Taau pea Mateuteu ke Akoʻi ʻa e Niʻihi Kehé
1 ʻI he taimi naʻe fakanofo ai ʻa Mōsese ko e fakafofonga ʻo Sihová, naʻe ʻikai te ne ongoʻi ʻokú ne taau ke fakahā ʻa e folofola ʻa e ʻOtuá kia Felo. (Eki. 4:10; 6:12) Naʻe fakaeʻa ʻe Selemaia ʻa e siʻi ʻene falala pau te ne malava ke ngāue ko e palōfita ʻa Sihová, ʻo ne tala ange ki he ʻOtuá ʻoku ʻikai te ne ʻilo ʻa e founga ke leaʻakí. (Sel. 1:6) Neongo ʻa e ʻuluaki siʻi ʻena falala paú, ko e ongo palōfitá fakatouʻosi naʻe toki fakamoʻoniʻi ko e ongo fakamoʻoni taʻemanavahē maʻa Sihova. Naʻá na taau feʻunga mei he ʻOtuá.
2 ʻI he ʻahó ni, tau fakamālō kia Sihova, ʻoku tau maʻu ʻa e meʻa ʻoku fiemaʻu kiate kitautolu ke fakahokoʻaki ʻetau ngāue fakafaifekaú mo e falala pau. (2 Kol. 3:4, 5; 2 Tim. 3:17) Hangē ha ʻenisinia pōtoʻi fakataha mo ha seti kakato ʻo e ngaahi meʻangāué, ʻoku tau mateuteu lelei ke fakahoko pōtoʻi ʻetau ngāue fakafaifekau kuo vaheʻi maí. ʻI Sanuali te tau tuʻuaki ai ha fanga kiʻi tohi motuʻa ʻe tolu ʻoku kei maʻu ʻi he fakatahaʻangá, kau ai ʻa e ongo kiʻi tohi ko e “Vakai! ʻOku Ou Fakafoʻou ʻAe Meʻa Kotoa Pe” mo e Nofo ʻAmanaki ki he Maama Foʻou Maʻoniʻoni. Neongo ko e ngaahi meʻangāue fakalaumālie ko ʻení ʻoku ʻikai ke foʻou, ʻoku kei ʻaonga honau ngaahi kaveinga Fakatohitapú pea ko e ngaahi tohi iiki ko ʻení te ne tokoniʻi ʻa e kakaí ke ako ʻa e moʻoní. Ko e ngaahi tuʻuaki ʻoku fokotuʻu hoko haké ʻe liliu nai ki ha tohi pē ʻoku lolotonga tuʻuaki.
3 Ko e kupu fekauʻaki mo e akó ʻe ngāueʻaki nai ke langaʻi ha mahuʻingaʻia ʻi he Folofola ʻa e ʻOtuá. ʻE lava ke ke kamata ha fetalanoaʻaki ʻaki hoʻo pehē:
◼ “ʻOku ʻi ai ʻa e fakamamafa lahi he ʻahó ni ki he fiemaʻu ʻo ha ako lelei. ʻI hoʻo fakakaukaú, ko e hā ʻa e faʻahinga ako ʻoku totonu ke tulimui ki ai ha taha ke fakapapauʻi ai ʻa e fiefia mo e lavameʻa lahi taha ʻi he moʻuí? [Tuku ke ne tali.] Ko e ngaahi ʻaonga tuʻuloá ʻe malava ke maʻu ia ʻe he faʻahinga ʻoku nau fai ke ʻilo ʻa e ʻOtuá. [Lau ʻa e Palovepi 9:10, 11.] Ko e kiʻi tohi ko ʻení [fakahā ange ʻa e kaveinga ʻo e kiʻi tohi ʻokú ke fakaeʻá] ʻoku makatuʻunga ʻi he Tohitapú. ʻOkú ne tuhu ki he matavai pē ʻe taha ʻo e ʻiló ʻa ia ʻoku malava ke taki atu ki he moʻui taʻengatá.” Fakahā ange ʻa e fakatātā mahino ʻi he kiʻi tohí. Kapau ʻoku ʻi ai ha mahuʻingaʻia moʻoni, tuku ʻa e fanga kiʻi tohí pea fokotuʻutuʻu ki ha toe ʻaʻahi. Fakahā ange neongo ko e ngaahi tohí ʻoku tuku taʻetotongi, te tau tali loto-lelei ha tokoni siʻisiʻi ki heʻetau ngāue fakafaifekau ʻi māmani lahí.
