Akoʻi ʻa e Fānaú ke Nau Hoko ko e Kau Faifekau
1. Ko e hā ʻoku kounaʻi ʻe he Sāme 148:12, 13 ʻa e ngaahi mātuʻá ke nau faí?
1 ʻOku fakaafeʻi mai ʻe Sihova ʻa e tamaikí ke nau fakahīkihikiʻi ia. (Sāme 148:12, 13) Ko ia ai, ko e ngaahi mātuʻa Kalisitiané ʻoku nau fai ʻa e meʻa lahi ange mei hono akoʻi pē ki he fānaú ʻa e ngaahi moʻoni ʻo e Tohi Tapú mo e ngaahi lao fakaeʻulungaanga ʻa e ʻOtuá. ʻOku nau toe akoʻi foki kinautolu ke nau hoko ko e kau faifekau ʻo e ongoongo leleí. ʻE lava fēfē ke fai fakalakalaka eni?
2. ʻE lava fēfē ʻe he faʻifaʻitakiʻanga ʻa ha mātuʻa ke ueʻi ʻene fānaú?
2 Faʻifaʻitakiʻanga Lelei: Naʻe tala ʻe Fakamaau Kitione ki heʻene kau tangata ʻe toko 300: “Sio kiate au, ʻo faʻifaʻitaki.” (Fkm. 7:17) Ko e fānaú ʻoku fakanatula pē ʻenau mamata pea faʻifaʻitaki ki heʻenau ngaahi mātuʻá. Ko e tamai ʻe taha ʻoku ngāue poʻuli, ka ʻi he ʻikai te ne mohe ʻi he taimi ʻokú ne foki ai ki ʻapi ʻi he pongipongi Tokonakí, ʻokú ne ʻave ʻene fānaú ʻi he ngāue fakafaifekaú neongo ai ʻene mātuʻaki helaʻiá. ʻI he ʻikai leaʻaki ha leá, ʻokú ne akoʻi kia kinautolu ko e ngāue fakafaifekaú ko ha meʻa muʻomuʻa ia. (Mt. 6:33) ʻOku mamata ʻa e fānaú kia koe ʻokú ke kau fiefia ʻi he ngaahi founga kehekehe ʻo e lotú, hangē ko e lea ʻo lotú, lau ʻo e Tohi Tapú, fai ha talí, mo e ngāue fakamalangá? Ko e moʻoni, heʻikai te ke hoko koe ko ha faʻifaʻitakiʻanga haohaoa. Ka ʻe hehema ange ʻa e fānaú ke tali hoʻo ngaahi feinga ko ia ke akoʻi kinautolu ke lotu kia Sihová kapau ʻoku nau sio ki hoʻo tōtōivi ʻi he tauhi kiate iá.—Teu. 6:6, 7; Loma 2:21, 22.
3. Ko e hā ʻa e ngaahi taumuʻa fakalaumālie fakalakalaka ʻoku totonu ke tokoniʻi ʻe he ngaahi mātuʻá ʻenau fānaú ke nau fokotuʻu pea aʻusiá?
3 Ngaahi Taumuʻa Fakalakalaka: ʻOku akoʻi taʻehelaʻia ʻe he ngaahi mātuʻá ʻenau fānaú ke nau haʻele, lea, tui ʻe kinautolu pē honau valá, mo e hā fua. ʻI he aʻusia ʻe he fānaú ʻa e ngaahi maka maile ʻi heʻenau tupú, ʻoku tuku leva ʻi muʻa ʻia kinautolu ha ngaahi taumuʻa foʻou. Kapau ko e ngaahi mātuʻá ko e kau Kalisitiane, ʻoku nau toe tokoniʻi foki ʻenau fānaú ke fokotuʻu mo aʻusia ha ngaahi taumuʻa fakalaumālie ʻo fakatatau mo honau taʻú mo ʻenau ngaahi malavá. (1 Kol. 9:26) ʻOkú ke akoʻi hoʻo fānaú ke fai ha ngaahi tali ʻi he lea pē ʻanautolu pea teuteu ʻenau taki taha malanga ʻi he Ako Fakafaifekau Fakateokalatí? (Sāme 35:18) ʻOkú ke akoʻi kinautolu ke kau ʻi he ngaahi tafaʻaki kehekehe ʻo e ngāue fakafaifekaú? ʻOkú ke fokotuʻu ʻi muʻa ʻia kinautolu ʻa e taumuʻa ʻo e papitaisó mo e ngāue taimi-kakató? ʻOkú ke ʻomi longomoʻui kinautolu ke fetuʻutaki mo e kau ʻevangeliō fiefia mo faivelenga ko ia te nau fakalotolahiʻi kinautolú?—Pal. 13:20.
4. ʻOku anga-fēfē maʻu ʻaonga ʻa e fānaú mei hono maʻu ha ngaahi mātuʻa ʻoku nau kamata akoʻi kinautolu ʻi he ngāue fakafaifekaú mei heʻenau kei siʻí pē?
4 Naʻe pehē ʻe he tokotaha-tohi-samé: “ʻE ʻOtua, kuo ke akoʻi au talu ʻeku siʻi; pea kuo u fakaha hoʻo ngaahi ngaue fakaofo ʻo aʻu ki he taimi ni.” (Sāme 71:17) Kamata hono akoʻi hoʻo fānaú ʻi he kei siʻí pē ke nau hoko ko e kau faifekau. Ko e makatuʻunga fakalaumālie ʻokú ke tokoniʻi kinautolu ke fakatoká ʻoku pau moʻoni te nau maʻu ʻaonga mei ai ʻo aʻu ki heʻenau lalahi!—Pal. 22:6.