ʻOku Ou Taau ke Malanga?
1. Ko e hā ʻoku ʻikai totonu ai ke tau ongoʻi taʻefeʻunga fekauʻaki mo hotau tuʻunga taau ke malangá?
1 Kapau ʻe faifai ange peá ke ʻeke ha fehuʻi pehē, loto-toʻa! ʻOku ʻikai ko e tuʻunga fakaakó pe ko e malava fakanatula tuʻu-ki-muʻá ʻokú ne ʻai kitautolu ke tau taau ai ko e kau faifekaú. Ko e niʻihi ʻo e muʻaki kau ākongá naʻe fakamatalaʻi ko e kau ‘taʻe kolisi kinautolu, pea taʻe maʻu tuʻunga.’ Neongo ia, ko e kau malanga ola lelei kinautolu ʻo e ongoongo leleí koeʻuhi naʻa nau fakapapauʻi ke muimui ʻi he faʻifaʻitakiʻanga naʻe fokotuʻu ʻe Sīsuú.—Ng. 4:13; 1 Pita 2:21.
2. Ko e hā e founga ʻe niʻihi ʻo e faiako ʻa Sīsuú?
2 Founga Faiako ʻa Sīsuú: Ko ʻene faiakó naʻe maʻamaʻa, ʻaonga pea faingofua ke mahinoʻi. Ko ʻene ngaahi fehuʻí, talanoa fakatātaá mo e talateu ʻikai ke fihí naʻá ne puke ʻa e tokanga ʻa e kau fanongó. (Mt. 6:26) Naʻá ne fakahaaʻi ʻa e mahuʻingaʻia moʻoni ʻi he kakaí. (Mt. 14:14) ʻIkai ko ia pē, naʻe lea ʻa Sīsū ʻi he tuipau mo e mālohi, ʻi hono ʻiloʻi naʻe fekauʻi mai ia ʻe Sihova pea fakaivia ia ke ne fakahoko ʻa ʻene ngāué.—Luke 4:18.
3. ʻOku anga-fēfē hono tokoniʻi kitautolu ʻe Sihova ke lavaʻi ʻetau ngāue fakafaifekaú?
3 Tokoniʻi Kitautolu ʻe Sihova: Fakafou heʻene Folofolá mo e kautahá, ʻoku ʻomai ʻe hotau Faiako Maʻongoʻongá ʻa e ako ʻoku tau fiemaʻú ke malangaʻi lavameʻa ai ʻa e ongoongo leleí. (Ai. 54:13) Koeʻuhi naʻe fakatolonga ʻe Sihova ha lēkooti ʻo e founga faiako ʻa Sīsuú, ʻoku tau malava ai ke sivisiviʻi mo faʻifaʻitaki ki heʻene ngaahi foungá. ʻOku ʻomai ʻe Sihova ʻa hono laumālie māʻoniʻoní mo akoʻi kitautolu fakafou ʻi he fakataha ʻa e fakatahaʻangá. (Sione 14:26) ʻIkai ngata aí, ʻokú ne ʻomai ʻa e kau malanga taukei ʻoku lava ke nau tokoniʻi kitautolu ke tau hoko ʻo ola lelei ange ai.
4. Ko e hā ʻoku tau maʻu ai ʻa e ʻuhinga ke ongoʻi taau ke vahevahe atu ʻa e ongoongo leleí ki he niʻihi kehé?
4 ʻOku tau maʻu ʻa e ʻuhinga kotoa ke ongoʻi taau ai ke malanga, koeʻuhi ‘ko ʻetau hoko ʻo taau feʻungá ʻoku haʻu ia mei he ʻOtuá.’ (2 Kol. 3:5, NW) ʻI heʻetau falala kia Sihova pea ngāueleleiʻaki faitōnunga ʻa ʻene tokonaki ʻofá, te tau ‘kakato ai ʻi hono teuteu ki he gaahi gaue lelei kotoabe.’—2 Tim. 3:17, PM.