4 ʻI he toe foki ki ha tokotaha-ʻapi ʻa ia naʻá mo fetalanoaʻaki ki he mahuʻinga hono ako ʻa e Tohitapú, te ke pehē nai:
◼ “ʻI heʻeku ʻaʻahi fakamuimui maí, naʻá ta fetalanoaʻaki ai ki he hoko ʻa e Tohitapú ko e matavai ia ʻo e ako ʻe lava ke fakapapauʻi ai hotau kahaʻu tuʻuloá. Ko ia ai, ʻoku fiemaʻu ha feinga ke ako ʻa e meʻa ʻoku fiemaʻu ke tau ʻilo mei he ngaahi Konga Tohitapú. [Lau ʻa e Palovepi 2:1-5.] Ko e kakai tokolahi ʻoku nau ʻiloʻi ʻoku faingataʻa ke mahino ʻa e ngaahi konga ʻe niʻihi ʻo e Tohitapú. Te u saiʻia ke fakahāhaaʻi nounou ha founga kuo mau ngāueʻaki lahi ke tokoniʻi ʻa e kakaí ke ako lahi ange fekauʻaki mo e ngaahi akonaki tefito ʻa e Tohitapú.” Ngāueʻaki ha taha ʻo e fanga kiʻi tohi naʻe tukú, huke ki ha tafaʻaki feʻungamālié pea fakahāhaaʻi nounou ha ako Tohitapu. Kapau ʻoku loto ʻa e tokotaha-ʻapí ke fai ha ako tuʻumaʻu, fakamatalaʻi ange te ke toe foki atu mo ʻetau tohi tokoni ki he akó, ko e ʻIlo ʻA Ia ʻOku Taki Atu ki he Moʻui Taʻengatá.
5 Ko e kakai tokolahi ʻoku nau loto-moʻua koeʻuhi ko e faingataʻaʻia ʻa e laui miliona ʻo e fānaú ʻi he māmaní. Mahalo te ke lava ʻo tokoniʻi ʻa e tokotaha-ʻapí ke ne sio ki he anga ʻo e vakai ʻa e ʻOtuá ki he tuʻunga ko ʻení, ʻaki hoʻo pehē:
◼ “ʻOku ʻikai ha veiveiua kuó ke mamata ʻi he ngaahi līpooti ʻo e ongoongó fekauʻaki mo e fānau takatakai ʻi he foʻi kolopé ʻoku nau fiekaia, puke, pea mo liʻekina. Ko e hā ʻoku ʻikai malava ai ʻe he ngaahi kautaha tokoní ke fakaleleiʻi ʻa e tuʻungá? [Tuku ke ne tali.] ʻOku fiemaʻu pē ʻe he ʻOtuá ʻa e meʻa ʻoku lelei taha ki he faʻahinga ʻo e tangatá. Fakatokangaʻi ʻa e meʻa ʻokú ne talaʻofaʻaki ki he fānaú mo e kakai lalahí, ʻa ia ʻoku hiki ʻi he Tohitapú. [Lau ʻa e Fakahā 21:4.] Ko e kiʻi tohi ko ʻení [lave ki he kaveingá] ʻokú ne tokonaki mai ha ngaahi fakamatala fakaikiiki lahi ange fekauʻaki mo ha māmani ʻe ʻai ai ʻe he ʻOtuá ʻa e mamahí ke ngata.” Kapau ʻe malava, fakaava ki ha fakatātā ʻokú ne fakahaaʻi ʻa e Palataisí, pea fetalanoaʻaki ai. Tuʻuaki ʻa e fanga kiʻi tohí, pea fokotuʻutuʻu ki ha toe ʻaʻahi kehe. Talitali lelei ha tokoni pē ʻe loto-lelei ha taha ke fai ki heʻetau ngāué.
