Ngaahi Mātuʻa ʻOku Fiefia!
1 Kapau ko ha tokotaha kei siʻi koe ʻokú ke nofo ʻi ha ʻapi Kalisitiane, ʻoku ʻi ai ʻa e founga makehe ʻe lava ke ke ʻai ai hoʻo mātuʻá ke na fiefia. Kapau te ke tuli ki ha ʻalunga māʻoniʻoni, ʻe “fiefia hoʻo tamai mo hoʻo faʻe.” (Pal. 23:22-25) ʻOku fakanatula pē ʻa e fiemaʻu ʻe hoʻo mātuʻá ʻa e lelei tahá maʻau. ʻOku ʻikai ha toe meʻa ʻe lava ke na fiefia lahi ange ai ka ko e sio kiate koe ʻokú ke ʻai ʻa e moʻoní ko hoʻo meʻa pea fakatapui ʻa hoʻo moʻuí kia Sihova.
2 ʻE lava ke ke fakamālō ʻi hono maʻu ʻa e ongo mātuʻa ʻokú na ʻi he moʻoní. Talu mei ho fanauʻí, kuó na fafangaʻi, fakavala, mo tauhi koe pea pehē foki ki hono tokangaʻi koe ʻi he ngaahi taimi ʻo e mahamahakí. Ka ko e toe meʻa mahuʻinga angé, naʻá na feinga ke akoʻi koe ʻo fekauʻaki mo Sihova pea mo ʻene ngaahi founga māʻoniʻoní; ko e ako ia ʻe lava ke ne fakapapauʻi kiate koe ʻa e moʻui taʻengatá. (ʻEf. 6:1-4) ʻE lava fēfē ke ke fakahaaʻi ʻa hoʻo houngaʻiá?
3 ʻAi ʻa e Moʻoní ko Hoʻo Meʻa: Kuo feinga ʻa hoʻo mātuʻá ke akoʻi koe ke tali fakamātoato ʻa e moʻoní, fai ha ngaahi fakalakalaka fakalaumālie, mo hanganaki ofi ki he kautaha ʻa Sihová. ʻE lava ke ke fakahā ʻa e houngaʻiá ʻaki hoʻo mahuʻingaʻia ʻi he ako fakafāmilí ʻo ʻikai fakakounaʻi. Fakahāhā ʻa e holi ke maʻu ʻa e ngaahi fakatahá, ʻai ke ke tomuʻa mateuteu pē ʻiate koe koeʻuhi ke aʻu ki ai ʻa e fāmilí ʻi he taimí. Tangutu fakataha mo hoʻo mātuʻá he lolotonga ʻa e ngaahi fakatahá pea tokanga ʻaupito ʻaki hoʻo muimui ʻi he ngaahi tohi ʻoku akó. Kakapa atu ke kau ʻi he ngaahi fakatahá ʻaki hoʻo fai ha tali. Fakahaaʻi koe, ko e tokotaha fie ako ʻi he Ako Fakafaifekau Fakateokalatí, ʻi hono tali ʻa e ngaahi konga ʻoku vaheʻi atú pea faiʻaki hoʻo lelei tahá ke fakahoko kinautolu. Fai ha pole ke tokoni ʻi hono tokangaʻi ʻa e ngaahi ngāue ʻi he Kingdom Hall, ʻa ia ʻe mātuʻaki ʻaonga ai ʻa hoʻo tokoní. Ko e kau ʻi he ngaahi ngāue peheé ʻe lava ke ne tauhi ai ho lotó ke fakahanga ki he meʻa ʻa ia ʻoku lelei fakalaumālie maʻau.
4 Fokotuʻu ha Ngaahi Kolo Fakalakalaka: Kakapa atu ke kau mohu ʻuhinga ʻi he ngāue fakamalangá, ʻi hono fakahāhā ʻa e holi ke hoko ʻo taau ko ha tokotaha malanga. Tauhi maʻu ki he lau Tohitapu fakauiké, pe ko e toe lelei angé, ke lau ʻa e Tohitapú fakakātoa ʻiate koe pē. Fakapapauʻi ʻi ho ʻatamaí kuo pau ke ke fai ki he ngaahi fiemaʻu ki he fakatapui mo e papitaisó. Palani fakalelei ʻa hoʻo ngaahi lēsoni ʻi he akoʻangá, fakataha mo e fakakaukau ke maʻu ʻa e ako ʻe teuteuʻi ai kita ke kau kakato ʻi he ngāue ʻa Sihová. Nōfoʻi ʻi hono fakatupu ʻa e faʻahinga ongoongo ko ia ʻa ia ʻe ueʻi ai ʻa e niʻihi kehé ke nau fakaongoongoleleiʻi koe ki he ngaahi monū makehe hangē ko e tāimuʻá pe ngāue ʻi he Pētelí. (Ng. 16:1, 2) Ko hono lavaʻi ʻo e ngaahi koló ʻe lava ke ne tokoniʻi koe “koeʻuhi ke mou sivi ʻo ʻilo ʻa e ngaahi meʻa ʻoku lelei, ka mou nofo . . . kuo mou fonu ngutungutu ʻi he fua ʻo e maʻoniʻoni.”—Fili. 1:10, 11.
5 Ko e taimi talavoú ko e taimi ia ke ako ai, ke maʻu ha fakataukei, pea mo maʻu ai ʻa e pōtoʻi ʻi he feangai mo e niʻihi kehé. Ko e taimi ia ʻe lava ke ke fiefia ai ʻi he moʻuí ʻi he ʻikai ke ʻi ai ʻa e ngaahi māfasia mo e ngaahi fatongia ʻoku hoko ʻi he tuʻunga ko e tokotaha lahí. Naʻe pehē ʻe Solomone: “Tama, ke ke fiefia ʻi hoʻo toki tupu; pea fakafiefiaʻi koe ʻe ho loto ʻi ho taimi talavou.” (Koh. 12:1 [11:9, PM]) Kapau kuó ke fokotuʻu ʻi ho lotó ke tauhi ʻa Sihova ʻi hoʻo talavoú, te ke utu ai ʻa e ngaahi tāpuaki ʻe tolonga ʻo taʻengata.—1 Kal. 28:9.
6 Kapau ʻokú ke “tuli ki he maʻoniʻoni” kae ʻikai ko e “ngaahi holi fakatalavou,” te ke toʻo ai mei hoʻo mātuʻá ʻa e kavenga mamafa ʻo e loto-moʻuá mo e loto-mamahí. (2 Tīm. 2:22) Te ke fakafiefiaʻi ai ho loto pē ʻoʻoú. (Pal. 12:25) Ka ʻoku hiliō ai ʻi he meʻa kotoa, te ke ʻomai ai ʻa e fiefia ki ho Tokotaha-Fakatupú, ko Sihova ko e ʻOtuá.—Pal. 27:11.