo fakamamafaʻi ʻa e founga ʻokú ne lava ke tokoniʻi kinautolu ke mahinoʻi lelei ange ai ʻa e Tohitapú. Ko e ngaahi toe ʻaʻahi ʻa ē ʻoku fakahoko ai ʻa e ngaahi kolo ko ʻení te ne tokoniʻi ʻa e niʻihi kehé ʻi he founga lelei taha ʻe malavá ke hoko ʻo ʻaonga kiate kinautolu.