6 Kapau naʻá ke ʻuluaki lea ʻo fekauʻaki mo e faingataʻaʻia ʻa e fānaú, ʻi he ʻaʻahi hono hokó te ke hoko atu nai ʻa e fetalanoaʻakí ʻaki hoʻo pehē:
◼ “ʻI heʻeku ʻi heni fakamuimuí, naʻá ke fakahā ai ʻa e tokanga fekauʻaki mo e tuʻunga ʻo e fānaú ʻoku nau faingataʻaʻia koeʻuhi ko e movete ʻa e ngaahi ʻapí, hongeá, mahamahakí, mo e fakamālohí. ʻOku fakafiemālie ke lau ʻi he Tohitapú ʻo fekauʻaki mo ha māmani ʻe ʻikai ha fānau pe kakai lalahi te nau faingataʻaʻia koeʻuhi ko e mahamahakí, mamahí, pe maté. Ko ha kikite ʻi he tohi ʻa ʻAiseá ʻoku fakamatala ai ki ha moʻui lelei ange ʻe hoko mai ki he māmaní.” Lau pea fetalanoaʻaki ʻi he Aisea 65:20-25. Tataki atu ki hono fai ha ako Tohitapu ʻi he tohi ko e ʻIlo.
7 Koeʻuhi ko e meʻa angamaheni ki he kakai lotú ʻa hono angaʻaki ʻo e lotú, ʻe lava ke ke kamata ha fetalanoaʻaki ʻi he kaveinga ko ʻení ʻaki hoʻo pehē:
◼ “ʻI ha tuʻunga pē ʻi heʻetau moʻuí, ko e tokolahi taha ʻiate kitautolu kuo tau hokosia ʻa e ngaahi palopalema ʻa ia kuo ueʻi ai kitautolu ke lotu ki he ʻOtuá ki ha tokoni. Ka, ʻoku ongoʻi ʻe he tokolahi ia ko ʻenau ngaahi lotú ʻoku ʻikai ke tali. Naʻa mo e kau taki lotú ʻoku nau lotu fakahāhā ki ha melinó ʻoku hā ʻoku ʻikai fai ha fanongo ia ki ai. ʻOku tau lea peheé koeʻuhi ko e taú mo e fakamālohí ʻoku hokohoko atu ʻene fakalotomamahiʻi ʻa e faʻahinga ʻo e tangatá. ʻOku fanongo moʻoni mai ʻa e ʻOtuá ki he ngaahi lotú? Kapau ʻokú ne fanongo, ko e hā ʻoku lahi ai ʻa e ngaahi lotu ʻoku ngalingali ʻoku ʻikai ke talí? [Tuku ke ne tali.] ʻOku fakamatalaʻi ʻe he Sāme 145:18 ʻa e meʻa ʻoku fiemaʻú kapau ko ʻetau ngaahi lotú ke hoko ʻo tali. [Lau ʻa e konga Tohitapú.] Ko e meʻa ʻe tahá, ko e lotu ki he ʻOtuá kuo pau ke fai loto-moʻoni pea fakatatau mo e moʻoni ʻoku maʻu ʻi heʻene Folofolá, ko e Tohitapú.” Fakahā ange ʻa e fanga kiʻi tohi ʻokú ke tuʻuakí, pea ʻohake ʻa e poini ʻoku lave ai ha taha ʻo kinautolu ʻo fekauʻaki mo e mahuʻinga ʻo e lotú.
8 ʻI he toe ʻaʻahi ki ha fetalanoaʻaki ki muʻa fekauʻaki mo e lotú, te ke ʻahiʻahi nai ʻa e founga ko ʻení:
◼ “Naʻá ku fiefia ʻi heʻeta fetalanoaʻaki ʻi he kupu fekauʻaki mo e lotú. ʻE ʻikai ha veiveiua ʻokú ke ʻilo ko ha tataki ʻaonga ʻa e fakakaukau ʻa Sīsū ʻo kau ki he meʻa ke lotu ki aí.” Lau ʻa e Mātiu 6:9, 10, lave ki ha ngaahi fakakaukau tefito naʻe fakaeʻa ʻe Sīsū ʻi heʻene sīpinga lotú. Fakahā ange ʻa e vahe 16, “Founga ʻe Lava ke Ke ʻUnuʻunu Ofi Ai ki he ʻOtuá,” ʻi he tohi ko e ʻIlo, pea ʻeke ange pe ʻe lava ke ke fakahāhaaʻi ʻa e founga ke ako ai ʻa e fakamatalá.
9 ʻI he taimi ke tala atu ai ʻa e ʻiloʻi ʻo e ʻOtuá ki he niʻihi kehé, te tau ʻeke nai, “Kohai oku tāu moe gaahi mea ni?” ʻOku tali mai ʻe he ngaahi Konga Tohitapú: “Ko kitautolu.”—2 Kol. 2:16, 17, PM, NW.