Toe Foki ke Fakahaofi ha Niʻihi
1 Ko e finangalo ia ʻo e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tīm. 2:4) Ko e hā ʻa e meʻa ʻe lava ke tau fai ke tokoní? Fai ha ngaahi toe ʻaʻahi ʻaki ʻa e taumuʻa ke akoʻi ʻa e moʻoní. Ko e hā ʻe lava ke ke leaʻakí? Ko e ngaahi fokotuʻu ʻoku hoko maí ʻe tokoni nai kiate koe.
2 ʻI he ʻaʻahi ki ha taha naʻá ne tali ʻa e kiʻi tohi ko e “Vakai! ʻOku Ou Fakafoʻou ʻa e Meʻa Kotoa Pe” ʻe lava ke ke toe lave ki he fakatātā ʻi he takafí pea ʻeke ange ki he tokotaha-ʻapí:
◼ “ʻI he hili hono vakaiʻi fakalelei ʻa e kiʻi tohi naʻá ku tuku atu kiate koé pea fakakaukau ki he talaʻofa ʻa e ʻOtuá ki ha māmani palataisí, ʻoku anga-fēfē ʻa hoʻo ongoʻi ʻo fekauʻaki mo e ngaahi talaʻofa fakaofo ʻa e ʻOtuá kuó ne fai maʻá e faʻahinga ʻo e tangatá?” ʻI he hili hono fakamālōʻiaʻi ʻa e tali ʻa e tokotaha-ʻapí pea fakamatala nounou ki he meʻá ni, te ke fakahanga nai ʻa e tokangá ki he ʻAisea 11:6-9 mo e Fakahā 21:3, 4.
3 Kapau naʻá ke tuku ke fifili ʻa e tokotaha-ʻapí ki he ʻuhinga ʻoku kātakiʻi ai ʻe he ʻOtuá ʻa e fulikivanú, ʻi hoʻo toe ʻaʻahí te ke toe kamata nai ʻa e fetalanoaʻakí ʻaki hoʻo pehē:
◼ “Naʻá ku fiefia ʻi heʻeta pōtalanoa ʻi he taimi naʻá ta ʻuluaki fetaulaki aí, pea kuó u saiʻia ke toe ʻaʻahi mai ke vakai pe ko e hā hoʻo ongoʻi ʻo fekauʻaki mo e ʻuhinga ʻoku kātakiʻi ai ʻe he ʻOtuá ʻa e māveuveu mo e fakamālohi ʻoku hoko he māmaní ʻi he ʻaho ní. [Tuku ke ne tali. Huke ki he 2 Pita 3:8, 9 pea lau.] Ka ko e hā kuo ʻosi fai ʻe he ʻOtuá?’ Mahalo pē te ta fetalanoaʻaki ki he tali ʻo e fehuʻí ni ʻi heʻeku ʻaʻahi hono hoko maí.”
4 Te ke lava ʻo toe foki nai koeʻuhi ko e kiʻi tohi naʻe tuku ko e “Nofo ʻAmanaki ki he Maama Foʻou Maʻoniʻoni,” ʻaki ʻa e fakafeʻiloakí ni:
◼ “ʻI he taimi naʻá ku ʻuluaki ʻaʻahi mai ai kiate koé, naʻe maongo kiate au ʻa hoʻo tokanga ki he meʻa ʻoku hoko ʻi he māmaní he ʻaho ní. ʻI heʻetau moʻui ko ia ʻi he ngaahi ʻaho fakaʻosi ʻo e ngaahi meʻa ʻo ha fokotuʻutuʻu fulikivanú, ʻoku mahuʻinga ʻaupito ki he ngaahi fāmilí ke hanganaki teuteu ki he kahaʻú. Ki he ikuʻanga ko iá, ʻoku mau fakalototoʻaʻi mālohi ai ʻa hono fai ha fetalanoaʻaki tuʻumaʻu ʻo kau ki he Tohitapú ʻi ʻapi. Kapau nai ʻe malava, te u saiʻia ke fakahāhā atu taimi nounou ʻa e founga ʻo hono fai ʻe he kakai ʻi he ngaahi fonua nai ʻe 200 ʻa e fetalanoaʻaki ʻo kau ki he Tohitapú ʻi ʻapi ʻi he tuʻunga ko e ngaahi fāmilí.” Fakatatau ki he taimí, ngāueʻaki ʻa e fakamatala ʻi lalo ʻo e kaveinga tokoni ʻi he peesi 5 ke fakahāhaaʻi ʻa e akó.
5 Pe te ke lava ʻo toe foki koeʻuhi ko e ngaahi tohi iiki ʻe tolu naʻe tukú ʻaki hoʻo pehē:
◼ “Kuó u saiʻia ke toe foki mai ke fakahā atu kiate koe ha meʻa lahi ange ʻo kau ki he taumuʻa ʻa e ʻOtuá ki he māmani ko ʻení.” Lau ʻa e Maika 4:3, 4, pea fakamatalaʻi nounou ʻa e founga ʻe fakahoko ai ʻe he Puleʻanga ʻo e ʻOtuá ʻa e talaʻofá ni. Tuʻuaki ha ako Tohitapu taʻetotongi ʻi ʻapi.
6 Manatuʻi ko e kolo ki hono fai ʻo e ngaahi toe ʻaʻahí ke kamata ha ngaahi ako Tohitapu. Te tau maʻu ʻa e fiefia lahi ʻi he taimi ʻe kamata ai ʻa e faʻahinga ʻoku nau akó ke ui ki he huafa ʻo Sihová ki ha fakahaofi.—Ng. 2:21.