Houngaʻia ʻi he Meʻa ʻOku Tau Maʻú
1 “Ka ko e ʻOtua ʻoku ne fakaha ʻa e moʻoni o ʻene ʻofa aʻana kiate kitautolu ʻi he pekia ʻa Kalaisi maʻatautolu, lolotonga ʻoku tau kei angahala.” (Loma 5:8) Ko ha houngaʻia lahi ē ʻoku totonu ke ʻiate kitautolu hono kotoa ki he feilaulau māʻolunga taha naʻe fai fakatouʻosi ʻe Sihova ko e ʻOtuá pea mo hono ʻAló koeʻuhi ko kitautolu! Fakafou mai ʻi he taʻataʻa ʻo Kalaisi naʻe lilingí, kuo tau maʻu ai ʻa e faingamālie ki he moʻui taʻengatá, ko ha meʻa ʻe ʻikai ke lava ia ʻe ha tangata ʻo ʻomai kiate kitautolu.
2 ʻOku lava fēfē ke tau fakahā ʻa ʻetau houngaʻiá? ʻOku tokolahi ʻa e kakai ia ʻoku nau fieinua ki he ʻilo moʻoní, ʻa ia ʻe lava ke maʻu ia ʻi he Folofola Toputapu pē ʻa e ʻOtuá. Ko e finangalo ia ʻo Sihová ke nau hoko ʻo ʻilo ʻa e moʻoní. (1 Tīm. 2:4) ʻOku tau fakahā ʻa ʻetau houngaʻia ki he moʻoní ʻaki hono ‘tala ʻa e ongoongolelei ʻo e Puleʻanga ʻo e ʻOtua.’ (Luke 4:43) ʻOku fakahā ʻe he kau ʻaufuatō ʻi he ngāue ko ʻení ʻoku tau fakahoungaʻi ʻa e pekia ʻa Kalaisi maʻatautolú pea ʻoku tau loto ke faʻifaʻitaki kiate ia ʻaki ʻa e talangofua anga-tonu ki heʻene fekau ke ngaohi ʻa e niʻihi kehe ko e akongá.—Mt. 28:19, 20.
3 Ko e hā ʻa e ngaahi founga ʻoku ʻatā kiate kitautolu ʻi he ngāue fakamalangá? ʻOku malava kiate kitautolu ke hoko ko e kau tāimuʻa tokoni ʻi he taimi ki he taimi? ʻI he ʻosi hono fatu ʻa e fakamolé, ʻe lava nai ʻa e niʻihi ke kau ʻi he ngāue tāimuʻa tuʻumaʻú. ʻI hono ngāueʻaongaʻaki ʻa e ngaahi faingamālie lelei ko ʻení, ʻoku lava ke fakalahi ai ʻa e taimi ʻoku tau fakamafola ai ʻa e ongoongo lelei ʻo e Puleʻangá. ʻI he kuo hilí naʻá ke fakakaukau nai ke kau ki ai, ka naʻe ʻi ai ʻa e ngaahi faingataʻaʻiaʻanga. Mahalo kuo liliu ʻa ho ngaahi tuʻungá. Kapau ko ia, kuó ke fai ha fakakaukau fakamātoato ke kau ki he ngāue tāimuʻá pe ngāue ko ha tāimuʻa tokoni?
4 ʻOku hoko ʻo hulu ange ʻa ʻetau houngaʻiá ʻi heʻetau vakai ki he meʻa ʻoku hoko takatakai ʻiate kitautolú. ʻOku fakautuutu ʻa e fakamālohí, tāufehiʻá, mo e fekeʻikeʻí ʻi māmani lahi. Naʻe fakamatalaʻi lelei ʻe Paula ʻa hotau taimí ko e tauhaʻa mo “faingataʻa” ke fekuki mo ia. (2 Tīm. 3:1) ʻI he lotolotonga ʻo e ngaahi tuʻunga fakatupu mamahi ko ʻení, ʻoku hulu ʻa e ongoongo lelei ʻoku tau maʻu ke vahevahe mo e niʻihi kehé. ʻOku tau maʻu ʻa e ongo makasini lelei, Ko e Taua Leʻo mo e Awake! ʻOku lava ke tau tuʻuaki ʻi he māhiná ni ʻa e ngaahi tatau pe ko e ngaahi tukuhaú. ʻOku tau maʻu foki mo e ngaahi polosiua ʻi he ngaahi kaveinga kehekehe. ʻOku lava ke maʻu mei he ngaahi tohi ko ʻení ha fakafiemālie moʻoni kiate kinautolu ʻoku nau laú. ʻOku totonu ke ueʻi kitautolu ʻe heʻetau houngaʻia ʻi he meʻa ʻoku tau maʻú ke tau loto-fiefoaki ʻi hono ʻoatu ia ki he niʻihi kehé.—Hep. 13:16.
5 ʻOku lava ke ke ngāue ʻi ha feituʻu ʻi he fonua ko ʻení ʻa ia ʻoku ʻi ai ha fiemaʻu moʻoni ki hoʻo tokoní? Ko hoʻo ʻovasia fakafeituʻú ʻoku ʻi ai nai haʻane ngaahi fokotuʻu ʻo fekauʻaki mo e meʻá ni.
6 ʻOku lahi ʻa e ngaahi ʻuhinga ke houngaʻia ai ʻi he meʻa ʻoku tau maʻú, ko e moʻoni ʻoku hulu ʻa e ngaahi meʻa leleí. ʻOku lava ke fakahā ʻa ʻetau fakamālō kia Sihová ʻaki hono ʻai ke ʻiloa ʻa hono huafá mo ʻene ngaahi taumuʻá ki he niʻihi kehé.—ʻAi. 12:4, 5.