Tokoniʻi ke Maʻu ʻa e ʻAongá ʻe he Niʻihi Kehé
1 ʻOku talaʻofa ʻa Sihova ke akoʻi kitautolu ki he meʻa ʻoku fiemaʻu ke tau ʻiló. ʻOkú ne fakapapauʻi mai kiate kitautolu ʻi he Sāme 32:8: “Te u akonakiʻi koe mo hulu ki he hala te ke foua: Te u faleʻi koe ʻaki ʻeku hila.” Ko e fakapapau ko ʻení ʻoku ʻaonga lahi kiate kitautolu. ʻI he taʻesiokitá, ʻoku tau loto ke fakahaaʻi ki he niʻihi kehé ʻa e founga ʻe malava ai ke nau maʻu ʻa e ʻaonga ʻi he fanongo ki he akonaki fakapotopoto mei he Tohitapú. (ʻAi. 48:17) ʻI he lolotonga ʻo Sepitemá ʻe lava ke tau fai ʻeni ʻaki hono tuʻuaki ʻo e tohi Moʻui Taʻengata. ʻI hono fai ʻetau ngaahi tuʻuakí, ʻoku ʻi ai ʻa e ngaahi founga kehekehe ʻe lava ke tau fakahaaʻi ai ʻa e ʻaonga mahuʻinga ʻo e Tohitapú.
2 ʻI he vakai atu ki he mafolalahia ʻa e ngaahi palopalema ʻi he nofo malí he ʻahó ni, te ke fili nai ke fakaeʻa ʻa e fakakaukau ko ʻení mei he tohi “Moʻui Taʻengata”:
◼ “Ko e tokolahi taha ʻo e kakai kuó u talanoa ki aí ʻoku nau hohaʻa ʻaupito ʻo fekauʻaki mo e fakaʻulia ko ia ʻa e tupulekina ʻo e loto-mamahi mo e vete ʻi he nofo malí. ʻOku fēfē ʻa hoʻo ongoʻi fekauʻaki mo e palopalema ko ʻení? [Tuku ke ne tali.] Kuo ʻikai lava ʻa e tokolahi ke ʻiloʻi ʻa e ngaahi tupuʻanga tefitó. Kapau te nau fai ha feinga loto-moʻoni, ʻe ʻikai ngata pē ʻi he lava ke haofaki ʻe he ngaahi hoa malí ʻenau nofo malí ka ʻe lava foki ke nau maʻu ai ʻa e fiefia moʻoní. Ko e kī ki he lavameʻá ʻoku makatuʻunga ia ʻi hono ngāueʻaki ʻa e akonaki ʻoku maʻu ʻi he Tohitapú.” Lau ʻa e ʻEfesō 5:28, 29, 33. Huke ki he peesi 243, fetalanoaʻaki ʻi he palakalafi 16 mo e 17, pea toki tuʻuaki leva ʻa e tohí.
3 ʻOku fiemaʻu ki he fānaú ʻa e taimi ʻaonga pea mo e akonekina mei he ongo mātuʻá. ʻI hono fakaeʻa ʻo e tohi “Moʻui Taʻengata,” ʻe lava ke ke pehē:
◼ “Ko kitautolu hono kotoa ʻoku tau hohaʻa ʻo fekauʻaki mo ha kahaʻu lelei ki heʻetau fānaú. ʻOkú ke pehē ko e hā ʻa e founga lelei taha ʻe lava ke tokoniʻi ʻaki ʻe he ngaahi mātuʻá ʻa ʻenau fānaú ke nau maʻu ha kahaʻu ʻoku malú? [Tuku ke ne tali.] Fanongo angé ki he fakahinohino ko ʻeni mei ha palōvepi ʻi he Tohitapú ʻa ia naʻe hiki ʻi he taʻu nai ʻe 3,000 kuo hilí. [Lau ʻa e Palōvepi 22:6.] Lolotonga ʻoku malava ke maʻu ʻa e ʻaonga lahi ʻe heʻetau fānaú mei he fakahinohino ʻoku nau maʻu ʻi he akoʻangá, ko honau akonekina mahuʻinga tahá ʻoku tokonaki mai ia ʻe heʻenau ngaahi mātuʻá ʻi ʻapi. ʻOku fiemaʻu ki ai ʻa e taimi, tokanga, mo e ʻofa, ka ʻoku tuha mo ia ʻa e feinga lahi.” Huke ki he peesi 245, fetalanoaʻaki ʻi he palakalafi 20 mo e 21, pea toki fakamatalaʻi leva ʻa e founga ʻe lava ke ngāueʻaki ai ʻa e tohí ko ha makatuʻunga ia ki ha ako fakafāmili ʻo e Tohitapú.
4 Te ke fakaʻamu nai ke tuʻuaki ʻa e tohi “Moʻui Taʻengata” ʻaki hono fakahaaʻi ʻa e founga ʻe hoko ai ko ha palataisi ʻa e māmaní:
◼ “ʻOku ou ʻilo pau ʻokú ke hohaʻa ʻo fekauʻaki mo hoʻo moʻuí pe ʻe fēfē ʻi he kahaʻú. ʻI he lotu ʻa e ʻEikí, naʻe akoʻi ai ʻe Sīsū kitautolu ke tau lotu ʻo kole ke hoko mai ʻa e finangalo ʻo e ʻOtuá ki he māmaní ʻo hangē ko ia ʻi hēvaní. ʻE fēfē ʻa e tuʻunga ʻo e māmaní ʻi he taimi ʻe hoko ai iá? [Tuku ke ne tali.] Ko e tāvalivali ʻeni ʻe ha tokotaha ʻaati ʻa e māmani palataisí. [Tuhu ki he fakatātā ʻi he peesi 12 mo e 13. Lau leva ʻa ʻAisea 11:6-9, ʻa ia ʻoku ʻi he palakalafi 12.] ʻIkai ʻe fakaofo ke nofo ʻi ha māmani pehē? ʻE fakahā kiate koe ʻe he tohí ni ʻa e founga te ke lava ai mo ho fāmilí ʻo moʻui ʻi ha palataisi hangē ko ʻení.”
5 Ko e kī tefito ki hono fakapapauʻi ʻa hoʻo lavameʻa ʻi he matapaá, ko e teuteu ki muʻa ʻa hoʻo tuʻuakí. Ki muʻa ke ke tukitukí, ʻai ke pau ʻokú ke maʻu ʻa e meʻa papau ke leaʻaki ʻo fekauʻaki mo ha fakakaukau Fakatohitapu. Pehē foki, ke ʻi hoʻo fakakaukaú ha fakamatala nounou ʻo kau ki ha konga mahuʻinga ʻi he makasiní pe tuleki ʻokú ke palani ke tuʻuakí kapau ʻe ʻikai tali ʻa e tohí. Ngāueʻaongaʻaki ʻa e faingamālie kotoa pē ʻokú ke maʻú ke tūtuuʻi ai ʻa e ngaahi tenga ʻo e moʻoni ʻo kau ki he Puleʻangá ʻi he lolotonga ʻo Sepitemá. (Koh. 11:6) Te ke tokoniʻi ai ʻa e niʻihi kehé ke nau utu ʻa e ngaahi meʻa ʻaonga ʻa ia ʻe tuʻuloa ʻo taʻengata.