Kau ki he Akoʻanga Fakafaifekau Fakateokalatí
1 Ko e Akoʻanga Fakafaifekau Fakateokalatí kuo meʻangāueʻaki ia ki hono akoʻi ʻa e laui miliona ʻo e Kau Fakamoʻoni ʻa Sihová ke hoko ko e kau faifekau ʻo e ongoongo leleí. ʻOku manatuʻi ʻe he tokolahi ʻiate kitautolu ʻa e ongoʻi manavasiʻi mo taʻefeʻunga ʻi he taimi naʻa tau fuofua kau ai ki he akoʻangá ni, pea ʻi he taimi ní ʻoku tau fakamālōʻia ʻi he ʻilo ki hono ngafá ʻi heʻetau fakalakalaka fakalaumālie ko e kau malanga mo e kau faiako ʻo e Folofola ʻa e ʻOtuá. (Fakafehoanaki mo Ngāue 4:13.) Kuó ke kau ki he akoʻanga fakaofó ni?
2 Ko hai ʻe lava ke kau ki aí? ʻOku tali mai ʻe he peesi 73 ʻo e Organized to Accomplish Our Ministry: “ʻE lava ke kau ki ai ʻa e kotoa ʻo e faʻahinga ʻoku nau feohi longomoʻui mo e fakatahaʻangá, kau ai ʻa e kakai ʻoku nau maʻu foʻou ʻa e ngaahi fakatahá, kehe pē ʻoku nau moʻui ʻo fakatatau mo e ngaahi tefitoʻi moʻoni ʻa e Kalisitiané.” ʻOku tau fakaafeʻi kotoa ʻa e faʻahinga ʻoku tāú—kau tangata, kau fefine, mo e fānau—ke fakaofiofi ki he ʻovasia ʻo e akoʻangá pea kole ke kau ki ai.
3 Polokalama ʻo e Akoʻangá ki he 1997: Ko e polokalama ʻo e Akoʻanga Fakafaifekau Fakateokalati ki he 1997 ʻokú ne kāpui ha ngaahi akonaki faka-Tohitapu mo e ngaahi falengāanga kehekehe, pea pehē foki ki he hisitōlia ʻo e kautahá. Ke tānaki atu ki hono fakatupulekina ʻetau pōtoʻi leá mo faiakó, ʻoku tau ako mei he ngaahi koloa fakalaumālie lahi ʻa ia ʻoku maʻu ʻi hono ngaahi lēsoní he uike taki taha. (Pal. 9:9) Kapau ʻoku tau teuteu ki he akoʻangá, ʻa ia ʻoku kau ki ai ʻa hono fai ʻa e lau Tohitapu fakauiké, pea maʻu maʻu pē iá, ʻe lava ke tau maʻu ʻa e ʻaonga fakalaumālie lahi mei he polokalamá.
4 Ki he 1997 ko e lahi taha ʻo e lau Tohitapu ki he Konga Fika 2 ʻe nounou ange ia ʻi he ngaahi taʻu kuohilí. ʻI he taimi ʻoku teuteu ai ki he konga ko ʻení, ʻoku totonu ki he tokotaha akó ke ne taimiʻi fakalelei ʻene lautohí pea toki fakapapauʻi pe ko e miniti ʻe fiha ʻi he miniti ʻe nima ʻoku vaheʻi ange ki heʻene kongá te ne lava ʻo ngāueʻaki ki he talateú mo e lea fakaʻosí. ʻE fakaʻatā ai heni ʻa e tokotaha akó ke ngāueʻaki kakato ʻene taimí pea ke fakatupulekina fakatouʻosi ʻene malava fakaelautohí mo ʻene pōtoʻi he lea fakatuʻupakeé.—1 Tīm. 4:13.
5 Ko e faifakamoʻoni ʻi he founga ʻikai anga-mahení kuo tānaki atu ia ko ha fokotuʻutuʻu ki he ngaahi malanga ʻi he Konga Fika 3, ʻa ia ʻoku makatuʻunga ʻi he tohi ko e ʻIlo. Ko ia ai, ko ha tuofefine te ne fili nai pe ko ha toe ʻaʻahi, ko ha ako Tohitapu ʻi ʻapi, pe faifakamoʻoni ʻi he founga ʻikai anga-mahení, ʻa e fokotuʻutuʻu ki he konga ko ʻení. ʻOku moʻoni, ʻoku totonu ke hokohoko atu ʻa e fakamamafa tefitó ʻo fakatuʻunga ʻi he faiako ola leleí kae ʻikai ko e fokotuʻutuʻú.
6 Pe ʻokú ke maʻu ʻa e monū ko hono fai ʻa e malanga fakahinohinó, ngaahi meʻa mahuʻinga mei he Tohitapú, pe ko ha konga ʻa ha tokotaha ako, ʻe lava ke ke fakahā hoʻo houngaʻia ki he Akoʻanga Fakafaifekau Fakateokalatí ʻaki hono teuteu pea ʻahiʻahiʻi fakalelei hoʻo kongá, ʻaki hono fai ia ʻi he tuipau mo e loto-māfana, ʻaki ʻa e ʻikai ke ʻovataimi, ʻaki ʻa e fanongo pea ngāueʻaki ʻa e akonaki ʻa e ʻovasia ʻo e akoʻangá, pea ʻi he feinga maʻu pē ke fakahoko loto-tōnunga hoʻo kongá. Ko ia ko hoʻo kau ki he akoʻangá, ʻe fakamoʻoniʻi ai ko e tāpuaki fakatouʻosi ia kiate koe pea mo e kotoa ʻo e faʻahinga ʻoku nau ʻi aí.