Ko Hai ʻOku Taau ke Malangá?
1 ʻI he fekauʻaki mo e ngāue fakafaifekaú, kuó ke ongoʻi tatau hangē ko Mōsesé? Naʻá ne pehē: ʻEī, fakamolemole, ʻoku ʻikai ko e tangata lea au, talu mei muʻa mo ʻeku pehe, pea neongo hoʻo folofola ki hoʻo tamaioʻeiki ka ʻoku ou kei pehe pe.” (ʻEki. 4:10) Kapau ʻokú ke ongoʻi pehē, te ke hehema nai ke holomui. Ka, ko Sīsū “naa ne fekau kiate kimautolu ke mau malaga ki he kakai, mo fakamooni.” (Ng. 10:42, PM) Ko ia, ʻe anga-fēfē ke tau hoko ko e kau malanga taau ʻo e ongoongo leleí?
2 ʻOku ʻikai ko e lahi ʻo ʻetau ako fakamāmaní te ne ʻai ai kitautolu ke taau ki he ngāue fakafaifekaú. He naʻe pehē ʻe Paula “oku ikai ui ha toko lahi oe boto fakakakano” he “koe boto oe mamani, koe vale ia ki he Otua.” (1 Kol. 1:26, PM; 3:19, PM) Naʻe fili ʻe Sīsū ʻene kau ʻaposetoló mei he lotolotonga ʻo e faʻahinga ʻoku nau ngāue ki tuʻá—ʻoku ʻikai toe siʻi hifo ʻi he toko faá ko e kau toutai. Ko e kau takilotu loto-mahikihikí naʻa nau sio lalo kiate kinautolu ko e ‘kau tangata taʻe kolisi pea taʻe maʻu tuʻunga.’ ʻI hono fakamāuʻi ʻaki ʻa e ngaahi tuʻunga fakamāmaní, ko e kau ʻaposetoló naʻe ʻikai te nau taau ke malanga. Ka, ʻi he malanga pōtoʻi ʻa Pita naʻe fakahoko ʻi he ʻaho ʻo e Penitekosí naʻe ueʻi ai ʻa e toko 3,000 ke nau papitaiso!—Ng. 2:14, 37-41; 4:13.
3 Naʻe Fakamafaiʻi Kitautolu ʻe Sihova ke Malanga: Naʻe fakahā ʻe Paula: “Koe mau mafai oku mei he Otua.” (2 Kol. 3:5) Ko Sihová, ko e Matavai ia ʻo e potó, kuó ne akoʻi ʻa e laui miliona ke malangaʻi ʻa e moʻoni ʻo e Puleʻangá ki he niʻihi kehé. (ʻAi. 54:13) Ko e ola mo e fua lelei ʻo e ngāué ni ʻoku lava ke mātā ia ʻi he toko 338,491 naʻa nau papitaiso ʻi he taʻu kuo ʻosí ʻo hoko ko e ngaahi “tohi fakaogolelei.” (2 Kol. 3:1-3, PM) ʻOku tau maʻu ʻa e ngaahi ʻuhinga ke malanga loto-toʻa pea tuipau ʻo fekauʻaki mo e ngaahi meʻa kuo tau ako meia Sihová.
4 Kuo fokotuʻu ʻe he kautaha ʻa e ʻOtuá ha polokalama ako fakavahaʻapuleʻanga maʻá e kau faifekaú. Fakatuʻunga ʻi he Ngaahi Konga Tohitapú pea mo ha ngaahi tokoni lahi kehekehe ki he ako Tohitapú, ʻoku akoʻi ai kitautolu mo teuʻi ke hoko ʻo “tuʻu kakato . . . , kuo ʻosi sāuni” ke malanga. (2 Tīm. 3:16, 17) Ko e tokolahi kuo nau ofo ʻi he mataotao ʻoku nau maʻu ʻi he ngaahi tohi ʻa e Sōsaietí. Ko e fakatātaá, naʻe pehē ʻe ha makasini faka-Suēteni: “ʻI mui ʻi he tui ʻoku malangaʻi ʻe he Kau Fakamoʻoni ʻa Sihová ʻoku ʻi ai ʻa e kalasi māʻolunga ʻo e ʻilo fakavahaʻapuleʻanga ki he saienisi ʻo e Tohitapú.”
5 ʻI he tataki ʻoku ʻomai ʻi heʻetau ngaahi fakataha ʻe nima fakauiké, ko ʻetau polokalama ki he lau Tohitapú mo e akó, akonaki ʻi he Akoʻanga Fakafaifekau Fakateokalatí, tokoni fakafoʻituitui ʻa e niʻihi kehe ʻo e kau faifekau ʻa ia ʻoku nau taukeí, pea hiliō aí, ko e tokoni ʻa e laumālie māʻoniʻoni ʻo Sihová, ʻe lava ke tau tuipau ai ʻoku vakai mai ʻa Sihova ʻoku tau taau kakato ke malanga. “I he mooni, ka i he Otua, bea i he ao oe Otua, oku mau lea kia Kalaisi.”—2 Kol. 2:17, PM.
6 Kapau te tau ngāueʻaki kakato ʻa e ʻaonga ʻo e ako fakateokalati ʻoku tokonaki mai ʻe he ʻOtuá ʻo fakafou mai ʻi heʻene kautahá, ʻoku ʻikai ke ʻi ai ha ʻuhinga ke tau holomui ai pe ongoʻi ilifia. ʻOku lava ke tau loto-fiefia ke malanga ki he niʻihi kehé, ʻo fakapapauʻi ʻe tāpuakiʻi ʻe Sihova ʻetau ngaahi feingá.—1 Kol. 3:6.